سیدنا امیرِ معاویہؓ کے عمومی و خصوصی فضائل مختصر حاشیہ آرائی کے ساتھ بیان کیے جائیں گے تاکہ ناظرین کو مدعا سمجھنے میں آسانی ہو 

(صحيح البخاری: جلد، 4 صفحہ، 18 حدیث نمبر: 2799)

ترجمہ: ہم سے عبداللہ بن یوسف نے بیان کیا، کہا کہ مجھ سے لیث نے بیان کیا، کہا ہم سے یحییٰ بن سعید انصاری نے بیان کیا، ان سے محمد بن یحییٰ بن حبان نے اور ان سے سیدنا انس بن مالکؓ نے اور ان سے ان کی خالہ سیدہ اُم حرام بنتِ ملحان نے بیان کیا کہ ایک دن نبی کریمﷺ میرے قریب ہی سو گئے۔ پھر جب آپﷺ بیدار ہوئے تو مسکرا رہے تھے، میں نے عرض کیا کہ آپﷺ کس بات پر ہنس رہے ہیں؟ فرمایا میری امت کے کچھ لوگ میرے سامنے پیش کیے گئے جو غزوہ کرنے کے لیے اس بہتے دریا پر سوار ہو کر جا رہے تھے جیسے بادشاہ تخت پر چڑھتے ہیں۔ میں نے عرض کیا پھر آپﷺ میرے لیے بھی دعا کر دیجئیے کہ اللہ تعالیٰ مجھے بھی انہیں میں سے بنا دے۔ آپﷺ نے ان کے لیے دعا فرمائی۔ پھر دوبارہ آپﷺ سو گئے اور پہلے ہی کی طرح اس مرتبہ بھی کہا (بیدار ہوتے ہوئے مسکرائے) اُم حرامؓ نے پہلے ہی کی طرح اس مرتبہ بھی عرض کی اور آپﷺ نے وہی جواب دیا۔ اُم حرامؓ نے عرض کیا آپﷺ دعا کر دیں کہ اللہ تعالیٰ مجھے بھی انہیں میں سے بنا دے تو آپﷺ نے فرمایا تم سب سے پہلے لشکر کے ساتھ ہو گی چناچہ وہ اپنے شوہر سیدنا عبادہ بن صامتؓ کے ساتھ مسلمانوں کے سب سے پہلے بحری بیڑے میں شریک ہوئیں جس کی سربراہی سیدنا امیرِ معاویہؓ کر رہے تھے غزوہ سے لوٹتے وقت جب شام کے ساحل پر لشکر اترا تو سیدہ اُم حرامؓ کے قریب ایک سواری لائی گئی تاکہ اس پر سوار ہو جائیں لیکن جانور نے انہیں گرا دیا اور اسی میں ان کا انتقال ہو گیا۔ 

(صحيح البخاری: جلد، 4 صفحہ، 207 حدیث نمبر:3641)

ترجمہ: ہم سے حمیدی نے بیان کیا، کہا ہم سے ولید نے بیان کیا، کہا کہ مجھ سے یزید بن جابر نے بیان کیا، کہا کہ مجھ سے عمیر بن ہانی نے بیان کیا اور انہوں نے سیدنا معاویہ بن ابی سفیانؓ سے سنا، انہوں نے بیان کیا کہ میں نے رسولﷺ سے سنا تھا۔ آپﷺ فرما رہے تھے کہ میری امت میں ہمیشہ ایک گروہ ایسا موجود رہے گا جو اللہ تعالیٰ کی شریعت پر قائم رہے گا، انہیں ذلیل کرنے کی کوشش کرنے والے اور اسی طرح ان کی مخالفت کرنے والے انہیں کوئی نقصان نہ پہنچا سکیں گے، یہاں تک کہ قیامت آ جائے گی اور وہ اسی حالت پر رہیں گے۔ عمیر نے بیان کیا کہ اس پر مالک بن یخامر نے کہا کہ سیدنا معاذ بن جبلؓ نے کہا تھا کہ ہمارے زمانے میں یہ لوگ شام میں ہیں۔ سیدنا امیرِ معاویہؓ نے کہا کہ دیکھو یہ مالک بن یخامر یہاں موجود ہیں، جو کہہ رہے ہیں کہ انہوں نے سیدنا معاذ بن جبلؓ سے سنا کہ یہ لوگ شام کے ملک میں ہیں۔ 

(اس حدیث سے سیدنا امیرِ معاویہؓ کے گروپ کا حق پر ہونا ثابت ہوا) 

(صحيح مسلم: جلد، 3 صفحہ، 113 حدیث نمبر: 2459)

ترجمہ: ابوربیع زہرانی، قتیبہ بن سعید، ابوعوانہ، قتادہ، ابو نضرہ، حضرت ابوسعیدؓ سے روایت ہے کہ رسولﷺ نے ارشاد فرمایا میری امت میں دو گروہ ہو جائیں گے تو ان میں سے تیسرا مارقہ (یعنی خوارج کا گروہ) نکلے گا ان خوارج سے وہ گروہ جہاد کرے گا جو حق کے زیادہ قریب ہو گا۔ 

(یعنی سیدنا علیؓ حق کے زیادہ قریب تھے اور سیدنا امیرِ معاویہ رضی اللہ عنہ کا گروہ بھی حق پر تھا) 

ایک ضروری وضاحت

چودہ سو سال کے تمام اہلِ سنت محدثین، مؤرخین، فقہاء محققین اور اصولیین کا اس بات پر اجماع ہے کہ سیدنا امیرِ معاویہ رضی اللہ عنہ نے حضورﷺ کی موجودگی میں ایمان قبول کیا اور تا دمِ حیات ایمان پر ثابت قدم رہے۔ 

صحابہ کرام رضی اللہ عنہم کے لیے قرآن و سنت میں جتنے فضائل و مناقب وارد ہوئے ہیں دیگر صحابہ کرام رضی اللہ عنہم کی طرح سیدنا امیرِ معاویہ رضی اللہ عنہ بھی بالاجماع ان تمام مناقب و فضائل کے کامل طور پر حقدار ہیں ۔ 

