مناظرہ موضوع چہارم خلافت خلفائے راشدینؓ - سنی شیعہ مناظرے |…

مناظرہ موضوع چہارم خلافت خلفائے راشدینؓ

  مولانا عبدالستار تونسوی

صفحہ 8 از 9

3: حضرات! حضورِ اکرمﷺ اور خلفائے راشدینؓ کے عہدِ مبارک سے صحابہ کرام رضوان اللہ علیہم اجمعین اور اہلِ بیتؓ کے وظائف مقرر تھے۔ اور تمام اہلِ بیتؓ اور اہلِ بدر و اہلِ اُحد اور اہلِ بیعتِ اولیٰ وغیرہ وغیرہ سیدنا ابوبکر صدیقؓ و سیدنا عمر فاروقؓ و سیدنا عثمان غنیؓ و سیدنا علی المرتضیٰؓ تمام خلفائے راشدینؓ کے زمانے میں اپنے وظائفِ مقررہ لیتے رہے یہاں تک کہ سیدنا حسنؓ و سیدنا حسینؓ، سیدنا عبداللہ بن جعفر طیارؓ سیدنا امیرِ معاویہؓ سے بھی عطایا و وظائف لیتے رہے جو ہر ماہ کی پہلی تاریخ کو ان کو مل جاتے تھے۔ 

جیسا کہ خود شیعہ کی معتبر کتاب جلاء العیون کے صفحہ 115 پر ہے:  

از حضرت صادق علیہ السلام روایت کرده است که روزی حضرت امام حسن با حضرت امام حسین و عبدالله بن جعفر فرمود که جائزه هاے معاویہ در روز اول ماه بشما خواهد رسید. چون روز اول ماه شد چنانکہ فرموده بود اموال معاویہ رسید. جناب امام حسن قرض بسیاری داشت از آنچہ او فرستاده بود برائے آن حضرت، قرض هاے خود را ادا کرد و باقی را میان اهل بیت و شیعیان خود قسمت نمود. و جناب امام حسین قرض خود را ادا کرد و آنچہ ماند بسہ قسمت کرد یک حصہ را با اهل بیت و شیعیان خود داد و دو حصہ را براے عیال خود فرستاد۔

ترجمہ: سیدنا جعفر صادقؒ سے روایت کی گئی ہے کہ ایک روز سیدنا حسنؓ نے سیدنا حسینؓ اور سیدنا عبداللہ بن جعفرؓ کو فرمایا کہ سیدنا امیرِ معاویہؓ کا مقرر کردہ عطیہ و وظیفہ تمہارے پاس مہینے کی پہلی تاریخ کو پہنچے گا جب مہینے کی پہلی تاریخ آئی جس طرح کہ سیدنا حسنؓ نے فرمایا تھا، سیدنا امیرِ معاویہؓ کا مال پہنچا سیدنا حسنؓ پر بہت قرضے تھے جو کچھ سیدنا امیرِ معاویہؓ نے حضرت کے لیے بھیجا تھا، اس میں سے قرضے ادا کیے اور باقی ماندہ مال اپنے اہلِ بیتؓ اور اپنے شیعوں میں بانٹ دیا۔ اور سیدنا حسینؓ نے بھی اپنے قرضے ادا کیے اور جو باقی بچا اس کو تین حصہ کیا ایک تہائی حصہ اہلِ بیتؓ اور اپنے شیعوں کو دیا اور دو تہائی حصہ اپنے گھر والوں اہل و عیال کے واسطے بھیجا۔

نیز اسی جلاء العیون کے صفحہ 216 پر ہے کہ یزید نے سیدنا زین العابدینؓ کو دو سو دینار سنہری دیے تو حضرت نے یزید سے لے لیے: 

دو صد دینار طلا بآن حضرت داد، حضرت آن زر را گرفت۔ 

ترجمہ: دو سو سنہری دینار یزید نے سیدنا زین العابدینؓ کو دیے اور امام نے وہ زر لے لیا۔

حضرات! غور کیجیے۔ خود ان روایاتِ شیعہ سے بھی ثابت ہے کہ سیدنا حسنؓ اور سیدنا حسینؓ نے سیدنا امیرِ معاویہؓ سے بے اندازہ مال لے کر اپنے اہل و عیال اور شیعوں پر خرچ فرمایا۔ اور اسی طرح سیدنا زین العابدینؓ نے یزید سے دو سو دینار لے کر خرچ کیے۔ پس اگر انہی وظائفِ مقررہ سابقہ میں سیدنا عبداللہ بن عمرؓ نے سیدنا امیرِ معاویہؓ سے کچھ مال لیا تو کون سا جرم کیا؟ اگر یہ جرم ہے تو اس میں اہلِ بیتؓ کے ائمہ بھی شریک ہیں۔ نعوذ باللہ۔

