ائمہ سلف و خلف اور تمام اہلِ سنت والجماعت کا اس عقیدہ پر اجماع چلا آ رہا ہے کہ تمام صحابہ کرام رضی اللہ عنہم بغیر کسی استثناء کے عادل اور واجب التعظیم و الاحترام ہیں، ان کی روایت بلا چون و چرا قابلِ قبول اور واجب التسلیم ہے، ان میں سے کسی پر بھی طعن کرنا جائز نہیں۔ ان کے آپس کے مشاجرات کی بحث سے رکنا چاہیے۔ ہاں! ان کے دامن کی صفائی بیان کرنے کے ذکر میں کوئی مضائقہ نہیں، جبکہ نیت صحیح ہو۔ ان کی اجتہادی خطاؤوں کی صحیح تاویلیں ہیں۔

نیز یہ کہ اس پر بھی وہ ماجور ہوں گے، کیونکہ حدیثِ نبویﷺ میں آیا ہے کہ جب مجتہد اجتہاد کرے، اگر اجتہاد صحیح نکلے تو اس کو دو اجر ملیں گے اور اگر غلط ہو جائے تو اس کو ایک اجر ملے گا۔ 

(صحیح بخاری و صحیح مسلم) 

صحابہ کرام رضی اللہ عنہم میں سے حضرت علی المرتضیٰؓ حضرت عبداللہ بن عمرؓ اور حضرت براء بن عازبؓ کے صراحتاً اور بقیہ صحابہ کرام رضی اللہ عنہم کے احادیثِ نبویہ کے ضمن میں کئی ارشادات منقول ہیں، اس باب کا افتتاح ہم سیدنا حضرت عبداللہ بن مسعود رضی اللہ عنہ المتوفیٰ 33ھ کے اس سنہری فرمان سے کرتے ہیں:

(رواہ رزین بحوالہ مشکوٰۃ: صفحہ، 32)

ترجمہ: حضرت عبداللہ بن مسعودؓ فرماتے ہیں کہ جو شخص سنت کا اتباع کرنا چاہے تو اسے چاہیے کہ فوت شدہ بزرگانِ دین کے نقشِ قدم پر چلے، اس لیے کہ زندہ پر فتنہ کا اندیشہ رہتا ہے۔ ایسے بزرگانِ دین حضرت محمدﷺ کے صحابہ کرام رضی اللہ عنہم ہی ہیں جو سب امت سے افضل، سب امت سے زیادہ پاکیزہ دلوں والے سب امت سے بڑھ کر گہرے اور ٹھوس علم والے اور سب سے کم تکلف والے تھے، اللہ تعالیٰ نے ان کو اپنے نبی کریمﷺ کی صحبت کے لیے اور دین کی اقامت اور سربلندی کے لیے چن لیا۔ ان کی فضیلت کو پہچانو، ان کے نقشِ قدم کی پیروی کرو اور ان کے اخلاق اور سیرت کو حتیٰ الوسع اپنانے کی کوشش کرو کہ وہ سیدھی راہ پر گامزن تھے۔

اب حضرات ائمہ اربعہ متبوعینؒ کے اقوال ملاحظہ ہوں:

امام اعظم نعمان بن ثابت ابوحنیفہؒ المتوفیٰ (150ھ) قرآن و سنت کے بعد بلا استثناء صحابہ کرام رضی اللہ عنہم کے اقوال کو دین میں حجت سمجھتے تھے۔ کسی مسئلہ میں اگر کسی صحابی رضی اللہ عنہ سے کچھ مروی ہوتا تو اپنا اجتہاد و رائے چھوڑ دیتے تھے۔

(تہذیب التہذی:، جلد، 1 صفحہ، 450 و مناقب ابی حنیفہؒ للذہبی)

ترجمہ: میں پہلے کتاب اللہ سے استدلال کرتا ہوں اگر اس میں مجھے دلیل نہ ملے تو رسول اللہﷺ کی سنت کو لیتا ہوں اور اگر اس میں بھی مجھے دلیل نہ ملے تو میں حسبِ مرضی صحابہ کرام رضی اللہ عنہم کے اقوال سے استدلال کرتا ہوں اور ان کا قول چھوڑ کر دوسروں کے قول کی طرف نہیں جاتا۔

سنن الکبرٰی للبیہقی میں امام شافعیؒ المتوفی (204ھ) سے منقول ہے:

امام شافعیؒ فرماتے ہیں کہ کسی مسئلہ میں جب تک قرآن و سنت میں دلیل موجود ہو تو اس کا علم رکھنے والے کو قرآن و سنت کی اتباع کے بغیر چارہ نہیں اور اگر قرآن و سنت میں دلیل نہ ہ وتو ہم صحابہ کرام رضی اللہ عنہم کے سب اقوال کی طرف یا ان میں سے کسی ایک کے قول کی طرف رجوع کریں گے۔

(کچھ آگے فرماتے ہیں) جب ائمہ (خلفاء راشدینؓ) سے کچھ ثبوت نہ ملے تو رسول اللہﷺ کے دیگر صحابہ کرام رضی اللہ عنہم دین کے امین ہیں، ہم ان کے اقوال لیں گے اور صحابہ کرام رضی اللہ عنہم کی اتباع دوسروں کی اتباع کی بہ نسبت ہمیں زیادہ مناسب ہے۔ 