سیدنا امیرِ معاویہ رضی اللہ عنہ قبیلہ قریش کی مشہور شاخ بنو اُمیہ کے چشم و چراغ ہیں، 

 معاویہ بن ابی سفیان بن حرب بن امیہ بن عبدِ شمس بن عبدِ مناف بن قصی 

پانچویں پشت میں جا کر سیدنا امیرِ معاویہ رضی اللہ عنہ کا شجرہ نسب حضورﷺ کے ساتھ مل جاتا ہے۔

 ایک اصولی ضابطہ ہے کہ قبیلہ قریش کے جو مناقب بیان کیے گئے ہیں اس میں وہ صحابہ کرام رضی اللہ عنہم بھی داخل ہیں جو خاندانِ قریش کے ساتھ تعلق رکھتے ہیں اور سیدنا امیرِ معاویہ رضی اللہ عنہ کا تعلق بھی خاندانِ قریش کے ساتھ تھا۔ 

(صحيح مسلم: جلد، 7 صفحہ، 58 حدیث نمبر: 5938)

ترجمہ: محمد بن مہران رازی محمد بن عبدالرحمٰن بن سہم ولید ابنِ مہران ولید بن مسلم، اوزاعی ابی عمار شداد، حضرت واثلہ بن اسقعؓ فرماتے ہیں کہ میں نے رسولﷺ سے سنا آپﷺ فرماتے ہیں کہ اللہ تعالیٰ نے حضرت اسماعیل علیہ السلام کی اولاد میں سے کنانہ کو چنا اور قریش کو کنانہ میں سے چنا اور قریش میں سے بنی ہاشم کو چنا اور پھر بنی ہاشم میں سے مجھے چنا۔

(صحيح البخاری: جلد، 5 صفحہ، 28 حدیث نمبر: 3764)

ترجمہ: کہا ہم سے حسن بن بشیر نے بیان کیا، ان سے عثمان بن اسود نے اور ان سے ابنِ ابی ملیکہ نے بیان کیا کہ سیدنا امیرِ معاویہ رضی اللہ عنہ نے عشاء کے بعد وتر کی نماز صرف ایک رکعت پڑھی وہیں سیدنا ابنِ عباسؓ کے مولیٰ (کریب) بھی موجود تھے، جب وہ ابنِ عباسؓ کی خدمت میں حاضر ہوئے تو (سیدنا امیرِ معاویہؓ کی ایک رکعت وتر کا ذکر کیا) اس پر انہوں نے کہا کوئی حرج نہیں ہے کیونکہ سیدنا امیرِ معاویہ رضی اللہ عنہ رسولﷺ کے صحابی ہیں۔

سیدنا امیرِ معاویہ رضی اللہ عنہ کی حضورﷺ سے سب سے مشہور اور قریبی رشتہ داری یہ ہے کہ آپؓ اُم المؤمنین سیدہ اُم حبیبہؓ کے حقیقی بھائی ہیں، اور خبر قرآنی کے مطابق سیدہ اُم حبیبہؓ تمام مسلمانوں کی ماں ہیں، اسی وجہ سے محدث اور فقیہ حضرت امام احمد بن حنبلؒ نے سیدنا امیرِ معاویہ رضی اللہ عنہ کو خال المؤمنین (تمام مسلمانوں کے ماموں) کا لقب عنایت فرمایا ہے

(السنة لأبی بكر بن الخلال: جلد، 2 صفحہ، 433 اسنادہ صحیح)

 ترجمہ: ابو طالب نے امام احمد بن حنبلؒ سے پوچھا میں یہ کہتا ہوں کہ سیدنا امیرِ معاویہ رضی اللہ عنہ اور سیدنا عبداللہ بن عمرؓ مؤمنین کے ماموں ہیں کیا یہ بات درست ہے؟ تو امام احمد بن حنبلؒ نے ارشاد فرمایا جی ہاں سیدنا امیرِ معاویہ رضی اللہ عنہ سیدہ اُم حبیبہؓ جو حضورﷺ کی زوجہ ہیں کے حقیقی بھائی ہیں اور سیدنا عبداللہ بن عمرؓ سیدہ حفصہؓ کے حقیقی بھائی ہیں پھر اس شخص نے کہا کہ کیا میں سیدنا امیرِ معاویہ رضی اللہ عنہ کو مؤمنین کا ماموں کہہ سکتا ہوں تو امام احمد بن حنبلؒ نے جواب دیا بالکل کہہ سکتے ہیں۔

(المستدرك على الصحيحين: جلد، 3 صفحہ، 127 التعليق من تلخيص الذهبی: حدیث، 4747 - صحيح)

ترجمہ: "حضرت مسورؓ بیان کرتے ہیں کہ سیدنا حسن بن حسن رضی اللہ عنہ نے ان سے ان کی بیٹی کا رشتہ کے لیے پیغام بھیجا، انہوں نے جواباً کہا: ان سے کہئے گا کہ وہ مجھے عشاء کے وقت مل لیں، چنانچہ حضرت حسن بن حسنؓ عشاء کے وقت ان سے ملاقات کے لیے گئے حضرت مسورؓ اللہ تعالیٰ کی حمد و ثناء بیان کرنے کے بعد بولے: خدا کی قسم! تمہارے نسب تمہارے سبب اور تمہارے ساتھ رشتہ داری سے بڑھ کر میری نظر میں کسی چیز کی اہمیت نہیں ہے، لیکن رسولﷺ نے فرمایا ہے"فاطمہ میرے جسم کا حصہ ہے اس کی تکلیف سے مجھے تکلیف ہوتی ہے اور اس کی خوشی سے مجھے خوشی ہوتی ہے۔ اور قیامت کے دن تمام نسب ختم ہو جائیں گے سوائے میری نسبی رشتہ داری، میری سببی رشتہ داری اور میری سسرالی رشتہ داری کے۔ جبکہ تمہارے ہاں پہلے سے ان کی صاحبزادی موجود ہے اگر میں اپنی بیٹی کا نکاح تم سے کر دیتا ہوں تو یہ چیز اس سید زادی کو تکلیف دے گی۔ یہ کہہ کر انہوں نے معذرت کر لی ۔