باقی رہا شیعہ مناظر کا سیدنا عبداللہ بن عمرؓ پر یہ الزام کہ انہوں نے یزید سے ایک لاکھ درہم لیے، سراسر بہتان ہے۔ کتاب فتح الباری 555 میں تو سیدنا امیرِ معاویہؓ سے لینا مذکور ہے لیکن مناظرِ شیعہ یزید کا نام لے رہے ہیں، یہ غلط ہے۔ باقی اگر کسی سے مال لینے سے اس کا مان لینا آتا ہے تو شیعہ کتب میں ابھی ثابت کر چکا ہوں کہ سیدنا حسنؓ اور سیدنا حسینؓ نے سیدنا امیرِ معاویہؓ سے اور سیدنا زین العابدینؓ نے یزید سے مال لیا۔ پھر اس سے تو سیدنا امیرِ معاویہؓ اور یزید کا شیعوں کا ہونا ثابت ہوتا ہے۔

حضرات! مولوی اسماعیل اصحابِ ثلاثہؓ کی خلافتِ راشدہ کے دلائل سے لاجواب و مبہوت ہو کر اب یزید کو اہلِ سنت کا امام بنانے اور بتانے لگا ہے۔ گویا کہ مولوی اسماعیل اصحابِ ثلاثہؓ کی خلافتِ راشدہ کو حق مان چکا ہے۔ اور کیوں نہ مانتا جب کہ امیر المومنین سیدنا علی المرتضیٰؓ کا فرمان شرح نہج البلاغہ ابن میثم بحرانی کے صفحہ 31 پر مرقوم ہے:  

القمری ان مکانھما فی الاسلام لعظیم وان المصاب بھا لجرح فی الاسلام لشدید یرحمھما اللّٰہ وجزا جما باحسن ما عملا۔  

ترجمہ: اور قسم مجھے اپنی جان کی کہ تحقیق ان دونوں سیدنا ابوبکر صدیقؓ و سیدنا عمر فاروقؓ کا مقام اسلام میں بڑا ہے اور ان کی وفات سے اسلام کو سخت زخم پہنچا۔ اللہ ان دونوں پر رحمت نازل کرے اور ان کو ان کے بہترین کاموں کا بدلہ دے۔

مولوی اسماعیل صاحب! حسب فرمان سیدنا علی المرتضیٰؓ حضرات خلفائے ثلاثہؓ کو مان لیں اور یزید کے متعلق یہ خوف نہ کھائیں کہ یہ اہلِ سنت کا امام و پیشوا ہے۔ یہ ہماری کتابوں میں لکھا ہے۔ دیکھیے اہلِ سنت کی عقائد کی کتاب شرح عقائد نسفی کے صفحہ 553 پر لکھا ہے:  

واتفقوا  علٰی جواز اللعن علٰی من قتلہ اوامر  به واجازہ ورضی بہ

ترجمہ: اور ہمارے علماء ان لوگوں پر لعنت کہنے کے جواز پر متفق ہیں جنہوں نے سیدنا حسینؓ کو قتل کیا یا سیدنا حسینؓ کے قتل کا حکم دیا، یا سیدنا حسینؓ کے قتل کی اجازت دی اور ان کے قتل پر راضی و خوش ہوئے۔

اور اس کے بعد اسی شرح عقائد نسفی کے صفحہ 554 پر ہے:  

لعنتہ اللّٰہ علیہ وعلٰی  اعوانہ وانصار ہ

ترجمہ: اللہ تعالیٰ کی لعنت ہو یزید پر اور اس کے معاونین اور مددگاروں پر جنہوں نے سیدنا حسینؓ کو شہید کرنے میں اس کی امداد کی۔

دیکھیے مولوی اسماعیل صاحب! اگر یزید اہلِ سنت کا امام ہوتا تو ہم اس کے متعلق یوں کیوں لکھتے؟ جہاں اہلِ سنت کی کسی کتاب میں یزید کے متعلق کچھ لکھا ہوا ہے وہاں اس کے بادشاہِ وقت ہونے کے متعلق لکھا ہوا ہے۔ یہ کہیں نہیں ہے کہ یزید اہلِ سنت کا امام و پیشوا اور مقتدا تھا۔ اگر خدا ایک بار یزید پر لعنت کرے تو ہم اہلِ سنت اس پر لاکھ بار لعنت کریں گے۔

مولوی اسماعیل صاحب! آپ اپنے شیعہ مذہب کا فکر کیجیے اور آئیے ہم شیعہ مذہب کی کتابوں سے پوچھیں کہ یزید کس کا امام ہے؟ دیکھیے فروعِ کافی کتاب الروضہ صفحہ 110 پر ہے کہ سیدنا زین العابدینؓ نے یزید سے کہا:  

قد اقررت   لك بما سئلت ذنا عبد مکرہ لك۔  

ترجمہ: تحقیق میں تیری ہر اس بات کو مانتا ہوں جو تو چاہے اور سوال کرے۔ میں تو تیرا مجبور و ماتحت غلام ہوں۔

صفحہ 8 از 9