خلفائے راشدین رضی اللہ عنہم آنحضرتﷺ کے چار مسلسل اور بلا فصل از نبوت جانشینوں کا یکجا تذکرہ ہے۔ آنحضرتﷺ نے وصیت فرمائی تھی کہ میرے بعد خلفائے راشدین رضی اللہ عنہم و مہدیین کے طریقوں کو لازم پکڑنا۔ سو امتِ مسلمہ شروع سے ہی خلافتِ راشدہ کو تتمہ مصطفویﷺ سمجھتی آئی ہے یہ راشدین و مہدیین کون ہیں؟ سلف کی اصطلاح میں حضرات شیخین (حضرت ابو بکر اور حضرت عمر رضی اللہ عنھما) اور حضرات ختنین (حضرت عثمان اور حضرت علی رضی اللہ عنہما) ہیں۔ ان سب کی خلافت ایک دوسرے سے بلا فصل مسلسل تھی۔ حضرت علی مرتضیٰ رضی الله عنہ کی خلافت حضورﷺ سے چوبیس سال کے فصل سے قائم نہیں ہوئی پہلے خلفاء کے تسلسل سے بلا فصل قائم ہوئی اہلِ سنت کے ہاں چوبیس سال کے فصل سے قائم نہیں ہوئی خلفاء کے تسلسل سے بلا فصل قائم ہوئی اہلِ سنت کے ہاں چوبیس سال کی بالفصل خلافت کا عقیدہ بالکل غلط ہے۔

بعض دوستوں نے تقاضا کیا تھا کہ اس کتاب میں سیدنا حسن رضی اللہ عنہ کا ذکر بھی بطور پانچویں خلیفہ راشد کے ہونا چاہیے۔ وہ بھی خلفائے راشدین رضی اللہ عنہم میں سے تھے۔ اس میں شبہ نہیں کہ حضرت حسن رضی اللہ عنہ کا چھ ماہ کا دورِ خلافت ان تیس سالوں میں داخل ہے۔ جسے خلافتِ نبوت کہا جاتا ہے یہ تیس سال خلافت علی منہاج النبوة میں داخل ہیں، اور ہم بجا طور پر انہیں خلافتِ راشدہ میں تسلیم کرتے ہیں۔ لیکن حضرت حسنؓ چونکہ خلافت سے دستبردار ہو گئے تھے اور خلیفہ نہ رہے تھے اس لیے خلفائے راشدین رضی اللہ عنہم صرف چار ہی رہے۔ حضور اکرمﷺ کا ارشاد ہے العبرة بالخواتيم کہ دین میں آخر کے حالات کا اعتبار ہوتا ہے۔ سیدنا عثمان رضی اللہ عنہ بھی اگر قمیضِ خلافت اتار دیتے تو خلافتِ راشدہ کی اصطلاح حضرات شیخین تک محدود رہتی حضرت حسن رضی اللہ عنہ کی خلافت سے دستبرداری ایک تاریخی سنگِ میل ہے۔ جس نے خلفائے راشدین رضی اللہ عنہم کے لیے ایک حدِ فاصل قائم کر دی ہے۔ خلیفہ راشد وہ ہے جس کی وفات خلافت پر ہوئی ہو یہ خلافتِ تامہ ہے۔ خلافتِ راشدہ خلافتِ کاملہ کی ایک صفت ہے جن علماء نے حضرت حسن رضی اللہ عنہ کو ان خلفاء میں شمار کیا ہے سو وہ صرف اس لیے کہ ان کا دور خلافتِ راشدہ کے تیس سالوں میں داخل ہے انہیں اس سے انکار نہیں کہ اصطلاحاً خلفائے راشدین رضی اللہ عنہم یہ پہلے چار بزرگ ہی ہیں۔

(شرح صحیح مسلم: جلد 2)

ترجمہ: بے شک ان تیس سالوں میں صرف چار خلفائے راشدین رضی اللہ عنہم (کی مدتِ خلافت) اور وہ (چھ مہینے) جن میں حضرت حسن بن علی رضی اللہ عنہ کی بیعت کی گئی تھی اس میں داخل ہیں۔

ملاحظہ کیجیئے اس میں حضرت حسن رضی اللہ عنہ کے دورِ خلافت کو تو خلافتِ راشدہ میں شمار کیا گیا ہے لیکن انہیں خلیفہ راشد کہہ کر پانچ خلفائے راشدین رضی اللہ عنہم نہیں بتلائے گئے خلفائے راشدین رضی اللہ عنہم صرف ان چار کو ہی کہا ہے۔

جس طرح ہدایت کا تقابل ضلالت اور گمراہی سے ہے رشد کا تقابل غوایت ہے۔

(سورۃ الأعراف: آیت 146)

ترجمہ: اور اگر انہیں ہدایت کا سیدھا راستہ نظر آئے تو اس کو اپنا طریقہ نہیں بنائیں گے، اور اگر گمراہی کا راستہ نظر آجائے تو اس کو اپنا طریقہ بنالیں گے۔ 