یہ حدیث صحیح الاسناد ہے لیکن امام بخاریؒ اور امام مسلمؒ نے اس کو نقل نہیں کیا۔"

سیدنا امیرِ معاویہ رضی اللہ عنہ بھی اس فضیلت میں یقینی طور پر داخل ہیں ان کو بھی جنت میں رسولﷺ کی رفاقت نصیب ہو گی کیونکہ سیدنا امیرِ معاویہ رضی اللہ عنہ بھی حضورﷺ کے سسرال والوں میں سے ہیں 

(المستدرك على الصحيحين: جلد، 3 صفحہ، 732 التعليق من تلخيص الذهبی: حدیث: 6656 صحيح)

ترجمہ: حضرت عویم بن ساعدہؓ فرماتے ہیں کہ رسول اللہﷺ نے ارشاد فرمایا: بے شک اللہ تعالیٰ نے میرا انتخاب فرمایا اور میرے لیے صحابہ کرام رضی اللہ عنہم کو چنا اور ان میں سے میرے وزیر بنائے، میرے مددگار بنائے، میرے سسرالی رشتہ دار بنائے، جس نے میرے ان تعلق داروں کو گالی دی، اس پر اللہ تعالیٰ کی، فرشتوں کی اور تمام انسانوں کی لعنت ہے۔ قیامت کے دن اس کا نہ کوئی عمل قبول ہو گا نہ اس کے حق میں سفارش قبول کی جائے گی۔

 یہ حدیث صحیح الاسناد ہے لیکن امام بخاریؒ اور امام مسلمؒ نے اس کو نقل نہیں کیا۔

اس حدیث سے معلوم ہوا کہ حضورﷺ کے سسرالی خاندان والوں کو برا بھلا کہنے والے پر اللہ تعالیٰ کی لعنت ہے اور سیدنا امیرِ معاویہؓ بھی اسی خاندان کے فرد ہیں۔ 

 (سورۃ الفتح: آیت، 29)

ترجمہ: محمد ﷺ اللہ کے رسول ہیں۔ اور جو لوگ ان کے ساتھ ہیں، وہ کافروں کے مقابلے میں سخت ہیں (اور) آپس میں ایک دوسرے کے لیے رحم دل ہیں۔ تم انہیں دیکھو گے کہ کبھی رکوع میں ہیں، کبھی سجدے میں، (غرض) اللہ کے فضل اور خوشنودی کی تلاش میں لگے ہوئے ہیں۔ ان کی علامتیں سجدے کے اثر سے ان کے چہروں پر نمایاں ہیں۔ یہ ہیں ان کے وہ اوصاف جو تورات میں مذکور ہیں۔ اور انجیل میں ان کی مثال یہ ہے کہ جیسے ایک کھیتی ہو جس نے اپنی کونپل نکالی، پھر اس کو مضبوط کیا، پھر وہ موٹی ہوگئی، پھر اپنے تنے پر اس طرح سیدھی کھڑی ہو گئی کہ کاشتکار اس سے خوش ہوتے ہیں۔ تاکہ اللہ ان (کی اس ترقی) سے کافروں کا دل جلائے۔ 

قرآن مقدس کی اس آیت کے بالکل آخری حصہ کو غور سے پڑھیں تو یہ بات سمجھ آتی ہے کہ صحابہ کرام رضی اللہ عنہم سے جلنا اور بغض رکھنا یہ کافروں کے نشانی ہے۔ 

یہ حکم جملہ صحابہ کرام رضی اللہ عنہم کے بارے میں ہے اور سیدنا امیرِ معاویہؓ بھی اس میں داخل ہیں۔

(سنن الترمذی: جلد، 5 صفحہ، 696 حدیث نمبر: 3862)

ترجمہ: سیدنا عبداللہ بن مغفلؓ کہتے ہیں کہ رسول اللہﷺ نے فرمایا: اللہ سے ڈرو، اللہ سے ڈرو، میرے صحابہ کرام رضی اللہ عنہم کے معاملہ میں، اللہ سے ڈرو، اللہ سے ڈرو، میرے صحابہ کرام رضی اللہ عنہم کے معاملہ میں، اور میرے بعد انہیں ہدف ملامت نہ بنانا، جو ان سے محبت کرے گا وہ مجھ سے محبت کرنے کی وجہ سے ان سے محبت کرے گا اور جو ان سے بغض رکھے گا وہ مجھ سے بغض کی وجہ سے ان سے بغض رکھے گا، جس نے انہیں ایذاء پہنچائی اس نے مجھے ایذاء پہنچائی اور جس نے مجھے ایذاء پہنچائی اس نے اللہ کو ایذاء دی، اور جس نے اللہ کو ایذاء دی تو قریب ہے کہ وہ اسے اپنی گرفت میں لے لے ۔

یہ حدیث بھی جملہ صحابہ کرام رضی اللہ عنہم کے بارے میں ہے سیدنا امیرِ معاویہؓ بھی اس کے عموم میں داخل ہیں۔ 

نوٹ: اگرچہ بعض محدثین نے اس حدیث پر ضعیف ہونے کا حکم لگایا ہے مگر دیگر محدثین نے اس کو صحیح بھی قرار دیا ہے۔ اس کے متن پر منکر ہونے کا حکم کسی نے بھی نہیں لگایا اس کے متن کی تائید قرآن و سنت سے ہوتی ہے۔

(صحيح البخاری: جلد، 5 صفحہ، 28 حدیث نمبر: 3765)

ترجمہ: ہم سے ابنِ ابی مریم نے بیان کیا، کہا ہم سے نافع بن عمر نے بیان کیا، کہا مجھ سے ابنِ ابی ملیکہ نے بیان کیا کہ سیدنا عبداللہ بن عباسؓ سے کہا گیا کہ امیرالمؤمنین سیدنا امیرِ معاویہؓ کے متعلق آپؓ کیا فرماتے ہیں، انہوں نے وتر کی نماز صرف ایک رکعت پڑھی ہے؟ انہوں نے کہا کہ وہ خود فقیہ ہیں۔ 