(ازالۃ الخفا: جلد، 1 صفحہ، 64 فصل دوم لوازم خلافت خاصہ)

حنفیہؒ کی اصول سرخسی جلد، 2 صفحہ، 106 پر امام مالکؒ المتوفی (176ھ) کا بھی یہی مذہب بتایا ہے۔ امام مالکؒ کو صحابہ کرام رضی اللہ عنہم کی تکریم کا خاص اہتمام تھا، چنانچہ قاضی عیاض اور ملا علی قاریؒ شرح شفا میں فرماتے ہیں:

امام مالکؒ فرماتے ہیں جس نے رسول اللہﷺ کے صحابہ کرام رضی اللہ عنہم میں سے کسی کو برا بھلا کہا خواہ سیدنا ابوبکر، سیدنا عمر، سیدنا عثمان، سیدنا علی رضی اللہ عنہم ہوں یا حضرت امیرِ معاویہؓ اور حضرت عمرو بن العاصؓ ہوں اگر یوں کہا کہ وہ کافر اور گمراہ تھے تو یہ واجب القتل ہے اور اگر عام لوگوں جیسی گالی دے تو اسے سخت سزا دی جائے۔ 

(شرح شفاء لملا علی قاری: جلد، 2 صفحہ، 556)

الصارم المسلول علی شاتم الرسول، صفحہ، 573 پر علامہ ابنِ تیمیہؒ امام احمد بن حنبلؒ المتوفی (241ھ) سے نقل فرماتے ہیں:

ترجمہ: حضور اکرمﷺ کے بعد سب سے افضل حضرت ابوبکر صدیقؓ ہیں، سیدنا ابوبکر صدیقؓ کے بعد حضرت عمرؓ ہیں، سیدنا عمرؓ کے بعد حضرت عثمان غنیؓ ہیں، سیدنا عثمان غنیؓ کے بعد سیدنا علیؓ ہیں۔ (رضی اللہ عنہم)

(آخری قول میں) ایک جماعت نے توقف کیا ہے یہ ہدایت یافتہ خلفاء راشدینؓ تھے پھر چار حضرات کے بعد سب صحابہ کرام رضی اللہ عنہم سب سے افضل ہیں کسی کو جائز نہیں کہ ان کی برائی کرے، کسی میں کوئی عیب اور نقص کی وجہ سے اعتراض نہ کرے جس نے ایسا کیا اسے سزا دینی واجب ہے۔

یہ تصریحات عدالتِ صحابہ کرام رضی اللہ عنہم کو متضمن اور مستلزم ہیں کما لا یخفی۔

محدثین کرام رحمہم اللہ کی شہادت

(الاصابہ لحافظ بن حجر: جلد، 1 صفحہ، 13)

ترجمہ: عبداللہ بن ہاشم طوسی کہتے ہیں کہ ہم سے وکیع بن الجراح نے سفیان ثوریؒ سے یہ نقل کیا ہے کہ اس آیت کا مصداق حضرت محمدﷺ کے صحابہ کرام رضی اللہ عنہم ہیں۔ آپ کہیے سب تعریفیں اللہ ہی کے لیے ہیں اور اللہ کے ان بندوں پر سلامتی ہو جن کو اس نے پسند کر لیا ہے۔

سہل بن عبداللہ تستریؒ المتوفی کہتے ہیں جو علم و زہد اور جلالتِ شان میں مشہور ہیں کہ جس نے حضور اقدسﷺ کے صحابہ کرام رضی اللہ عنہم کی تعظیم نہیں کی وہ صحیح طور پر حضور اکرمﷺ پر ایمان نہیں لایا۔  

(رسالہ تائید مذہب اہلِ سنت: صفحہ، 52 از مجدد الف ثانیؒ)

(جامع الاصول من احادیث الرسول: جلد، 1 صفحہ، 73)

ترجمہ: سب صحابہ کرام رضی اللہ عنہم عادل ہیں، کیونکہ اللہ تعالیٰ اور اس کے رسول کریمﷺ نے ان کی تعدیل کر دی ہے ان کی عدالت کے متعلق بحث کرنے کی حاجت نہیں اسی اعتقاد پر مسلمانوں کے سربرآوردہ ائمہ کرامؓ اور متقدمین متاخرین علماء کرام چلے آ رہے ہیں۔

(شرح مسلم: جلد، 2 صفحہ، 272)

ترجمہ: اس لیے اہلِ حق جماعت اور جن کا اجماع معتبر ہے صحاہۂ کرام رضی اللہ عنہم کی مروی احادیث کی قبولیت ان کی شہادت کی صداقت اور کامل عدالت پر متفق ہیں اللہ تعالیٰ ان سب سے راضی ہو چکا۔

حافظ ابوعمرو یوسف بن عبداللہ المعروف بابنِ عبدالبرؒ المتوفی (463ھ) الاستیعاب فی معرفتہ الاصحاب کے آغاز میں لکھتے ہیں:

سنن نبویہ کی حفاظت اور معین اسباب میں سے ان حضرات کی معرفت بھی ہے جنھوں نے سنن نبویہ (علی حبہا الصلوٰۃ والتسلیم) کو اپنے نبی سے نقل کر کے سب لوگوں تک پہنچایا اور اس کی کما حقہ حفاظت اور تبلیغ کی ہے۔ وہ لوگ آپﷺ کے صحابہ کرام رضی اللہ عنہم اور حواری ہیں کہ انھوں نے سنت کو محفوظ کیا اور اسلام و مسلمانوں کی خیرخواہی سمجھ کر اس فریضہ کو ادا کیا حتیٰ کہ ان کی نقل اور روایت سے دین مکمل ہو گیا اور اللہ تعالیٰ کی حجت مسلمانوں پر ثابت ہو گئی۔ یہی لوگ سب سے افضل اور سب امت سے بہتر تھے جو لوگوں کی تبلیغ کے لیے بھیجی گئی۔ ان تمام کی عدالت ثابت ہے، کیونکہ اللہ تعالیٰ اور اس کے رسول اکرمﷺ نے ان کی تعریف بیان کی ہے ان لوگوں سے بڑھ کر کوئی عادل نہیں ہو سکتا جن کو اللہ نے اپنے نبی کریمﷺ کی صحبت اور مدد کے لیے چن لیا۔ اس سے بڑھ کر نہ کوئی تزکیہ کا مقام ہو سکتا ہے اور نہ ثبوتِ عدالت اس سے اکمل طریقے سے ہو سکتی ہے۔ اللہ تعالیٰ فرماتے ہیں:

مُحَمَّدٌ رَّسُوۡلُ اللّٰهِ‌ ۞ الخ (سورۃ الفتح: آیت 29)

آگے اسی کتاب کے صفحہ، 9 پر لکھتے ہیں۔

ترجمہ: اگرچہ سب صحابہ کرام رضی اللہ عنہم کے بارے میں ہم کافی بحث کر چکے ہیں، کیونکہ اہلِ حق مسلمانوں کا جو اہلِ سنت والجماعت ہی ہیں اس پر اجماع ہے کہ سب صحابہ کرام رضی اللہ عنہم عدول ہیں۔

وقال أبو محمد ابنِ حزمؒ الصحابۃ کلھم من أھل الجنۃ قطعا قال اللّٰہ تعالیٰ لَا يَسۡتَوِىۡ مِنۡكُمۡ مَّنۡ اَنۡفَقَ مِنۡ قَبۡلِ الۡفَتۡحِ وَقَاتَلَ‌۞ الآیۃ (سورۃ الحديد: آیت 10) وقال تعالیٰ اِنَّ الَّذِيۡنَ سَبَقَتۡ لَهُمۡ مِّنَّا الۡحُسۡنٰٓى اُولٰٓئِكَ عَنۡهَا مُبۡعَدُوۡنَ ۞ (سورۃ الأنبياء: آیت 101)

 فثبت أن الجمیع لأھل الجنۃ لأنھم یخاطبون بالآیۃ السابقۃ۔

ترجمہ: علامہ ابو محمد حافظ بن حزمؒ کہتے ہیں کہ سب صحابۂ کرامؓ اہل جنت ہیں۔ اللہ تعالیٰ فرماتے ہیں تم میں سے جنہوں نے (مکہ کی) فتح سے پہلے خرچ کیا، اور لڑائی لڑی، وہ (بعد والوں کے) برابر نہیں ہیں۔ الآیہ۔ نیز اللہ تعالیٰ فرماتے ہیں: (البتہ) جن لوگوں کے لیے ہماری طرف سے بھلائی پہلے سے لکھی جا چکی ہے، (یعنی نیک مومن) ان کو اس جہنم سے دور رکھا جائے گا۔ پس ثابت ہوا کہ تمام صحابہ کرام رضی اللہ عنہم اہلِ جنت میں سے ہیں، اس لیے کہ آیتِ سابقہ میں وہی (فتح مکہ سے قبل اور بعد والے مومن) مخاطب ہیں۔

اور یہ سوال کیا جائے کہ آیتِ مذکورہ میں انفاق اور قتال کی قید اور ایسے ہی احسان کی قید ہے کہ جو صحابی رضی اللہ عنہ ان صفات سے موصوف نہ ہو یہ آیت اسے شامل نہ ہو، حالانکہ صحابہ کرام رضی اللہ عنہم کے عادل ہونے کے لیے یہ صریح آیتیں ہیں اسی لیے تو مازری نے شرح برہان میں لکھا ہے کہ الصحابۃ عدول سے ہر وہ صحابی رضی اللہ عنہ مراد نہیں جسے ایک دن یا کبھی ایک ساعت آپﷺ کی زیارت نصیب ہوئی یا کسی اور غرض سے آپﷺ کی خدمت میں آیا اور چلا گیا ہو، بلکہ اس سے وہ صحابہ کرام رضی اللہ عنہم مراد ہیں جو کافی عرصہ آپﷺ کی خدمت میں رہے آپﷺ کی توقیر اور نصرت کی اور آپﷺ پر نازل شدہ نور کی پیروی کی تو علامہ ابنِ حزمؒ اس کا جواب یہ دیتے ہیں۔