خلفائے راشدینؓ مہدیین وہ بلند پایہ انسان تھے جنہیں خداوندِ کریم نے جانشینانِ رسالت کے طور پر کام کرنے کے لیے چنا تھا۔ سو ان کے خلافتی فیصلے ہر بھول اور بھٹک سے محفوظ رہے یہ حضرات خود تو معصوم نہ تھے لیکن ان کا دورِ خلافت بلاشبہ الله کی حفاظت کے سائے میں گزرا تھا۔ (اور یہ بات بلا شبہ غلط ہے کہ اس دور میں جاہلیت کی دبی چنگاریاں پھر سے چمک اٹھی تھیں حضور اکرمﷺ کے فیضِ رسالت سے جاہلیت کی آگ بجھی تھی دبی نہ تھی۔ چنگاری پھر سے تب سلگتی ہے جب پہلے سے پوری بجھی نہ ہو۔) اپنی ذات اور اپنے اعمال میں تو سب صحابہ کرام رضی اللہ عنہم راشدون ہیں۔

(سورۃ الحجرات: آیت 7)

لیکن حکومتی ذمہ داریوں کو رشد و ہدایت سے نبھانے اور ہر ایک کو اس کا حق دلانے میں جس حسنِ تدبیر، اصابتِ رائے اور جرأت مندانہ عزم کی ضرورت ہو سکتی ہے ضروری نہیں کہ ملت کا ہر نیک فرد اس سے اسی طرح عہدہ برا ہو جس طرح حضرات خلفائے راشدین رضی الله عنہم عزائمِ امور میں ان ذمہ داریوں سے عہدہ برا ہوئے۔ میدانِ جہاد میں ہر جانباز مومن انتہائی اخلاص سے لڑتا ہے لیکن کمانڈ کرنے، کام کو ترتیب دینے اور فوجوں کو لڑانے کے لیے جس حسنِ تدبیر، اصابتِ ظن اور جرأت مندانہ اقدام کی ضرورت ہوتی ہے کیا یہ ضروری ہے کہ ہر لڑنے والے جانباز میں یہ صفات اس طرح موجود ہوں جس طرح حضرت ابو عبیدہ، حضرت سعد بن ابی وقاص اور حضرت خالد بن ولید (رضی اللہ عنہم) میں تھیں اور وہ ہر میدان میں الله کی تلوار بن کر چمکتے تھے۔ اگر ایک صحابی ایک درجے میں ہوتا تو حضورﷺ کو اتنے صحابہ کے ہوتے ہوئے حضرت عمرؓ کو مانگ کر لینے کی کیا ضرورت تھی؟ خدا کی زمین پر خدا کی ایسی بادشاہت قائم کرنا جیسی اُس کی بادشاہت آسمانوں پر ہے یہ ہمت اور سعادت جن بزرگوں کے نام لکھی تھی وہ خلفائے راشدین رضی الله عنہم ہیں یہ نہ صرف راشدین ہیں بلکہ مہدیین بھی تھے اور حضور اکرمﷺ نے خود خبر دی تھی کہ آپﷺ کے جانشین و مہدیین دونوں صفتوں والے ہوں گے۔ یہ نہیں ہو گا کہ آپﷺ کی وفات کے بعد آپﷺ کی امت آپ کے رستے سے بھٹک جائے رشد و ہدایت کا تسلسل سے قائم رہنا آپﷺ نے اس کی خبر دی تھی اور تاریخ گواہ ہے کہ پھر ایسا ہی ہوا اور خلفائے راشدین رشد و ہدایت کے ماہتاب بن کر چمکے۔

 من يعش منكم بعدی فسيرى اختلافا كثيرا فعليكم بسنتی و سنة الخلفاء الراشدين المهديين

(سنن ابی داود: جلد 2 صفحہ 635)

ترجمہ: تم میں سے جو میرے بعد زندہ رہا بہت سے اختلاف دیکھے گا۔ سو تم میرے طریقے اور خلفائے راشدین و مہدیین کے طریقوں کو لازم پکڑنا۔

ترجمہ: یہ حدیث ائمہ اربعہ حضرت ابوبکر، حضرت عمر، حضرت عثمان، حضرت علی رضی اللہ عنھم کی خلافت کی ایک غیبی خبر تھی۔

یعنی آپﷺ نے اس میں بتلایا ہے کہ آپﷺ کے بعد آپ کا نظام جاری رہے گا۔ آپﷺ کے جانشین آپ کے مطابق چلیں گے وہ راشدین اور مہدیین ہوں گے اور دنیا نے دیکھا کہ واقعی آپﷺ کے بعد خلفائے راشدین حضرت ابوبکر حضرت عمر حضرت عثمان اور حضرت علی رضی اللہ عنھم آپﷺ کے مشن کے مطابق چلے اور چاروں ایک دوسرے سے مسلسل تھے۔

حضرت امام اعظم ابوحنیفه رحمۃ اللہ (150ھ) ان چار حضرات کا شیخین (حضرت ابوبکر رضی اللہ عنہ اور حضرت عمر رضی اللہ عنہ) اور ختنین (حضرت عثمان رضی اللہ عنہ اور حضرت علی رضی اللہ عنہ) کے الفاظ سے ذکر کرتے ہیں۔

(ماخوذ از مکتوبات امام ربانی: جلد، 1 صفحہ، 330)

ترجمہ: اہلِ سنت والجماعت کی مسلکی علامت سیدنا ابوبکر رضی اللہ عنہ و سیدنا عمر رضی اللہ عنہ کو جمیع امت پر افضل جاننا اور حضرت عثمان رضی اللہ عنہ اور حضرت علی رضی اللہ عنہ کو دل سے پسند کرنا ہے۔