(صحيح مسلم: جلد، 4 صفحہ، 1945 عبد الباقی حدیث نمبر: 6409)

ترجمہ: عباس بن عبدالعظیم عنبر احمد بن جعفر معقری نضر ابنِ محمد یمامی عکرمہ ابو زمیل حضرت ابنِ عباسؓ سے روایت ہے کہ مسلمان نہ تو سیدنا ابوسفیانؓ کی طرف دیکھتے تھے اور نہ ہی ان کے پاس بیٹھتے تھے۔ تو حضرت ابوسفیانؓ نے نبی کریمﷺ سے عرض کیا اے اللہ کے نبیﷺ تین باتیں مجھے عطا فرمائیں آپﷺ نے فرمایا: جی ہاں! بتاؤ۔ عرض کیا: میری بیٹی سیدہ اُم حبیبہ بنتِ ابوسفیانؓ اہلِ عرب سے حسین و جمیل ہیں میں اس کا نکاح آپﷺ سے کرتا ہوں آپﷺ نے فرمایا: بہتر عرض کیا اور معاویہؓ کو اپنے لیے کاتبِ وحی مقرر کر لیں آپﷺ نے فرمایا: بہتر آپﷺ مجھے حکم دیں کہ میں کفار سے لڑتا رہوں جیسا کہ میں مسلمانوں سے لڑتا تھا آپﷺ نے فرمایا بہتر ابوزمیل نے کہا اگر یہ خود نبی کریمﷺ سے ان باتوں کا مطالبہ نہ کرتے تو آپﷺ یہ کام نہ فرماتے کیونکہ آپﷺ کی عادت مبارکہ یہ تھی کہ آپﷺ سے جس بھی چیز کا مطالبہ کیا جاتا تو آپﷺ اس کے جواب میں ہاں ہی فرماتے تھے۔ 

سیدنا امیرِ معاویہؓ کے کاتبِ وحی ہونے پر دیگر روایات بھی موجود ہیں اختصار کے پیشِ نظر صرف ایک بیان کی گئی ہے۔

(صحيح مسلم: جلد، 4 صفحہ، 2051 عبد الباقی، حدیث نمبر: 6770)

ترجمہ: سیدنا ابوبکر بن ابی شیبہ، ابوکریب ابی بکر وکیع، مسعر علقمہ بن مرثد مغیرہ بن عبداللہ یشکری معرور بن سوید حضرت عبداللہؓ سے روایت ہے کہ زوجہ نبی اکرمﷺ سیدہ اُم حبیبہؓ نے کہا اے اللہ مجھے اپنے خاوند رسول اللہﷺ اور والد سیدنا ابوسفیانؓ اور بھائی سیدنا امیرِ معاویہؓ سے متمتمع کرنا نبی کریمﷺ نے فرمایا تو نے اللہ سے مقرر شدہ اوقات و ایام اور تقسیم شدہ رزق کا سوال کیا ان میں سے کسی چیز کو وقت مقرر سے مقدم اور مؤخر نہیں کیا جاتا اور اگر تو اللہ سے سوال کرتی کہ وہ تجھے جہنم کے عذاب یا قبر کے عذاب سے پناہ دے تو وہ بہتر اور افضل ہوتا۔ 

(صحيح مسلم: جلد، 8 صفحہ، 27 حدیث نمبر، 2628)

باب: نبیﷺ کا ایسے آدمی پر لعنت کرنا یا اس کے خلاف دعا فرمانا حالانکہ وہ اس کا مستحق نہ ہو تو وہ ایسے آدمی کے لیے اجر اور رحمت ہے

ترجمہ: محمد بن مثنی، عنبری ابنِ بشار ابنِ مثنی امیہ بن خالد شعبہ، ابی حمزہ قصاب حضرت ابنِ عباسؓ سے روایت ہے فرماتے ہیں کہ میں بچوں کے ساتھ کھیل رہا تھا کہ اچانک رسول اللہﷺ تشریف لے آئے تو میں دروازے کے پیچھے چھپ گیا حضرت ابنِ عباسؓ کہتے ہیں کہ آپﷺ نے مجھے میرے دونوں کندھوں کے درمیان تھپکی دی اور فرمایا جاؤ سیدنا امیرِ معاویہؓ کو بلا کر لاؤ سیدنا ابنِ عباسؓ کہتے ہیں کہ میں آیا اور پھر میں نے عرض کیا وہ (کھانا) کھا رہے ہیں حضرت ابنِ عباسؓ کہتے ہیں کہ پھر آپﷺ نے مجھے فرمایا جاؤ حضرت امیرِ معاویہؓ کو بلا کر لاؤ سیدنا ابنِ عباسؓ کہتے ہیں کہ میں نے پھر آ کر عرض کیا وہ کھانا کھا رہے ہیں تو آپﷺ نے فرمایا اللہ اس کا پیٹ نہ بھرے ابن المثنی نے کہا میں نے امیہ سے کہا حطانی کیا ہے انہوں نے کہا تھپکی دینا۔

سیّدنا امیرِ معاویہؓ چونکہ اس بددعا کے مستحق نہیں تھے جیسے کہ شارحِ حدیث نے لکھا ہے اس لیے ان کا آخرت میں اللہ تعالیٰ کی رحمت کا امیدوار ہونا ثابت ہوا۔

(صحيح مسلم: جلد، 4 صفحہ، 58 حدیث نمبر: 3022)

ترجمہ: محمد بن حاتم، یحییٰ بن سعید، ابنِ جریج، حسن بن مسلم، طاؤس، سیدنا ابنِ عباسؓ سے روایت ہے کہ سیدنا امیرِ معاویہ بن ابی سفیانؓ نے انہیں خبر دی فرمایا کہ میں نے رسولﷺ کے بال مروہ پر تیر کے پیکان سے کاٹے یا کہا کہ میں نے آپﷺ کو دیکھا کہ آپﷺ مروہ پر تیر کے پیکان سے بال کٹوا رہے ہیں۔