ترجمہ: اس کا جواب یہ ہے کہ مذکورہ قیدیں تغلیبی طور پر لگائی گئی ہیں کہ اکثر صحابہ کرام رضی اللہ عنہم انفاق اور قتال کرتے تھے) ورنہ انفاق و قتال سے مراد عام ہے۔ بالفعل کیا ہو یا بالقوۃ کرنے کی طاقت رکھتے ہوں۔

کہ مازری کے اس قول کی کسی نے موافقت نہیں کی، بلکہ محققین اور فضلاء کی ایک جماعت نے اس پر طعن کیا ہے، شیخ صلاح الدین علائیؒ کہتے ہیں کہ مازری کا یہ قول نادر ہے اس کا تقاضا یہ ہے کہ بہت سے صحابہ کرام رضی اللہ عنہم جو صحابیت اور روایت میں مشہور ہیں ان کو عادل نہ کہا جائے، جیسے سیدنا وائل بن حجر مالک بن الحویرثؓ اور سیدنا عثمان بن ابی العاصؓ وغیرہم جو آپﷺ کی خدمت میں وفد کی صورت میں حاضر ہوئے تھے اور تھوڑی دیر ٹھہر کر چلے گئے تھے اور اسی طرح اس قول سے وہ صحابہ کرام رضی اللہ عنہم بھی عادل نہ ہوں گے جن کی روایتِ حدیث صرف ایک ہے یا آپﷺ کی خدمت میں ان کی مقدارِ صحبت معلوم نہیں جیسے عرب کے قبائل وغیرہ۔

(الاصابہ: جلد، 1 صفحہ، 11)

ترجمہ: تمام صحابہ کرام رضی اللہ عنہم کو عادل کہنے کی ہی جمہور علماء امت نے تصریح کی ہے اور یہی معتبر مسلک ہے۔

خطیب بغدادیؒ الکفایہ فی علوم الروایت میں عدالتِ صحابہ کرام رضی اللہ عنہم پر آیاتِ قرآنیہ اور احادیثِ نبویہ پیش کرنے کے بعد لکھتے ہیں:

عدالتِ صحابہ کرام رضی اللہ عنہم کے موضوع پر احادیث بہت کثرت سے مروی ہیں ان تمام کا تقاضا یہ ہے کہ صحابہ کرام رضی اللہ عنہم (منافی عدالتِ امور سے) طاہر ہوں اور قطعاً عادل اور برائیوں سے منزہ ہوں۔ اللہ تعالیٰ کی ان کی عدالت پر شہادت کے بعد۔ جو ان کے باطن سے واقف ہے۔ کوئی صحابی رضی اللہ عنہ ثبوتِ عدالت میں کسی مخلوق کی تعدیل کا محتاج نہیں اور وہ اسی وصفت پر سمجھے جائیں گے تاآنکہ کسی سے ایسے جرم کا ثبوت ہو جائے جو نافرمانی کے قصد ہی سے بلا احتمالِ غیر ہو سکتا ہو اور تاویل کی کوئی گنجائش نہ رہے تو عدالت کی نفی تسلیم کی جائے گی، مگر اللہ تعالیٰ نے ان کو ایسے جرم کے ارتکاب سے بری اور ان کی شان کو اس سے برتر بنایا ہے۔ علاوہ ازیں بالفرض خدا اور رسول اللہﷺ کی جانب سے ان کی مذکورہ ثناء و تعدیل نہ بھی ہوتی تو بھی ان کی مندرجہ ذیل سیرت ان کے قطعی عادل اور گناہوں سے صاف ہونے پر قوی شہادت تھی۔ مثلاً ہجرت، جہاد فی سبیل اللہ، نصرت رسول اپنی جان و اموال کی قربانی، اپنے آبا و اجداد کو اور اولاد کو قتل کرنا، دین کی خیرخواہی اور ایمان میں قوت اور پختگی وغیرہ۔

خلاصہ کلام یہ کہ ان کے بعد آنے والوں میں جن جن کا تزکیہ اور شہادتِ عدالت دی جائے گی ان سب سے وہ افضل ہیں۔ یہی مذہب تمام علماء امت اور قابلِ اعتماد فقہاء کا ہے۔

صحابہ کرام رضی اللہ عنہم سب امور میں عام رواۃ کی صفات (حفظ اتقان وغیرہ) میں شریک ہیں، مگر جرح تعدیل میں نہیں، کیونکہ وہ سب کے سب عادل ہی ہیں ان پر جرح کی کوئی سبیل نہیں، کیونکہ اللہ تعالیٰ اور اس کے رسولﷺ نے ان کو پاک صاف اور عادل قرار دیا ہے اور یہ مشہور چیز ہے جس کے ذکر کی حاجت نہیں۔

ترجمہ: میں کہتا ہوں سب صحابہ کرام رضی اللہ عنہم عادل اللہ تعالیٰ کے دوست اس کے برگزیدہ بندے اور انبیاء کرام علیہم السلام اور رسول اللہﷺ کے بعد اس کی سب مخلوقات سے افضل ہیں یہی اہلِ سنت والجماعت کا مذہب ہے اور اس پر اس امت کے ائمہ کی ایک بڑی جماعت کا اعتقاد ہے۔ 