حضرت ابوبکر رضی اللہ عنہ اور حضرت عمر رضی اللہ عنہ کی افضلیت قطعی درجے کی ہے اور یہ تمام صحابہ کرام رضی اللہ عنہم و تابعین کے اجماع سے ثابت ہے اور تواتر سے منقول ہے۔ حضرت عثمان رضی اللہ عنہ کی افضلیت یہ بھی برحق ہے لیکن یہ تواتر سے منقول نہیں ان کے بعد حضرت علی رضی اللہ عنہ تمام امت سے افضل ہیں۔ لیکن ان کی فضیلت بھی تواتر سے منقول نہیں۔ سیدنا عثمان رضی اللہ عنہ اور سیدنا علی رضی اللہ عنہ کے ادوار میں مسلمانوں میں جو باہمی اختلافات چلے ان میں تمام کدورتوں اور اختلافات کو برسرِ طاق رکھتے ہوئے ان کی محبت اور ان کی حضور خاتم النبینﷺ سے دامادی کی نسبت اہلِ حق کے عقیدے کا مرکزی نقطہ ہے۔ حضرت امام اعظم رحمۃ اللہ ان دونوں حضرات کی محبت کو اسی طرح واجب قرار دیتے ہیں جس طرح سیدنا ابوبکر رضی اللہ عنہ اور سیدنا عمر رضی اللہ عنہ کی پوری امت پر افضلیت کے قائل ہیں۔

حضرت امام اعظم ابوحنیفہ رحمۃاللہ کی یہ تعبیر صرف چاروں کو آگے لا رہی ہے۔ خلفائے راشدین رضی اللہ عنہم میں اگر کوئی پانچواں نام بھی ہوتا تو اسے بھی اس ترتیب میں افضلیت ملتی۔ لیکن ہم دیکھتے ہیں کہ محدثین نے ان چار حضرات کو فضائل و مناقب میں اسی ترتیب سے ذکر کیا ہے اور کوئی سیدنا حضرت حسن رضی اللہ عنہ کو یہاں پانچویں نمبر میں ذکر نہیں کرتا ان کی فضیلت اور شان حضرت حسین رضی اللہ عنہ کے ساتھ ذکر کرتے ہیں جس میں خلافت کا کوئی موضوع نہیں ہاں یہ صحیح ہے کہ حضرت حسنؓ حضرت حسینؓ سے افضل ہیں اور امت میں دوبارہ جوڑ پیدا کرنے میں آپؓ کا ایک نمایاں کردار ہے اور اس معنی کے اعتبار سے بھی آپ سید ہیں۔ پوری قوم کے سردار ہیں۔

دوسری صدی ہجری کی شہادت آپؓ کے سامنے آ چکی ہے اگلے محدثین اس باب میں کس طرح چلے ہیں اس کے لیے تیسری صدی کے اکابر محدثین کو دیکھیے۔ یہ صحیح بخاری کا کتاب المناقب سامنے ہے حضرت ابوبکر رضی اللہ عنہ، حضرت عمر رضی اللہ عنہ، حضرت عثمان رضی اللہ عنہ اور حضرت علی رضی اللہ عنہ کے مناقب کے ابواب مسلسل ہیں اور اسی ترتیب سے ہیں ان کے بعد مناقبِ سیدنا جعفرؓ بن ابی طالب کا باب ہے۔ اس کے بعد پھر حضرت حسن اور حضرت حسین رضی اللہ عنھما کے مناقب ہیں۔ سیدنا حسن رضی اللہ عنہ پانچویں خلیفہ راشد ہوتے تو حضرت علی رضی اللہ عنہ کے بعد انکے مناقب کا باب ہوتا۔ صحیح مسلم کو لیجیے اس کی کتاب الفضائل میں چاروں خلفائے راشدین رضی اللہ عنہم کے ابواب فضائل مسلسل ہیں حضرت علی رضی اللہ عنہ کے بعد پھر حضرت سعد بن ابی وقاص رضی اللہ عنہ کے فضائل کا باب ہے پھر حضرت طلح بن زبیر رضی اللہ عنھما کے فضائل ہیں پھر حضرت ابو عبیدہ بن الجراح رضی اللہ عنہ کے فضائل ہیں اور ان کے بعد حضرت حسن اور حضرت حسین رضی اللہ عنھما کے فضائل کا ذکر ہے۔ جامع ترمذی کے ابواب المناقب میں خلفائے اربعہ کے مناقب اسی ترتیب سے ہیں۔

پھر حضرت طلحہ، حضرت زبیر، حضرت عبدالرحمٰن بن عوف، اور حضرت سعد بن ابی وقاص رضی اللہ عنہم کے مناقب کا بیان ہے۔ حضرات حسنین کریمین کے مناقب اور بھی آگے جا کر ہیں۔ یہ تیسری صدی ہجری کے محدثین کا تذکرہ ہے کوئی محدث حضرت علی رضی اللہ عنہ کے بعد متصلاً سیدنا حضرت حسینؓ کا تذکرہ نہیں کرتا۔ اب کیسے باور کیا جائے کہ حضرت حسن رضی اللہ عنہ پانچویں خلیفہ راشد ہیں۔

ونثبت الخلافة بعد رسول صلى اللہ عليه وسلم اولا لابی بكر الصديق رضى الله تعالى عنه وتفضيلاً له وتقديما له على جميع الامة ثم لعمر بن الخطاب ثم لعثمان ثم لعلى بن ابى طالب وهم الخلفاء الراشدون والائمة المهديون (شرح عقیدہ طحاویہ)