(سنن الترمذی: جلد، 5 صفحہ، 687 حكم الألبانی: حدیث نمبر: 3842، تخریج دارالدعوہ: تفرد بہ المؤلف تحفة الأشراف: صفحہ، 9708 صحیح) 

باب: سیدنا امیرِ معاویہ بن ابی سفیانؓ کے مناقب

ترجمہ: صحابی رسول سیدنا عبدالرحمٰن بن ابی عمیرہؓ سے روایت ہے کہ نبی اکرمﷺ نے سیدنا امیرِ معاویہؓ کے بارے میں فرمایا: اے اللہ! تو معاویہؓ کو ہدایت دے اور ہدایت یافتہ بنا دے، اور ان کے ذریعہ لوگوں کو ہدایت دے 

امام ترمذیؒ کہتے ہیں: یہ حدیث حسن غریب ہے۔   

(سنن الترمذی: جلد، 5 صفحہ، 687 حكم الألبانی: صحيح لغيره حدیث نمبر: 3843)

باب: حضرت امیرِ معاویہ بن ابی سفیانؓ کے مناقب

ترجمہ: ابو ادریس خولانی کہتے ہیں کہ جب سیدنا عمر بن خطابؓ نے سیدنا عمیر بن سعدؓ کو حمص سے معزول کیا اور ان کی جگہ سیدنا امیرِ معاویہؓ کو والی بنایا تو لوگوں نے کہا: انہوں نے سیدنا عمیرؓ کو معزول کر دیا اور سیدنا امیرِ معاویہؓ کو والی بنایا، تو سیدنا عمیرؓ نے کہا: تم لوگ سیدنا امیرِ معاویہؓ کا ذکر بھلے طریقہ سے کرو کیونکہ میں نے رسول اللہﷺ کو فرماتے ہوئے سنا ہے: اللهم اهد به اے اللہ! ان کے ذریعہ ہدایت دے۔

(مجمع الزوائد و منبع الفوائد: جلد، 5 صفحہ، 189)

ترجمہ: رسول اللہﷺ نے ارشاد فرمایا یہ معاملہ (یعنی خلافت کا) پہلے نبوت اور رحمت کے ساتھ شروع ہو گا پھر خلافت اور رحمت ہو گی پھر ملوکیت اور رحمت ہو گی پھر امارت اور رحمت ہو گی۔  

اس حدیث سے سیدنا امیرِ معاویہؓ کی حکومت رحمت والی ثابت ہوتی ہے۔ 

(السنن الكبير للبيہقی: جلد، 12 صفحہ، 211 ت التركی)

ترجمہ: عروہ کہتے ہیں: میں سیدنا امیرِ معاویہؓ کی خدمت میں حاضر ہوا، انہوں نے مجھ سے پوچھا خفیہ طور پر الاٹ کی ہوئی جائیداد کا کیا ہوا؟ میں نے کہا: وہ میرے پاس موجود ہے۔ یہ سن کر سیدنا امیرِ معاویہؓ نے کہا: بخدا میں نے ہی اس زمین کو ایکوائر کیا تھا۔ سیدنا ابوبکر صدیقؓ نے سیدنا زبیرؓ کو بطور جاگیر عطا کی تھی اور میں اس کی کاغذی کارروائی مکمل کر رہا تھا کہ اس دوران سیدنا عمر فاروقؓ تشریف لائے، انہیں دیکھ کر سیدنا ابوبکر صدیقؓ نے اس زمینی دستاویز کو اپنے بستر کے نیچے دبا دیا۔ سیدنا عمر فاروقؓ نے اندر آتے ہی پوچھا: تم لوگ کسی ضروری کام میں مشغول تھے؟ سیدنا ابوبکر صدیقؓ نے کہا:جی ہاں یہ سن کر سیدنا عمر فاروقؓ چلے گئے ان کے چلے جانے کے بعد سیدنا ابوبکر صدیقؓ نے تحریری دستاویز دوبارہ نکالی۔ پھر میں نے اسے مکمل کیا۔ 

(الطبقات الكبرىٰ، متمم الصحابة، الطبقة الرابعة: جلد، 1 صفحہ، 113)

ترجمہ: سیدنا ابوسفیانؓ سیدنا عمر فاروقؓ کی خدمت میں حاضر ہوئے سیدنا عمر فاروقؓ نے یزید بن ابی سفیان کے بارے میں سیدنا ابوسفیانؓ سے تعزیت کی اور فرمایا: اے سیدنا ابوسفیانؓ، اللہ تیرے بیٹے کے صدمہ پر تجھے اجر عطا فرمائے، سیدنا ابوسفیانؓ نے کہا: امیر المؤمنین کس بیٹے کی بات کر رہے ہیں؟ آپؓ نے فرمایا: یزید کی، سیدنا ابوسفیانؓ نے کہا: پھر یزید کی جگہ نے پھر آپؓ نے کسے والی بنا کر بھیجا ہے؟ سیدنا عمرؓ نے فرمایا: اس کے بھائی سیدنا امیرِ معاویہؓ کو، اور فرمایا: ہم کسی مصلح سے منازعت کو حلال نہیں سمجھتے۔ یعنی کسی مصلح اور قابل کو ہم آگے ہی بڑھاتے ہیں پیچھے نہیں کھینچتے ہیں 

فائدہ: سیدنا عمر فاروقؓ نے سیدنا امیرِ معاویہؓ کو مصلح امت قرار دیا ہے۔ 

اس روایت سے معلوم ہوتا ہے کہ سیدنا ابوبکر صدیقؓ سیدنا امیرِ معاویہؓ پر کتنا اعتماد کرتے تھے۔ 

 أَبُو أُسَامَةَ، عَنْ مُجَالِدٍ، عَنِ الشَّعْبِی، عَنِ الْحَارِثِ، قَالَ: لَمَّا رَجَعَ عَلِی مِنْ صِفِّينَ عَلِمَ أَنَّهُ لَا يَمْلِكُ أَبَدًا، فَتَكَلَّمَ بِأَشْيَاءَ كَانَ لَا يَتَكَلَّمُ بِهَا، وَحَدَّثَ بِأَحَادِيثَ كَانَ لَا يَتَحَدَّثُ بِهَا، فَقَالَ فِيمَا يَقُولُ: أَيُّهَا النَّاسُ، لَا ‌تَكْرَهُوا ‌إِمَارَةَ ‌مُعَاوِيَةَ، وَاللّٰهِ لَوْ قَدْ فَقَدْتُمُوهُ لَقَدْ رَأَيْتُمُ الرُّءُوسَ تَنْدُرُ مِنْ كَوَاهِلِهَا كَالْحَنْظَلِ سند حسن