(تفسیر قرطبی: جلد، 16 صفحہ، 299)

(تقریب مع شرح تدریب الراوی: صفحہ، 400)

ترجمہ: سب صحابہ کرام رضی اللہ عنہم عادل ہیں فتنہ سے دوچار ہونے والے بھی اور دوسرے بھی اس پر معتمد ترین علماء کا اجماع ہے۔ معتزلہ کہتے ہیں کہ حضرت علیؓ سے لڑنے والوں کے سوا سب عدول ہیں ایک قول یہ ہے کہ جب صحابیؓ تنہا روایت کرے (تو عادل شمار نہ ہو گا) ایک قول یہ بھی ہے کہ آپس میں لڑائی کرنے والے عادل نہیں۔ یہ سب اقوال درست نہیں، تاکہ صحابیؓ سے حسنِ ظنی باقی رہے اور ان مشاجرات کو اس خطِ اجتہادی پر محمول کیا جائے جس میں ہر ایک کو اجر و ثواب ملے گا۔

ترجمہ: سب صحابہ کرام رضی اللہ عنہم عادل ہیں خواہ فتنہ میں شریک ہوئے ہوں یا نہ اور یہ وہ عقیدہ ہے جس میں کسی ایسے مسلمان کو اشتباہ نہیں جن پر مسلمانوں کی قیادت ختم ہے اور انہی سے شرعی دلائل اور آراء منقول ہوتی ہیں۔

ترجمہ: (دوسرا فائدہ) سب صحابہ کرام رضی اللہ عنہم کی ایک خصوصیت ہے وہ یہ کہ کسی کی عدالت کے متعلق (باز پرس کا) سوال پیدا نہیں ہوتا، بلکہ یہ مسئلہ طے شدہ ہے کیونکہ وہ مطلق کتاب و سنت کی نصوص اور تصریحات اور امت کے قابلِ اعتماد علماء کے اجماع سے عادل ہیں۔

تمام صحابہ کرام رضی اللہ عنہم کی عدالت پر سب امت متفق ہے اورجو فتنہ میں مبتلا ہوئے اجماع میں قابلِ اعتماد علماء کے اجماع سے وہ بھی عادل ہیں ان پر حسنِ ظنی رکھتے ہوئے اور جو کچھ ان کے لیے فضائل منقول ہیں ان پ رنظر رکھتے ہوئے یہ عقیدہ ضروری ہے گویا اللہ تعالیٰ نے ان کی عدالت پر اجماع قائم کرا دیا، کیونکہ وہ شریعت کے نقل کرنے والے ہیں۔ 

(علوم الحدیث: صفحہ، 265)

(کما فی باعث المحیثث: صفحہ، 205)

ترجمہ: صحابہ کرام رضی اللہ عنہم کے لیے ایک بڑا شرف ہے۔ جو صحابیؓ کو خاص امتیاز بخشتا ہے وہ یہ ہے کہ جمیع صحابہ کرام رضی اللہ عنہم قابلِ اعتماد علماء اہلِ سنت کے نزدیک عادل ہیں خواہ فتنہ سے دوچار ہوئے ہوں یا نہ۔

(توضیح الافکار: جلد، 2 صفحہ، 234)

ترجمہ: معرفتہ الصحابہ کے باب کے اہم مسائل میں سے یہ مسئلہ بھی ہے کہ ظاہراً تمام صحابہ کرام رضی اللہ عنہم کی عدالت کا اعتقاد رکھا جائے۔ جاننا چاہیے کہ حافظ ابنِ حجرؒ نے اصابہ کے شروع میں تمام صحابہ کرام رضی اللہ عنہم کی عدالت پر (آیاتِ قرآنیہ سے) استدلال کیا ہے، تمام اہلِ سنت اس عقیدہ پر متفق ہیں کہ تمام صحابہ کرام رضی اللہ عنہم عادل ہیں اور اس میں اہلِ سنت سے اختلاف صرف اہلِ بدعت کے چند افراد نے کیا ہے۔

ترجمہ: تمام اہلِ سنت والجماعت کا اجماع ہے کہ سب صحابہ کرام رضی اللہ عنہم عادل ہیں۔

علماء اصولِ فقہ کی شہادت:

ترجمہ: سب صحابہ کرام رضی اللہ عنہم عدول ہیں۔

ترجمہ: اکثر امت کا مذہب ہے کہ صحابہ کرام رضی اللہ عنہم میں عدالت اصل ہے۔

ترجمہ: امت کی اکثریت عدالتِ صحابہ کرام رضی اللہ عنہم کی قائل ہے میں کہتا ہوں کہ اکثر لوگوں کا مذہب یہ ہے کہ سب صحابہ کرام رضی اللہ عنہم عادل ہیں۔

یہاں الاکثر اور اکثر الناس سے مراد جمیع امت کی اکثریت ہے اہلِ سنت کی اکثریت مراد نہیں کیونکہ اہلِ سنت تو سب کے سب عدالتِ جمیع صحابہ کرام رضی اللہ عنہم کے قائل ہیں۔