ترجمہ: حضور اکرمﷺ کے بعد پہلے سیدنا ابوبکر صدیق رضی اللہ عنہ کی خلافت ثابت کرتے ہیں بایں طور کہ آپؓ کو تمام امت پر فضیلت اور تقدیم حاصل ہے پھر یہ خلافت سیدنا عمر بن الخطاب رضی اللہ عنہ کے لیے ثابت کرتے ہیں پھر سیدنا عثمان رضی اللہ عنہ کے لیے اور پھر سیدنا علی بن ابی طالب رضی اللہ عنہ کے لیے ثابت کرتے ہیں اور یہی خلفائے راشدین رضی اللہ عنہم اور آئمہ مہدیین ہیں۔

اب آپ ہی بتائیے یہاں ان چاروں کے بعد پانچواں نام کہاں ہے؟

خلفائے راشدین رضی اللہ عنہم کیا یہی چاروں اصحاب نہیں؟

اس میں کوئی شک نہیں کہ سیدنا حسن رضی اللہ عنہ کے ایام خلافتِ راشدہ کے دن تھے لیکن آپؓ کی خلافت سے علیحدگی آپؓ کو خلفائے راشدین رضی اللہ عنہم کی فہرست میں نہ لا سکی اور امت نے صرف انہی چار کو اس عنوان میں تسلیم کیا ہے۔

(کتاب الابانہ: صفحہ، 24 طبع ریاض)

ترجمہ: اور ہم سب صحابہ کرام رضی اللہ عنہم سے محبت رکھتے ہیں اور ان میں جو (اختلافات) ہوئے ہیں ان سے اپنی زبان اور قلم کو روکتے ہیں اور ہم خدا تعالیٰ کے حضور اقرار کرتے ہیں کہ یہ چاروں ائمہ ہی خلفائے راشدین و مہدیین تھے کوئی ان کی فضیلت میں ان سے برابری نہیں کر سکتا۔

(احیاء العلوم: جلد، 1) 

ترجمہ: آنحضرتﷺ کے بعد امام برحق سیدنا ابوبکر رضی اللہ عنہ ہیں پھر سیدنا عمر پھر سیدنا عثمان پھر سیدنا علی رضی اللہ عنہم اللہ تعالیٰ ان چاروں سے راضی ہوا۔

(الاقتصاد فی الاعتقاد: صفحہ، 140)

سیدنا حسن رضی اللہ عنہ کو اگر پانچواں خلیفہ راشد مانا جائے تو ان کی حضرت عبداللہ بن مسعودؓ، حضرت طلحہؓ اور حضرت زبیرؓ پر بھی افضلیت ماننا پڑے گی۔

ترجمہ: ان دس نیک افراد میں سے سب سے اچھے اور افضل خلفائے راشدین رضی اللہ عنہم ہیں اور ان چار میں سب سے افضل حضرت ابوبکرؓ ہیں پھر حضرت عمرؓ پھر حضرت عثمانؓ پھر حضرت علیؓ اللہ تعالیٰ ان سب سے راضی ہوا۔ اور ان چاروں نے تیس سال حکومت کی۔

قاضی عیاض مالکی رحمۃاللہ (544ھ) بھی آنحضرتﷺ سے چار اصحاب کرام رضی اللہ عنہم کا لفظ نقل کرتے ہیں جس سے پتہ چلتا ہے کہ ان چاروں بزرگوں کا ذکر بایں طور کہ یہ ایک ہیں اور مسلسل ہیں ان میں عام تھا یہ صحابہ کرام رضی اللہ عنہم میں افضل ترین امت تھے۔

ان الله اختار اصحابی على جميع العالمين سوى النبيين والمرسلين و اختار لى منهم اربعة ابوبكر و عمر و عثمان و عليا فجعلهم خیر اصحابی و فی اصحابی كلهم خير (الشفاء: جلد، 2 صفحہ، 119)

ترجمہ: اللہ تعالیٰ نے میرے صحابہ کرام رضی اللہ عنہم کو جملہ جہانوں پر ماسوائے نبیوں اور رسولوں کے برگزیدہ کیا اور ان میں سے میرے لیے چار کو چن لیا یہ سیدنا ابوبکرؓ، سیدنا عمرؓ، سیدنا عثمانؓ، سیدنا علیؓ ہیں۔ اللہ نے ان کو میرے لیے بہترین ساتھی بنایا اور ویسے میرے سب صحابہ کرام رضی اللہ عنہم میں خیر ہے۔ امام فخر الدین رازی رحمۃ اللہ (606ھ) بھی آیت استخلاف کا مصداق صرف چار حضرات کو بیان کرتے ہیں صحابہ کرام رضی اللہ عنہم میں سے جن حضرات کو حکومت کرنے کا موقع ملا ان میں صرف یہی چار تھے جو اس آیت کے نزول کے وقت ایمان لائے ہوئے تھے آپ تفسیر کبیر صفحہ 25 پر لکھتے ہیں۔

ترجمہ: یہ آیت چار خلفاء کرام رضی اللہ عنہم کی امامت ثابت کرتی ہے کیونکہ اللہ تعالیٰ نے یہ وعدہ ان لوگوں سے کیا تھا جو حضورﷺ کے سامنے اس وقت موجود تھے اور ایمان لائے ہوئے تھے اور انہوں نے نیک اعمال (ہجرت) کیے تھے خدا تعالیٰ کا یہ کہنا کہ انہیں زمین میں خلیفہ بنائے گا اس سے مراد یہی لوگ ہیں۔