(مصنف ابنِ أبی شيبة: جلد، 7 صفحہ، 548 ت الحوت)

 ترجمہ: سیدنا علیؓ نے فرمایا: اے لوگو! سیدنا امیرِ معاویہؓ کی حکومت کو برا نہ سمجھو، بخدا جب وہ تم میں نہیں ہوں گے تو تم سروں کو گردنوں سے اس طرح الگ ہوتے دیکھو گے جیسے حنظل (اندرائن) کو اس کی بیل سے توڑ کر الگ کر دیا جاتا ہے۔

(صحيح البخاری: جلد، 4 صفحہ، 204 حدیث نمبر: 3629)

باب: نبی کریمﷺ کے معجزوں یعنی نبوت کی نشانیوں کا بیان

ترجمہ: مجھ سے عبداللہ بن محمد مسندی نے بیان کیا، انہوں نے کہا ہم سے یحییٰ بن آدم نے بیان کیا، انہوں نے کہا ہم سے حسین جعفی نے بیان کیا، ان سے ابو موسیٰ نے، ان سے امام حسن بصری نے اور ان سے سیدنا ابوبکرؓ نے کہ نبی کریمﷺ سیدنا حسنؓ کو ایک دن ساتھ لے کر باہر تشریف لائے اور منبر پر ان کو لے کر چڑھ گئے پھر فرمایا میرا یہ بیٹا سید ہے اور امید ہے کہ اللہ تعالیٰ اس کے ذریعہ مسلمانوں کی دو جماعتوں میں صلح کرا دے گا۔ 

یہ بات سب کو معلوم ہے کہ سیدنا حسنؓ نے امرِ خلافت سیدنا امیرِ معاویہؓ کو سپرد کر دیا تھا اور فریقین کی صلح ہو گئی تھی۔

(المنتقى من كتاب الطبقات لأبی عروبة الحرانی: صفحہ، 41)

ترجمہ: سیدہ عائشہ صدیقہؓ یہ ارشاد فرماتی تھی کہ میری یہ تمنا ہے کہ اللہ تعالیٰ میری عمر بھی سیدنا امیرِ معاویہؓ کے ساتھ لگا کر ان کی عمر کو زیادہ کر دے۔ 

اُم المومنینؓ کے یہ الفاظ سیدنا امیرِ معاویہؓ کی منقبت کو ظاہر کرتے ہیں

(مجمع الزوائد و منبع الفوائد: جلد، 9 صفحہ، 357)

ترجمہ: حضرت ابو الدرداءؓ ارشاد فرماتے ہیں میں نے سیدنا امیرِ معاویہؓ کی نماز کو رسولﷺ کی نماز کے بہت زیادہ مشابہ دیکھا یعنی سیدنا امیرِ معاویہؓ کی نماز حضورﷺ کی نماز کے بہت زیادہ مشابہ تھی 

(سنن أبی داؤد: جلد، 6 صفحہ، 335 ت الأرنؤوط حدیث نمبر: 4279)

ترجمہ: سیدنا جابر بن سمرہؓ کہتے ہیں کہ میں نے رسول اللہﷺ کو فرماتے ہوئے سنا: یہ دین برابر قائم رہے گا یہاں تک کہ تم پر بارہ خلیفہ ہوں گے، ان میں سے ہر ایک پر امت اتفاق کرے گی پھر میں نے نبی اکرمﷺ سے ایک ایسی بات سنی جسے میں سمجھ نہیں سکا میں نے اپنے والد سے پوچھا: آپﷺ نے کیا فرمایا؟ تو انہوں نے بتایا کہ آپﷺ نے فرمایا ہے: یہ سارے خلفاء قریش میں سے ہوں گے۔ 

(فتح الباری لابنِ حجر: جلد، 13 صفحہ، 214، ط السلفية)

ترجمہ: حافظ ابنِ حجرؒ نے اس کی صراحت فرمائی ہے کہ سیدنا حسنؓ کی صلح کے بعد سیدنا امیرِ معاویہؓ حسنین کریمینؓ سمیت سب حضرات نے بیعت کر لی تھی۔

سير أعلام النبلاء ط الحديث: جلد، 4 صفحہ، 258)

ترجمہ: سیدنا امیرِ معاویہؓ فرماتے ہیں: میں فتح مکہ سے قبل اسلام قبول کر چکا تھا اور فتح مکہ والے دن اپنے اسلام کو ظاہر کیا حضورﷺ نے مجھے مرحبا کہا اور میں آپﷺ کے لیے وحی لکھا کرتا تھا۔ 

 (سورة الحديد: آیت، 10)

ترجمہ: اور تمہارے لیے کونسی وجہ ہے کہ تم اللہ کے راستے میں خرچ نہ کرو، حالانکہ آسمانوں اور زمین کی ساری میراث اللہ ہی کے لیے ہے۔ تم میں سے جنہوں نے (مکہ کی) فتح سے پہلے خرچ کیا، اور لڑائی لڑی، وہ (بعد والوں کے) برابر نہیں ہیں۔ وہ درجے میں ان لوگوں سے بڑھے ہوئے ہیں جنہوں نے (فتح مکہ کے) بعد خرچ کیا، اور لڑائی لڑی۔ یوں اللہ نے بھلائی کا وعدہ ان سب سے کر رکھا ہے، اور تم جو کچھ کرتے ہو اللہ اس سے پوری طرح باخبر ہے۔  

اگرچہ سیدنا امیرِ معاویہؓ فتح مکہ سے قبل اسلام لا چکے تھے جیسا کہ ایک روایت میں گزر چکا ہے 