ترجمہ: صحابۂ کرام رضی اللہ عنہم کی عدالت قطعی ہے خصوصاً اصحابِ بدر اور بیعتِ رضوان والوں کی قطعی کیوں نہ ہو، جب کہ اللہ تعالیٰ نے قرآن کریم میں بہت سے مقامات پر ان کی تعریف اور رسول اللہﷺ نے کئی مرتبہ ان کے فضائل بیان فرمائے ہیں۔

جاننا چاہیے کہ ان تمام صحابہ کرام رضی اللہ عنہم کی عدالت قطعی ہے جو جنگِ بدر اور بیعتِ رضوان میں شریک رہے۔ کسی مومن کے لائق نہیں کہ ان کی عدالت میں شک کرے، بلکہ جو لوگ فتحِ مکہ سے قبل ایمان لائے وہ بھی قطعی عادل اور مہاجرین رضی اللہ عنہم و انصار رضی اللہ عنہم میں داخل ہیں۔ البتہ فتح مکہ کے دن اسلام لانے والوں میں اشتباہ ہے، کیونکہ کچھ ان میں مؤلفۃ القلوب (جن کو مال دے کر اسلام کی طرف مائل کیا گیا) ہیں اور انہی کے بارے میں اختلاف ہے ہمارے ذمے واجب ہے کہ ان کا ذکر بھلائی ہی سے کریں، خوب سمجھ لو۔

لیکن ہم پہلے ثابت کر چکے ہیں کہ فتح مکہ کے دن اسلام قبول کرنے والوں کا معاملہ متوقف اور مشتبہ ہونا صحیح نہیں ہے کیونکہ سورة حدید کی آیت کریمہ لَا يَسۡتَوِىۡ مِنۡكُمۡ مَّنۡ اَنۡفَقَ ۞ الخ (سورۃ الحديد: آیت 10) قطعیت سے ان کے جنتی ہونے پر دلالت کرتی ہے اور مؤلفۃ القلوب بھی کامل الایمان تھے۔

اولاً: اس لیے کہا اگر ان کو مذبذب یا مشکوک الایمان سمجھا جائے تو وہ زکوٰۃ کا مصرف کیسے ہو سکتے ہیں، جب کہ مصارفِ زکوٰۃ کے لیے مسلم ہونا شرط ہے۔

ثانیاً: اس لیے کہ تالیفِ قلوب کے اس طرز نے ان کو مزید پختہ اور اسلام کا وفادار بنا ہی دیا ورنہ تالیفِ قلوب کی مشروعیت اور اس پر عمل درآمد کا کوئی فائدہ نہیں۔ (فعل الحکیم لا یخلو عن الحکمۃ)

اب علماء متکلمین و عقائد کے چند حوالہ جات ملاحظہ ہوں۔

ترجمہ: علاوہ ان دلائل کے علامہ ابنِ عبدالبرؒ نے اہلِ حق مسلمانوں کا جو اہلِ سنت والجماعت ہی ہیں۔ اس عقیدہ پر اجماع نقل کیا ہے کہ سب صحابہ کرام رضی اللہ عنہم عادل ہیں۔

ترجمہ: علامہ سبکیؒ المتوفی (771ھ) کہتے ہیں کہ فیصلہ کن بات یہ ہے کہ ہم صحابہ کرام رضی اللہ عنہم کی عدالت کے قطعیت کے ساتھ قائل ہیں اور بکواسیوں کی بکواس اور باطل پرستوں کی گمراہی کی طرف ذرہ توجہ نہیں کرتے۔ ہم پہلے بیان کر چکے ہیں کہ ہمارے جیسے ایک آدمی کے تزکیہ کرنے سے راوی عادل سمجھا جاتا ہے پس وہ لوگ کیسے عادل نہ ہوں جن کا تزکیہ اس علام الغیوب نے کئی آیات میں کیا ہے جس کے علم سے ذرہ برابر کوئی چیز زمین یا آسمان میں مخفی نہیں۔

ترجمہ: اسی لیے جمہور علماء کا یہی مذہب ہے کہ سب صحابہ کرام رضی اللہ عنہم عادل ہیں حضرت علی و حضرت عثمان (رضی اللہ عنہما) کے فتنہ سے پہلے والے بھی اور اسی طرح بعد والے بھی اور نیز اس لیے بھی کہ حضور اکرمﷺ نے فرمایا ہے میرے ساتھی ستاروں کی مثل ہیں جس کی بھی پیروی کرو گے ہدایت پاؤ گے۔

ترجمہ: تمام اہلِ سنت والجماعت کا عقیدہ ہے کہ سب صحابہ کرام رضی اللہ عنہم یقینی طور پر تزکیہ شدہ اور عادل ہیں ان کی بدگوئی سے رکنا واجب ہے۔ ان کی تعریف کرنی ضروری، جیسے اللہ سبحانہ تعالیٰ نے ان کی تعریف فرمائی ہے۔