ترجمہ: اس آیت سے چاروں ائمہ کی امامت صحیح ثابت ہوتی ہے۔ اور رافضی جو سیدنا ابوبکرؓ، سیدنا عمرؓ، سیدنا عثمانؓ پر زبان کھولتے ہیں ان کی بات باطل ٹھہرتی ہے اور خارجی جو سیدنا علیؓ ان کی بات بھی باطل قرار پاتی ہے۔

امام نووی رحمۃاللہ (676ھ) اس دور کے جلیل القدر محدث ہیں۔ آپ نے حدیث کہ میرے بعد خلافت تیس سال تک رہے گی کا اعتبار کیا ہے اور بارہ حکمرانوں کی خبر کو بھی صحیح قرار دیا ہے آپ دونوں کے تعارض کو اٹھاتے ہوئے فرماتے ہیں کہ تیس سالہ خلافت سے مراد خلافتِ علی منہاج النبوۃ ہے۔

(فی بعض الروایات خلافت النبوت بعدی ثلاثون سنہ، شرح صحیح مسلم: جلد، 2 صفحہ، 119)

یہ واقعی تیس سال تک رہی اس میں خلفائے راشدین رضی اللہ عنہم اور حضرت حسن بن علی رضی اللہ عنہ کے ایامِ خلافت پورے ہوئے۔ آپ اس بحث میں خلفائے راشدین رضی اللہ عنہم کا لفظ صریح لفظوں میں ان حضرات کے لیے خاص کرتے ہیں اور خلافت کی گنتی پوری کرنے کے لیے حضرت حسن رضی اللہ عنہ کے اشہر خلافت (چھ ماہ) کو ان میں جمع کرتے ہیں مگر پانچ خلفائے راشدین نہیں بتلاتے۔

(ایضاً صفحہ 119 و رواہ الامام احمد ابوداؤد والترمذی والنسائی من حدیث سعید بن جمہان عن سفینتہ مولی رسول اللہﷺ، تفسیر ابنِ کثیر: جلد 3 صفحہ 308)

قال الحافظ فی الفتح صححہ ابنِ حبان وغیرہ (فتح الباری: جلد 13 صفحہ 182) حضرت شاہ ولی الله رحمۃاللہ تیس سال خلافت کی حدیث کو مستفیض فرمایا ہے (دیکھیے ازالہ الخلفاء: جلد 2 صفحہ 202) حدیث کے راوی سعید بن جمہان کو یحییٰ بن معین نے ثقہ قرار دیا ہے (دیکھیے میزان الاعتدال) اگر کسی نے اس حدیث کی صحت سے انکار کیا ہے تو اس کی مراد صحیح لذاتہ ہو گی اس کے معنی اور مقبول ہونے میں کسی نے انکار نہیں کیا)

(سورۃ النور: آیت، 55)

ترجمہ: تم میں سے جو لوگ ایمان لے آئے ہیں اور جنہوں نے نیک عمل کیے ہیں، ان سے اللہ نے وعدہ کیا ہے کہ وہ انہیں ضرور زمین میں اپنا خلیفہ بنائے گا، جس طرح ان سے پہلے لوگوں کو بنایا تھا، اور ان کے لیے اس دین کو ضرور اقتدار بخشے گا جسے ان کے لیے پسند کیا ہے، اور ان کو جو خوف لاحق رہا ہے، اس کے بدلے انہیں ضرور امن عطا کرے گا۔ (بس) وہ میری عبادت کریں، میرے ساتھ کسی چیز کو شریک نہ ٹھہرائیں۔ اور جو لوگ اس کے بعد بھی ناشکری کریں گے تو ایسے لوگ نافرمان ہوں گے۔

(مدارک التنزیل: صفحہ، 520 طبع لبنان)

ترجمہ: سب سے پہلے اس نعمت کی جن لوگوں نے ناشکری کی وہ حضرت عثمانؓ کے خلاف اٹھنے والے قاتلین ہیں انہوں نے مسلمانوں کے بھائی بھائی ہو جانے کے بعد خانہ جنگی کی اور آیتِ استخلاف خلفائے راشدین رضی اللہ عنہم کی صحتِ خلافت کی بڑی واضح دلیل ہے کیونکہ خلافت پانے والے جو اس وقت ایمان لا چکے تھے اور نیک عمل تھے یہی لوگ تو تھے۔

کیا یہاں کسی پانچویں خلیفہ راشد کا ذکر ہے؟ کیا آیتِ استخلاف صرف ان چار حضرات کو ہی اس وعدے کا مصداق نہیں ٹھہراتی؟

علامہ قرطبی رحمۃاللہ (671ھ) لکھتے ہیں کہ آیتِ استخلاف صرف ان چار حضرات کو ہی متضمن ہے یہی لوگ نزولِ آیت کے وقت ایمان لائے ہوئے تھے اور یہی اسلام کے لیے قربانیاں دے چکے تھے اور اس کی تائید حضور اکرمﷺ کی اس حدیث سے بھی ہوتی ہے کہ خلافت علی منہاج النبوۃ تیس سال تک رہے گی۔

(تفسیر قرطبی: جلد، 2 صفحہ، 297)

حافظ ابنِ كثير الدمشقی رحمۃ اللہ (774ھ) ان حضرات کا تذکرہ کرتے ہوتے جن پر اللہ تعالیٰ نے وعدہ استخلاف پورا کیا لکھتے ہیں۔

(تفسیر ابنِ کثیر: جلد، 3 صفحہ، 301)

ترجمہ: اور چار ان میں سے علی الاتصال خلافت پر پائے گئے اور وہ سیدنا ابوبکرؓ پھر سیدنا عمرؓ پھر سیدنا عثمانؓ اور پھر سیدنا علیؓ ہیں پھر ان کے بعد یہ اتصال رک گیا۔ پھر ان میں وہ لوگ بھی پائے گئے جو ان میں شامل نہیں۔