سیدنا امیرِ معاویہؓ کو اگر فتح مکہ سے قبل نازل ہونے والی آیات کا مصداق نہ بھی مانا جائے تو لامحالہ اس آیت کا مصداق بن کر جنتی ثابت ہوتے ہیں 

اور یہاں سے حسنی سے مراد جنت ہے بہت سے محدثین اور مفسرین نے اس کی وضاحت فرمائی ہے سر دست صرف ایک حوالہ ناظرین کی خدمت میں پیش کرتے ہیں۔

(تفسير الطبری: جلد، 9 صفحہ، 96 ط التربية والتراث)

(سورۃ التوبة: آیت، 26)

ترجمہ: پھر اللہ نے اپنے رسول پر اور مومنوں پر اپنی طرف سے تسکین نازل کی اور ایسے لشکر اتارے جو تمہیں نظر نہیں آئے، اور جن لوگوں نے کفر اپنا رکھا تھا، اللہ نے ان کو سزا دی، اور ایسے کافروں کا یہی بدلہ ہے۔

یہ آیت ان صحابہ کرام رضی اللہ عنہم کے بارے میں نازل ہوئی جو غزوۀ حنین میں شریک تھے سیدنا امیرِ معاویہؓ بھی اس غزوہ میں شریک تھے وہ بھی اس آیت کے مصداق ہیں جس کی صراحت ذیل میں نقل کی جاتی ہے۔ 

(فتح المنان بسيرة أمير المؤمنين معاوية بن أبی سفيان: صفحہ، 240) 

مذکورہ بالا عبارت سے واضح ہوا کہ سیدنا امیرِ معاویہ رضی اللہ عنہ بھی اس فضیلت کے مصداق ہیں۔

(صحيح مسلم: جلد، 4 صفحہ، 2214 ت عبد الباقی: حدیث نمبر: 7256)

ترجمہ: محمد بن رافع عبدالرزاق، معمر، ہمام بن منبہ، حضرت ابوہریرہؓ سے روایت ہے کہ رسول اللہﷺ نے فرمایا قیامت قائم نہ ہو گی یہاں تک کہ دو عظیم جماعتوں کے مابین جنگ و جدل نہ ہو جائے اور ان کے درمیان ایک بہت بڑی لڑائی ہو گی اور دونوں کا دعویٰ ایک ہو گا (کہ ہم رضائے الہٰی اور اعلائے کلمۃ اللہ کے لیے جہاد کر رہے ہیں۔ 

(صحيح البخاری: جلد، 5 صفحہ، 8 حدیث نمبر: 3673)

ترجمہ: ہم سے آدم بن ابی ایاس نے بیان کیا، ہم سے شعبہ نے بیان کیا، ان سے اعمش نے بیان کیا، کہا میں نے ذکوان سے سنا اور ان سے سیدنا ابو سعید خدریؓ نے بیان کیا کہ نبی کریمﷺ نے فرمایا میرے اصحابِ کرام رضی اللہ عنہم کو برا بھلا مت کہو۔ اگر کوئی شخص احد پہاڑ کے برابر بھی سونا (اللہ کی راہ میں) خرچ کر ڈالے تو ان کے ایک مد غلہ کے برابر بھی نہیں ہو سکتا اور نہ ان کے آدھے مد کے برابر۔ شعبہ کے ساتھ اس حدیث کو جریر، عبداللہ بن داؤد، ابو معاویہ اور محاضر نے بھی اعمش سے روایت کیا ہے۔ 

یہ حدیث بھی اگرچہ تمام صحابہ کرام رضی اللہ عنہم کے بارے میں ہے سیدنا امیرِ معاویہ رضی اللہ عنہ بھی اس میں شامل ہیں۔

(مصنف ابنِ أبی شيبة: جلد، 11 صفحہ، 336 ت الشثری)

(الشريعة للآجری: جلد، 5 صفحہ، 2470)

ان دونوں صحیح حدیثوں سے یہ بات ثابت ہوتی ہے کہ سیدنا امیرِ معاویہ رضی اللہ عنہ سے حسنین کریمین رضی اللہ عنہما ہدایا وصول کرتے تھے۔

(التاريخ الكبير للبخاری: جلد، 7 صفحہ، 732 ت المعلمی اليمانی)

ترجمہ: سیدنا عبداللہ بن عباسؓ فرماتے ہیں: میں نے سیدنا امیرِ معاویہؓ سے زیادہ حکومت کا اہل کوئی شخص نہ دیکھا۔

(سير أعلام النبلاء: جلد، 3 صفحہ، 151)

ترجمہ: ایک دن سیدنا معاویہؓ نے وتر کی ایک رکعت پڑھی سیدنا ابنِ عباسؓ کے غلام نے اس کا ذکر ان کے پاس کیا سیدنا عبداللہ بن عباسؓ نے ارشاد فرمایا: اس روئے زمین پر (یعنی اپنے زمانے میں) سیدنا امیرِ معاویہؓ سے بڑا عالم کوئی بھی نہیں ہے وہ ایک ہے یا پانچ یا سات یا اس سے زیادہ۔

(الطبقات الكبير: جلد، 6 صفحہ، 20 ط الخانجی)

ترجمہ: سیدنا کعب بن مالکؓ فرماتے ہیں سیدنا امیرِ معاویہؓ کے بعد اس امت میں کوئی بھی سیدنا امیرِ معاویہ رضی اللہ عنہ جیسی (عمدہ و بہترین) حکومت نہیں کر سکتا۔

35 سیدنا سعد بن ابی وقاصؓ کی نظر میں سیدنا امیرِ معاویہؓ کا رتبہ 

(سير أعلام النبلاء: جلد، 3 صفحہ، 150)

ترجمہ: سیدنا سعد بن ابی وقاصؓ فرماتے ہیں: میں نے سیدنا عثمانؓ کے بعد کسی کو بھی سیدنا امیرِ معاویہؓ سے زیادہ حق و انصاف کے مطابق فیصلہ کرنے والا نہیں دیکھا-  

(مسند أبی يعلىٰ: جلد، 3 صفحہ، 170 ت حسين أسد)