معلوم ہونا چاہیے کہ جس مسئلہ پر اہلِ سنت والجماعت کا اجماع ہے وہ یہ ہے کہ ہر مسلم پر واجب ہے کہ تمام صحابہ کرام رضی اللہ عنہم کا تزکیہ (اور احترام) یوں کرے کہ ان کے لیے عدالت کا اعتقاد رکھے۔ ان کی بدگوئی سے رکے۔ ان کی مدح و ثناء کرتا رہے، کیونکہ اللہ تعالیٰ نے اپنی کتاب میں بہت سی آیات میں ان کی تعریف کی ہے۔ ان میں سے ایک یہ ہے: "(اے صحابہ کرام رضی اللہ عنہم) تم سب امت سے بہتر ہو جو لوگوں (کی ہدایت) کے لیے بنائی گئی ہے۔‘‘ پس اللہ تعالیٰ نے تمام امتوں پر ان کی فضیلت ثابت کی ہے۔ اللہ تعالیٰ کی ان کی فضیلت پر اس شہادت کے برابر کوئی شہادت نہیں ہو سکتی، کیونکہ اللہ تعالیٰ نے اپنے بندوں کو اور ان سے صادر ہونے والے جمیعِ اعمالِ حسنہ کو خوب جانتے ہیں، بلکہ اس کو اللہ تعالیٰ کے سوا اور کوئی نہیں جانتا۔ پس جب اللہ تعالیٰ نے ان کے حق میں سب امتوں سے افضل ہونے کی گواہی دی تو ہر شخص پر واجب ہے کہ وہ اس پر اعتقاد رکھے اور اس پر ایمان لائے ورنہ وہ اللہ تعالیٰ کی اس خبر دینے میں تکذیب کرے گا اور بلاشبہ جو شخص بھی کسی ایسی چیز کی حقیقت میں جس کی خبر اللہ اور اس کے رسولﷺ نے دی ہے شک کرے تو وہ تمام مسلمانوں کے نزدیک کافر ٹھہرے گا۔ 

قارئین کرام! خوف ہے کہ ایک ہی قسم کے اقوال آپ پڑھتے پڑھتے کہیں اکتا نہ جائیں بقول شاعر۔

اس لیے ہر صنف کے علماء کے اقوال میں سے صرف دو چار کے لکھنے پر اکتفا کیا ہے اور عقل مند آدمی کے لیے یہی کافی ہیں اور ہٹ دھرم اور معاند کے لیے دفتر کے دفتر بھی بے کار ہیں ورنہ صحابہ کرام رضی اللہ عنہم کی عدالت اور ان کی عزت و تکریم کے ضروری ہونے پر اسی اکثریت سے علماء امت کی تصریحات موجود ہیں کہ ان کو جمع کرنے سے ایک ضخیم جلد تیار تو ہو جائے، مگر وہ ختم نہ ہوں۔ اس مختصر سے مضمون میں اتنی گنجائش ہی کہاں؟ کہ صحابہ کرام رضی اللہ عنہم کے فضائل و محامد پر مشتمل مواد کا عشر عشیر بھی سمیٹ سکے۔

دامانِ نگاہ تنگ گلِ حسن تو بسیار                      

گل چین بہار تو زد امن گلہ دارد

الغرض ہر مکتبِ فکر کے علماء امت نے صحابہ کرام رضی اللہ عنہم کے دربار میں خراجِ تحسین پیش کیا ہے۔ مفسرین و محدثین نے اس لیے کہ ذخیرۀ حدیث و تفسیر کے راویان اول اور انھیں حدیث و تفسیر سے ربط آشنائی دینے والے صحابہ کرام رضی اللہ عنہم ہی ہیں۔ فقہاء اور علماء اصول نے اس لیے کہا انھوں نے صحابہ کرام رضی اللہ عنہم کی مرویات اور اقوالِ طیبہ سے خوشہ چینی کر کے اجتہاد و استنباط کا ملکہ پایا اور ان کے متعلق قوانین مدون کیے۔

متکلمین اور علماء عقائد نے اس لیے بحث کی تاکہ قرآن و سنت کے ان پاسبانوں کو دشمن کے حملہ سے محفوظ رکھا جائے اور اہلِ حق کا اہلِ باطل سے امتیاز بھی ہو جائے۔ علماء رجال اور مؤرخین نے اس لیے مدح سرائی کی کہ صحابہ کرام رضی اللہ عنہم کی سوانح نگاری اور ان کے پاکیزہ حالات نے ان کے فن اور خدمات کو جلا بخشی اور دنیا میں ان کا نام روشن کرایا بقول حضرت حسانؓ۔

ما إن مدحتُ محمدًا بمقالتی         

ترجمہ: میں نے اپنی نظم میں حضورﷺ کی تعریف نہیں کی ہاں آپﷺ کے ذکرِ خیر سے اپنی نظم کی تعریف کر دی ہے۔

تمام علماء اصولِ حدیث میں سے صرف صاحبِ تنقیح الازہار جو شیعی زیدی مسلک کے ہیں اور اس کے شارح ابراہیم وزیر یعنی امیر یمانی نے ایک دو صحابہؓ کو عدالت سے مستثنیٰ کیا ہے، چنانچہ الصحابۃ کلھم عدول سے استثناء کرتے ہوئے لکھتے ہیں۔ إلا من قام الدلیل علی أنہ فاسق تصریح 

(توضیح الافکار: جلد، 2 صفحہ، 436)