حافظ ابنِ تیمیہؒ (728ھ) سیدنا علیؓ کو آخر الخلفاء الراشدین لکھتے ہیں۔ اس سے پتہ چلتا ہے کہ سیدنا حسنؓ کو ان دنوں خلفائے راشدین میں شمار نہ کیا جاتا تھا۔ خلافتِ راشده انہی حضرات کے لیے موعود تھی جو آیتِ استخلاف کے نزول کے وقت مشرف باسلام ہو چکے تھے اور اعمال صالحہ ہجرت وغیرہ کر چکے تھے۔

(منہاج السنہ: جلد، 4 صفحہ، 121)

ترجمہ: اور حضرت علیؓ آخری خلیفہ راشد تھے جن کی سلطنت نبوت اور رحمت کی خلافت تھی۔

خطیب تبریز رحمۃ اللہ (743ھ) مؤلف مشکوٰۃ نے بھی دورِ اول کے محدثین کے طریقے پر چاروں خلفائے راشدین رضی اللہ عنہم کے مناقب علی الترتیب ذکر کیے ہیں۔ پھر عشرہ مبشرہ کے مناقب لائے ہیں سیدنا حسنؓ کو خلفائے راشدین رضی اللہ عنہم کے ساتھ نہیں سیدنا حسین رضی اللہ عنہ کے ساتھ ذکر کیا ہے۔

علامہ ابنِ ہمامؒ (861ھ) کی جلالتِ قدر اور شانِ اجتہاد سے کون واقف نہیں اگر اس موضوع میں کچھ بھی اختلاف کی گنجائش ہوتی آپ سیدنا حسن بن علیؓ کو ضرور پانچویں خلیفہ راشد کے طور پر ذکر کر دیتے اور آپ کے تفردات میں ایک اور اضافہ ہو جاتا لیکن آپ نے سرمو اس میں اختلاف کی گنجائش نہیں پائی۔ آپ نے فرمایا:

ان الخلیفۃ الحق بعد محمد صلی اللہ علیہ وسلم ابوبکر ثم عمر ثم عثمان ثم علی والتفضیل علی ھذا الترتیب۔ (المسائرہ)

اب آئیے آپ کو ذرا دسویں صدی میں لے چلیں امام سیوطیؒ (911ھ)کی عبارت مرقات الصعود کی اس کتاب سے آپ صفحہ 53 پر ملاحظہ کر آئے ہیں۔

(حاشیہ ابی داود: جلد، 2 صفحہ، 635)

(مکتوبات: جلد 2 صفحہ 130) 

لکھنو مکتوب نمبر افضلیت شیخین صحابہ کرام رضی اللہ عنہم اور تابعین کے اجماع سے ثابت ہے، امام شافعیؒ اس کی تصریح کرتے ہیں، امام ابوالحسن الاشعری کہتے ہیں۔ ان تفضیل ابی بکر ثم عمر علی بقیة الامة قطعی، قال الذھبی وقد تواتر عن علی فی خلافتہ وکرسی مملکتہ بین الجم الغفیر من شیعہ ان ابابکر وعمر افضل الامہ، (مکتوبات جلد 1 صفحہ 320) حصرت علیؓ سے اَسی سے زیادہ حضرات نے آپ کے اس اعلان کو روایت کیا ہے۔)

ترجمہ: امام برحق اور جسے حضورﷺ کا خلیفہ کہا جا سکے وہ سیدنا ابوبکر صدیقؓ ہیں اللہ تعالیٰ ان سے راضی ہوا۔ ان کے بعد سیدنا عمرؓ ہے اللہ تعالیٰ ان سے بھی راضی ہوا۔ ان کے بعد سیدنا عثمان ذوالنورینؓ ہے اللہ ان سے بھی راضی ہوا ان کے بعد سیدنا علی بن ابی طالبؓ ہے اللہ کی رضا آپؓ کے شامل حال ہو۔ ان حضرات کی افضلیت ان کی ترتیب کے مطابق ہے ہاں سیدنا ابوبکر اور سیدنا عمر رضی اللہ عنہما کی افضلیت قطعی ہے جو امت پر صحابہ کرام رضی اللہ عنہم اور تابعین کے اجماع سے ثابت ہے۔

یہ جو فرمایا کہ ائمہ برحق کی افضلیت ان کی خلافت کی ترتیب کے موافق ہے۔

(مکتوبات: جلد 3 صفحہ 45) 

اسے آپ نے دوسرے مقام پر خلفائے راشدین رضی اللہ عنہم کے عنوان سے ذکر کیا ہے جس سے واضح ہوتا ہے

کہ عقائدِ اہلِ سنت میں خلفائے راشدین رضی اللہ عنہم یہی ہیں۔ حضرت امام ربانیؒ لکھتے ہیں۔

(مکتوبات: جلد 1 مکتوب 266)