ترجمہ: راوی کہتے ہیں کہ میں رسول اللہﷺ کی خدمت میں حاضر ہوا حضورﷺ اپنے صحابہ کرام رضی اللہ عنہم کے ساتھ تشریف فرما تھے اور صحابہ کرام رضی اللہ عنہم اپنی تلواروں کے ساتھ حضور اکرمﷺ کو سایہ کیے ہوئے تھے میں نے کہا کہ تم میں محمد کون ہے؟ حضورﷺ نے اپنی ذات کی طرف اشارہ کیا میں نے خط حضورﷺ کے حوالے کر دیا حضور اکرمﷺ نے یہ خط اپنے پہلو میں بیٹھے ہوئے ایک شخص کو دے دیا۔ راوی کہتا ہے کہ میں نے پوچھا کہ یہ کون ہے صحابہ کرام رضی اللہ عنہم نے کہا کہ یہ سیدنا معاویہ بن ابی سفیانؓ ہیں پھر سیدنا امیرِ معاویہؓ نے وہ خط حضور اکرمﷺ کو پڑھ کر سنایا۔

37: سیدنا امیرِ معاویہؓ کی سخاوت 

حَدَّثَنَاهُ الدُّورِی قَالَ: ثَنَا نُوحُ بْنُ يَزِيدَ الْمُؤَدِّبُ قَالَ: ثَنَا إِبْرَاهِيمُ بْنُ سَعْدٍ، عَنْ مُحَمَّدِ بْنِ إِسْحَاقَ، عَنْ نَافِعٍ، عَنِ ابْنِ عُمَرَ قَالَ: مَا رَأَيْتُ أَحَدًا بَعْدَ رَسُولِ اللّٰهِ صلى الله عليه وسلم كَانَ ‌أَسْوَدَ مِنْ مُعَاوِيَة قَالَ: قُلْتُ: هُوَ كَانَ ‌أَسْوَدَ مِنْ أَبِی بَكْرٍ؟ قَالَ: هُوَ وَاللهِ أَخْيَرُ مِنْهُ، وَهُوَ وَاللهِ كَانَ ‌أَسْوَدَ مِنْ أَبِی بَكْرٍ "قَالَ: قُلْتُ: فَهُوَ كَانَ ‌أَسْوَدَ مِنْ عُمَرَ؟ قَالَ: عُمَرُ وَاللهِ كَانَ أَخْيَرَ مِنْهُ، وَهُوَ وَاللهِ ‌أَسْوَدُ مِنْ عُمَرَ" قَالَ: قُلْتُ: هُوَ كَانَ ‌أَسْوَدَ مِنْ عُثْمَانَ؟ قَالَ: وَاللهِ إِنْ كَانَ عُثْمَانُ لَسَيِّدًا، وَهُوَ كَانَ ‌أَسْوَدَ مِنْهُ" قَالَ الدُّورِی: قَالَ بَعْضُ أَصْحَابِنَا: قَالَ أَحْمَدُ بْنُ حَنْبَلٍ: مَعْنَى أَسْوَدًا أَی أَسْخَى سندہ صحیح 

(السنة لأبی بكر بن الخلال: جلد، 2 صفحہ، 141)

ترجمہ: حضرت عبداللہ بن عمرؓ نے ارشاد فرمایا: میں نے رسول اللہﷺ کے بعد سیدنا امیرِ معاویہؓ سے زیادہ سخی کوئی نہیں دیکھا۔ حضرت نافعؓ نے ان سے پوچھا کیا سیدنا امیرِ معاویہؓ سیدنا ابوبکر صدیقؓ سے بھی زیادہ سخی تھے سیدنا عبداللہ بن عمرؓ نے جواب دیا اگرچہ سیدنا ابوبکر صدیقؓ سیدنا امیرِ معاویہؓ سے بہت زیادہ بہتر تھے لیکن سیدنا امیرِ معاویہ رضی اللہ عنہ ان سے زیادہ سخی تھے۔ پھر راوی نے پوچھا کہ کیا سیدنا عمرؓ سے زیادہ سخی تھے۔ سیدنا عبداللہ بن عمرؓ نے جواب دیا اگرچہ سیدنا عمرؓ کا مقام سیدنا امیرِ معاویہ رضی اللہ عنہ سے بہت زیادہ بلند تھا لیکن سخاوت میں سیدنا امیرِ معاویہؓ سیدنا عمرؓ سے بھی بڑھے ہوئے تھے۔ پھر راوی نے پوچھا کہ کیا سیدنا عثمانؓ سے بھی زیادہ سخی تھے۔ تو سیدنا عبداللہ بن عمرؓ نے جواب دیا بے شک سیدنا عثمانؓ سردار تھے لیکن سیدنا امیرِ معاویہؓ سیدنا عثمانؓ سے بھی زیادہ سخی تھے۔ 

(الآحاد والمثانی لابن أبی عاصم: جلد، 1 صفحہ، 382)

ترجمہ: سیدنا عثمانؓ کے بعد مدینہ نہ رہا اور سیدنا امیرِ معاویہؓ کے بعد کشادگی نہ رہی۔

(مصنف ابن أبی شيبة: جلد، 7 صفحہ، 552 ت الحوت)

ترجمہ: سیدنا علیؓ ارشاد فرماتے ہیں ہمارے اور سیدنا معاویہؓ کے شہداء جنت میں ہیں باقی میرا اور سیدنا امیرِ معاویہؓ کا معاملہ اللہ تعالیٰ کے حوالے ہے۔

(الشريعة للآجری: جلد، 5 صفحہ، 2466)

ترجمہ: سیدنا عبداللہ بن مبارکؒ سے پوچھا گیا سیدنا امیرِ معاویہؓ کا مقام زیادہ ہے یا سیدنا عمر بن عبدالعزیزؒ کا؟ سیدنا عبداللہ بن مبارکؒ نے جواب دیا: سیدنا امیرِ معاویہؓ کے ناک میں مٹی جو حضورﷺ کی معیت میں پڑی وہ سیدنا عمر بن عبدالعزیزؒ سے کئی درجہ افضل ہے۔

 فللہ الحمد