ترجمہ: سب صحابہ کرام رضی اللہ عنہم عادل ہیں مگر جس پر کوئی دلیل قائم ہو جائے کہ وہ صریح بے حکم تھا۔

پھر حضرت ولید بن عقبہؓ اور حضرت یسر بن ابی ارطاۃؓ کا ذکر کیا ہے اور امیر یمانی روض الباسم فی الذب عن سنتہ ابی القاسم، صفحہ، 120‘‘ پر بھی عدالتِ صحابہ کرام رضی اللہ عنہم کی بحث کرتے ہوئے لکھتے ہیں:

محدثین نے جو یہ کہا ہے کہ سب صحابہ کرام رضی اللہ عنہم عادل ہیں تو وہ ظاہری سیرت کے اعتبار سے ہے جیسے ہم بیان کر چکے ہیں اور یہ ظاہر کی قید اس لیے ہے، تاکہ جس نے بغیر تاویل کبیرہ کا ارتکاب کیا وہ نکل جائے، جیسے سیدنا ولید بن عقبہؓ اور محدثین نے کہا ہے کہ سب صحابہ کرام رضی اللہ عنہم علی الاطلاق عادل ہیں، اس لیے کہ تقریباً سبھی ایسے تھے اور بہت معمولی نادر اس سے مستثنیٰ ہو سکتے ہیں۔ پس ایسا فاسق جس نے اس زمانہ میں اپنے عمل کی کوئی تاویل ظاہر نہیں کی وہ ایسا ہی ہے، جیسے سفید رنگ کے بیل میں ایک آدھا بال کالا بھی ہو۔‘‘

مگر ہم کہتے ہیں کہ ان کا یہ قول مردود ہے، کیونکہ خلافِ جمہور خلاف اجماع اہلِ حق ہے کسی نے بھی استثناء کو جائز قرار نہیں دیا اور حضرت ولیدؓ یا حضرت بسر بن ابی ارطاۃؓ کو جن تاریخی روایات کی بناء پر غیر عادل کہا جاتا ہے وہ روایات مخدوش ہیں، بلکہ اکثر مواد دشمنانِ اسلام و صحابہ کرام رضی اللہ عنہم روافض کی من گھڑت ہے نیز وہ نصوصِ قطعیہ قرآنیہ اور احادیثِ صحیحہ جو جمیع صحابہ کرام رضی اللہ عنہم کی عدالت پر روشن دلیلیں ہیں کے مخالف ہونے کی وجہ سے مردود ہیں۔ اگر کوئی روایت قابلِ اعتماد بھی ہو تب بھی وہ مؤول اور مصروف عن الظاہر ہو گی اور اس کا کوئی جائز مصداق اور محمل ہو گا کیونکہ اس کے ظاہری و ظنی مفہوم کی بدولت قرآن و حدیث اور اجماع کے قطعی الثبوت و قطعی الدلالت مفہوم کو نظر انداز نہیں کیا جا سکتا۔

علاوہ ازیں ہمارے معاصر محققین بھی یہ ثابت کر چکے ہیں کہ حضرت ولیدؓ بن عقبہ پر شراب نوشی کا الزام کوفہ کے شریروں نے انتقامی طور پر لگایا تھا اور حضرت عثمان غنیؓ کے سامنے انھوں نے گواہی دی تب ان پر حد جاری ہوئی بہرحال اصل الزام غلط ہے۔ (دیکھیے عادلانہ دفاع: حصہ، اول از مولانا نورالحسن شاہ صاحب بخاری)

ایسے ہی سیدنا بسر بن ابی ارطاۃؓ کے متعلق ظلم و ستم، بچوں کو قتل کرنے مسلمانوں کو اسیر بنانے کی روایات وضعی داستان سے زیادہ کچھ حیثیت نہیں رکھتیں جن کے موجد شیعہ ہیں۔

ایسی غیر معتبر روایات پر اعتماد کر کے ہم کیسے ایک صحابیؓ سے بدظن ہوں یا ان سے عدالت ساقط کر دیں، جب کہ سب امت کا فیصلہ سب صحابہ کرام رضی اللہ عنہم کی عدالت کا ہے۔

(مختصر التحفہ الاثنی عشریہ: صفحہ، 282)

ترجمہ: حضرت امیرِ معاویہؓ پر سبِّ سیدنا علیؓ کے الزام کی طرف توجہ ہی نہ کی جائے)کیونکہ مؤرخین پاک ناپاک سب نقل کرتے ہیں۔ صحیح، من گھڑت اور کمزور روایات میں فرق نہیں کرتے ان کی اکثریت رات کو لکڑیاں جمع کرنے والے کی طرح ہے جو نہیں جانتا کہ (خشک و تر) کیا جمع کر رہا ہے۔ ایسے پُرخطر مقام، سنگین راستے اور بیاباں جنگل میں جس میں پرندے بھی گم ہو جاتے ہیں اور قدم وہاں پہنچنے سے قاصر رہتے ہیں۔ ایسی روایات پر اعتماد عقل مند کی شان نہیں چہ جائے کہ اہلِ علم و فاضل ایسا کرے۔  

(واللہ الہادی)