ترجمہ: خلفائے راشدین رضی اللہ عنہم کے مابین افضلیت خلافت کی ترتیب سے ہے۔

سیدنا حسنؓ کو آپ نے اس ترتیب میں ذکر نہیں فرمایا باوجود یہ کہ آپؓ کے ایامِ خلافت 30 سال میں شمار پاتے ہیں اور وہ واقعی خلافتِ راشدہ کے دن تھے مگر چونکہ یہ خلافت کاملہ نہ تھی آپؓ اس سے دست بردار ہو گئے تھے اس لیے خلفائے راشدین رضی اللہ عنہم کی اصطلاح انہی چار تک محدود رہی۔ اور جب اس کے ساتھ آیتِ استخلاف کو ملائیں تو یہ الہٰی فیصلہ اور کھل کر سامنے آتا ہے کہ خلفائے راشدین رضی اللہ عنہم وہی ہیں جن پر اس آیت میں دیا گیا وعدہ پورا ہوا اور وہی سابقین اولین تھے جو ہجرت کر کے مدینہ آئے اور نزولِ آیت کے وقت اسلام لائے ہوئے تھے۔

(شرح مشکوٰہ: جلد، 1 صفحہ، 242)

ترجمہ: کہا گیا وہ خلفائے اربعہ ہیں حضرت ابوبکر صدیقؓ حضرت عمرؓ حضرتؓ حضرت علیؓ اللہ ان سے راضی ہوا کیونکہ حضور اکرمﷺ نے فرمایا تھا خلافت میرے بعد 30 سال تک رہے گی اور وہ خلافت حضرت علیؓ پر ختم ہوئی۔

اب آپ ہی کہیں ان چار کے ساتھ کیا کسی پانچویں کا ذکر ہے حضرت حسنؓ کی جلالت قدر سے کسی کو انکار نہیں لیکن آپؓ خلافت سے دستبردار ہو گئے تھے۔

(تفہیماتِ الہٰیہ: جلد، 1 صفحہ، 148)

ترجمہ: آنحضرتﷺ کے بعد امام برحق سیدنا ابوبکر صدیقؓ ہیں پھر سیدنا عمرؓ پھر سیدنا عثمانؓ پھر سیدنا علیؓ اور پھر خلافتِ راشدہ اپنے انتہا کو جا پہنچی۔

(ازالہ الخفاء: جلد، 2 صفحہ، 402)

ترجمہ: جو آنحضرتﷺ کی وفات کے متصل بعد عمل میں آئی وہ خلفائے اربعہ کی خلافت تھی۔ سو ان چاروں کی خلافت خلافتِ نبوت و رحمت شمار ہوتی ہے۔

(تحفہ اثناء عشریہ: صفحہ، 183)

ترجمہ: اہلِ سنت کے ہاں یہ طے شدہ عقائد میں سے ہے کہ امامت حقہ (خلافتِ راشدہ) بلا شبہ تیس سال تک ہی گئی اور حضرت حسن رضی اللہ عنہ کی صلح 16 ہجری 15جمادی الاولیٰ کو ہوئی پر ختم ہو گئی اہلِ سنت کے ہاں ترتیبِ خلافت حق و صواب پر واقع ہوئی ہے جس کی فضیلت بعد میں ہو اسے پہلے خلیفہ بنا دیا جائے یہ بات ہرگز نہیں ہوئی پس حضور اقدسﷺ کی وفات کے بعد امام برحق سیدنا ابوبکر صدیق رضی اللہ عنہ ہی ہوئے ہیں۔

(تحفہ اثناء عشریہ: صفحہ، 183)

ترجمہ: حضرت حسنؓ جانتے تھے کہ خلافت کی 30 سالہ مدت ہو چکی ہے اگر میں مزید خلافت کے در پہ رہوں چونکہ تقدیر کا فیصلہ ہے سلطنت ایک نہ ہو سکے گی۔ آپؓ نے اس وقت خلافت سے کنارہ کشی کر لی اور سلطنت سیدنا امیرِ معاویہ رضی اللہ عنہ کے سپرد کر دی کیونکہ اس وقت قیادت کے لائق آپؓ ہی تھے۔

اس سے پتہ چلتا ہے کہ یہ حدیث کہ خلافتِ نبوت 30 سال تک رہے گی حضرت حسن رضی اللہ عنہ کو معلوم تھی اور وہ جانتے تھے کہ اب 30 سال پورے ہو چکے ہیں۔ وہ در پے خلافت نہ رہے۔ دستبردار ہو گئے اور اس مدت 30 سال میں صرف چار حضرات ہی کامل خلیفہ ہوئے اور فضیلت بھی صرف ان چار میں ترتیب وار دائر ہوئی اور امت نے بالاتفاق انہیں ہی خلفائے راشدین رضی اللہ عنہم کہا اور جو ان چار کو مانے اسے اہلِ سنت ٹھہرایا۔ کسی نے نہ کہا کہ پانچویں درجے کی فضیلت حضرت حسن رضی اللہ عنہ کی ہے اور یہ کہ خلفائے راشدین رضی اللہ عنہم پنجتن ہیں۔ تیرہویں صدی کے آخر میں حضرت مولانا احمد علی سہارنپوری رحمۃ اللہ (1297ھ) اور حضرت مولانا محمد قاسم نانوتوی رحمۃ اللہ (1297 ہجری) اپنے اسلاف کی راہ پر چلے ہیں اور آیتِ استخلاف کا مصداق انہوں نے بھی چار خلفائے راشدین رضی اللہ عنہم کو ہی قرار دیا ہے۔

(حاشیہ صحیح بخاری: جلد 1 صفحہ 515)

ترجمہ: ابو منصور بغدادی رحمۃ اللہ کہتے ہیں ہمارے اصحاب کا اجماع ہے کہ صحابہ کرام رضی اللہ عنہم میں سب سے افضل علی الترتیب خلفائے اربعہ رضی اللہ عنہم ہیں پھر عشرہ مبشرہ اور پھر اہلِ بدر اللہ ان سے راضی ہوا۔

غور کیجیئے خلفائے اربعہ رضی اللہ عنہم کے بعد عشرہ مبشرہ کا درجہ ہے۔ ابو منصور بغدادی رحمۃ اللہ میں ہوئے ہیں محدث سہارنپوری رحمۃ اللہ تیرہویں صدی کے اواخر میں ان سے نقل کر رہے ہیں کہ اس امت میں افضل ترین حضرات خلفائے اربعہ ہوئے ہیں۔ کوئی شخص پانچ خلفاء کا تذکرہ نہیں کرتا اور کوئی شخص اس کا مدعی نظر نہیں آتا کہ جو خلیفہ خلافت چھوڑ دے۔ تاریخ اسے خلفائے کاملین میں جگہ دے۔

اہل سنت گو سب کو خلیفہ کہیں پر خلیفہ برحق اور خلیفہ راشد چار کو سمجھتے ہیں۔

(آئنہ: صفحہ 189)

یہاں برحق سے مراد خلافت موعودہ ہے جس کا اس وقت کے مومنین کو وعدہ دیا گیا تھا۔ اور وہ انہی چار کو ملی۔ حضرت حسن رضی اللہ عنہ کو ملی تو تھی لیکن وہ ایک علاقائی امارت تھی اپنے عقد میں پوری مملکتِ اسلامی کے لیے نہ تھی۔ تاہم آپؓ اس کو پورا نہ کر سکے اور اس سے دستبردار ہو گئے۔ ان ایام کو خلافتِ راشدہ میں شمار کرنے کے باوجود خلفائے راشدین رضی اللہ عنہم چار ہی ذکر کیے جاتے ہیں اور پانچواں نام ان سے علیحدہ ذکر کیا جاتا ہے۔ ایک دوسری جگہ لکھتے ہیں خلفائے راشدین رضی اللہ عنہم تو ان کے نزدیک (اہلِ سنت کے نزدیک) پانچ ہیں چار یار اور ایک سیدنا حسنؓ۔

(الاصول الخاملہ: صفحہ 39)

دیکھیے یہاں چار کا لفظ ان کے لیے یکجا ذکر کیا ہے اور پانچویں خلیفہ بایں طور ان سے ملحق ہیں کہ ان کے ایامِ خلافت بھی راشدہ میں شمار ہیں۔

(1329 ہجری) مولانا احمد رضا خان رحمۃاللہ کے مدرسہ منظر الاسلام بریلی کا پہلا سالانہ جلسہ 1329ھ میں ہوا مولانا کے معتمد خصوصی قاضی خلیل الدین رحمۃاللہ نے جو حافظ تخلص کرتے تھے مولانا کے سامنے خلفائے راشدین رضی اللہ عنہم کے حضور یہ نظرانہ پیش کیا۔

ہیں ارکان اسلام اصحاب چاروں۔

کہ چاروں نے ترتیب سے کی خلافت۔

وہ صدیقؓ و فاروقؓ و عثمانؓ و حیدرؓ۔

جو پیرو ہو سب کا وہ ہے اہلِ سنت۔

اس میں اس بات کی تشریح ہے کہ خلفائے اربعہ کی پیروی کا اقرار اہلِ سنت کا ہمیشہ سے امتیازی نشان رہا ہے۔

حضور اقدسﷺ کی وفات کے بعد تمام مسلمانوں کے اتفاق سے سیدنا ابوبکر صدیقؓ حضورﷺ کے قائم مقام بنائے گئے اس لیے یہ خلیفہ اول ہیں۔ ان کے بعد سیدنا عمر فاروقؓ دوسرے خلیفہ ہوئے۔ ان کے بعد سیدنا عثمانؓ تیسرے خلیفہ ہوئے۔ ان کے بعد سیدنا علیؓ چوتھے خلیفہ ہوئے۔ ان چاروں کو خلفائے اربعہ اور خلفائے راشدین رضی اللہ عنہم اور چار یار کہتے ہیں۔ 

(تعلیم الاسلام: حصہ 3 صفحہ 18)

چاروں حضرات حق کا نشان بنے

ابھی صحابہ کرام رضی اللہ عنہم موجود تھے کہ تشیع اور خوارج کے فتنے اٹھ کھڑے ہوئے تھے۔ یہود نے ابتداء میں تشیع کو صرف سیاسی جماعت کی شکل دی تھی۔ لیکن خوارج شروع سے ہی ایک مذہبی اختلاف لے کر اٹھے تھے ان دنوں اہلِ حق انہی چار حضرات رضی اللہ عنہم کی عقیدت سے پہچانے جاتے تھے۔ حضرت عبداللہ بن خباب رضی اللہ عنہ(37 ہجری) کو خارجیوں نے گھیر لیا اور پوچھا من انت؟ (تو کون ہے؟) انہوں نے کہا کہ میں صحابی رسول عبداللہ بن خباب ہوں انہوں نے پھر ان سے چاروں کے بارے میں پوچھا۔

(اسد الغابہ: جلد 3 صفحہ 150)

سیدنا عبداللہ بن خبابؓ نے چاروں کے خیر ہونے کی شہادت دی۔ انہوں نے اس پر انہیں قتل کر دیا۔ اس سے پتہ چلتا ہے کہ ان دنوں اہلِ حق کا نشان ان چاروں کی عقیدت تھی۔ اسلام کی یہ 14 صدیوں کی شہادت آپ کے سامنے ہے۔