مجھے ایک واقعہ یاد آ رہا ہے کہ انڈیا میں انگریزوں کے آنے سے پہلے بھی مغلوں کی حکومت تھی اس میں ایک بادشاہ کا نام آپ نے سنا ہو گا جہانگیر تو جہانگیر کی ملکہ محترمہ نور جہاں ایران سے آئی ہوئی تھی اس نے جہانگیر کو کہا کہ ہندوستان میں بڑے بڑے علماء ہیں تو ہمارے عقیدہ کا بھی کوئی عالم ایران سے منگوالو (تو اس زمانے میں بھی یہی تھا کہ بیوی کی بات کو رد کرنا بڑا مشکل ہوتا تھا) تو جہانگیر نے کہا ٹھیک ہے تو ایک شیعہ عالم قاضی نور اللہ شوشتری ہندوستان میں آیا یہ شیعوں کا بڑا مولوی تھا اسے انڈیا میں بلایا گیا اس کی قبر بھی آگرہ میں ہے تو اس نے یہاں آ کر ایک کتاب لکھی اور ممکن ہے ایران میں لکھی ہو کتاب کا نام مجالس المومنین ہے تو مجالس المومنین میں اس نے اس سوال کو نقل کیا کہ لوگ پوچھتے ہیں کہ حضرت علیؓ نے تراویح (جو پورا مہینہ پھیلی ہوئی ہے) اور جمعہ کی دو اذانیں (یہ دو اعمال) بند کیوں نہیں کیے؟ تو ایران میں تو یہ صدا لگتی تھی کہ حضرت علیؓ چوتھے خلیفہ اول ہیں لیکن تاریخ بتاتی تھی کہ نہیں وہ چوتھے ہیں خلافت پر اتفاق ہے صرف یہ کہ وہ چوتھے ہیں یا پہلے ہیں تو قاضی نور اللہ شوشتری نے اس کا جواب دیا کہ تم یہ پوچھتے ہو کہ سیدنا علیؓ جو ہیں وہ اپنے اختیار سے خلیفہ علی الاطلاق تھے خلیفہ اول تھے تو انہوں نے بند کیوں نہ کیے؟ تو قاضی نور اللہ شوشتری نے اس کے جواب میں جو لکھا ہے وہ بڑے سنہری الفاظ سے لکھنے کے لائق ہے اور تاریخ نے یہ شہادت محفوظ کر لی ہے انہوں نے کہا کہ سیدنا علیؓ کے دور میں بھی یہ تھا کہ سیدنا ابو بکر صدیقؓ و سیدنا عمرؓ لوگوں کے دلوں پر حکومت کرتے تھے:
حضرت امیر در ایام خلافت خود دید کہ اکثر مردم حسن سیرت ابوبکر و عمر را معتقد اند ایشاں را برحق می دانند قدرت بر آن نداشت کہ کاری کند کہ دلالت بر فساد خلافت ایشاں داشتہ باشد اکثر اہل آن زمان را اعتقاد بود کہ امامت حضرت امیر مبنی بر امامت ایشاں است و فساد امامت ایشاں را دلیل فساد امامت او می دانند۔ (مجالس المومنین: جلد 1، صفحہ 54)
ترجمہ: سیدنا علیؓ نے اپنے دورِ خلافت میں دیکھا کہ لوگ بڑی کثرت سے سیدنا ابوبکرؓ و سیدنا عمرؓ کے حسنِ سیرت کے معتقد ہیں اور انہیں خلفائے حق مانتے ہیں سو آپ اس پر قادر نہ تھے کہ کوئی ایسا کام کریں جس سے پتہ چلے کہ ان کی خلافت حق نہ تھی اس زمانے کے اکثر لوگ یہ عقیدہ رکھتے تھے کہ سیدنا علیؓ کی خلافت انہی کی خلافت پر مبنی ہے اور اگر سیدنا ابوبکرؓ و سیدنا عمرؓ کی خلافت کو غلط سمجھا جائے تو اس سے سیدنا علیؓ کی خلافت بھی غلط سمجھی جائے گی۔
سیدنا ابوبکرؓ و سیدنا عمرؓ تو دنیا سے جا چکے اور آخرت میں اپنے خیمے لگا چکے لیکن لوگوں کے دلوں پر ابھی تک ان کا قبضہ ہے تو سیدنا علیؓ باوجود خلیفہ ہونے کے استطاعت نہ رکھتے تھے کہ کوئی ایسا کام کریں کہ جس سے پتہ چلے کہ یہ علی الاطلاق خلیفہ اول نہیں اسی لیے سیدنا علیؓ نے ساری عمر وہی پالیسی اختیار کی جو سیدنا ابوبکرؓ و سیدنا عمرؓ سے چلی آ رہی تھی اس لیے اگر سیدنا علیؓ کوئی ایسی بات کرتے جو سیدنا ابوبکرؓ و سیدنا عمرؓ کے خلاف ہو سارے سمجھتے کہ اگر ان کی خلافت صحیح نہیں تو پھر ان کی بھی صحیح نہیں تو سیدنا علیؓ کا اپنا اعتقاد تھا کہ جو لوگ پہلے سے جو کچھ مانتے چلے آ رہے ہیں میں اگر ان کے خلاف کوئی بات کروں گا تو لوگ میری خلافت بھی نہیں مانیں گے مجالس المومنین اب بھی ایران اور ہندوستان سے چھپی ہوئی ملتی ہے اور میرے (حضرت علامہ صاحب کے) پاس بھی موجود ہے اس میں یہ ارشاد ہے کہ سیدنا علی المرتضیٰؓ نے دیکھا کہ:
اکثر اہل آں زمان را اعتقاد بود کہ امامت حضرت امیر مبنی بر امامت ایشاں است و فساد امامت ایشاں را دلیل فساد امامت او می دانند۔(مجالس المومنین: جلد 1، صفحہ 54)
کہ اس وقت کے اکثر لوگوں کا یہی اعتقاد تھا کہ سیدنا علیؓ کی خلافت پہلی تین خلافتوں پر مبنی ہے تو پھر سیدنا علی المرتضیٰؓ کے بارے میں صحیح عقیدہ کیا ہے؟ کہ وہ چوتھے ہیں یا پہلے؟ وہ چوتھے خلیفہ ہیں تو سیدنا علیؓ اپنے دورِ حکومت میں بھی انہیں پہلوں کے ساتھ رہے اور کوئی نئی بات نہ ہوئی۔
(ہو سکتا ہے یہاں کسی کے ذہن میں یہ سوال پیدا ہو کہ ایک روایت ملتی ہے کہ سیدنا عمرؓ کی وفات کے بعد سیدنا عبدالرحمٰن بن عوفؓ نے سیدنا علیؓ سے سیرت شیخینؓ کی پابندی کی بات کی تو آپ نے انکار کر دیا اس سوال کے جواب کے لیے اور اس روایت کی حیثیت جاننے کے لیے حضرت علامہ صاحب کی ایک تحریر نقل کی جاتی ہے:
جواباً گزارش ہے کہ یہ روایت غلط ہے اور شیعہ کی ایجاد ہے اس میں ابو مخنف ایک راوی ہے جو مذہباً شیعہ تھا اور کچھ اور غیر معروف نام ہیں جو ان لوگوں نے ایسی روایات کے لیے گھڑ رکھے ہیں جیسے سالم بن جنادہ، سلیمان بن عبد العزیز بن ابی ثابت، اور نہیں کہا جا سکتا یہ کون لوگ تھے اور کیسے رواۃ تھے سو اس قسم کی روایات کو وزن دے کر تاریخ کے ان یقینی واقعات کو ٹھکرایا نہیں جا سکتا جن میں سیدنا علیؓ نے سیدنا عمرؓ کو دل سے اپنا بزرگ اور پیشوا مانا ہے ۔
حافظ ابنِ کثیر رحمۃاللہ لکھتے ہیں:
عن رجال لا يعرفون ان عليا قال لعبد الرحمٰن بن عوف الى غير ذلك من الاخبار المخالفة لما ثبت فی الصحاح فهی مردودة على قائلیها و ناقليها۔(البدايہ)
ترجمہ: ان لوگوں سے جن کا پتہ ہی نہیں مروی ہے کہ سیدنا علیؓ نے سیدنا عبد الرحمٰن بن عوفؓ کو کہا ہم سے دھوکا کیا گیا ہے اس قسم کی اور روایات بھی ہیں جو ان روایات سے جو صحیح ہیں تکرار ہی ہیں سو انہیں ان کے قائلین اور ناقلین پر ہی لوٹایا جائے گا قبول نہ کیا جائے گا۔
اگر کوئی ایسی روایات ہوں بھی تو دوسرے شواہد کی روشنی میں اس کا مطلب اس کے سوا کچھ نہیں کہ آپ نے ایسی بات بطورِ انکساری کہی ہو گی کہ کہاں میں اور کہاں سیدنا ابوبکرؓ و سیدنا عمرؓ کی عزیمتیں، میں تو ان کی سیرت پر نہ چل سکوں گا ایسے موقع پر اگر کہیں کوئی اقرار بھی کرے تو متواضع لوگ یہی سمجھتے ہیں کہ ہاں اپنی ہمت کے مطابق ہم کوشش ضرور کریں گے طبری کی ایک روایت میں یہ پیرایہ بیان بھی ملتا ہے کہ سیدنا عبد الرحمٰن بن عوفؓ نے آپ کو کہا:
عليك عهد الله و ميثاقه لتعلمن بكتاب الله و سنته رسوله و سيرة الخليفتين من بعده۔
ترجمہ: آپ پر خدا کا عہد اور اققرار ہے کہ کتاب اللہ اس کے رسول برحق کے جو دو جانشین ہوئے ان کی سیرت پر چلیں گے۔
اس پر سیدنا علیؓ نے فرمایا:ارجو ان افعل واعمل بمبلغ علمی وطاقتی۔ (طبری: جلد 5، صفحہ 37)
ترجمہ: میں امید کرتا ہوں کہ کر سکوں گا اور اپنے علم اور عزیمت کی حد تک اس پر عمل کر سکوں گا۔
کیا یہ روایت اس بات کی تائید نہیں کرتی کہ اگر کہیں آپ سے انکار بھی منقول ہو تو وہ محض ایک انکساری اور تواضع کی وجہ سے ہو گا اور اس تشریح سے ان روایات کے ساتھ تطبیق بھی ہو جاتی ہے جن میں آپ کا اقرار پیروی موجود ہے۔
پھر اس بات کی تائید اس سے بھی ہوتی ہے کہ سیدنا علیؓ جب خلیفہ بنے تو انہوں نے اس وقت ان تمام شرطوں کا اقرار کیا تھا جو سیدنا عثمانؓ کے عقد خلافت کے وقت ان سے لی گئی تھیں اگر وہ ذہنی طور پر سیرتِ شیخینؓ سے جدا ہوتے تو اس اگلے وقت میں وہ اس کا اقرار کیوں کرتے شریف رضی نقل کرتا ہے کہ آپ نے اپنی خلافت کے اثبات میں ایک یہ بات بھی کہی تھی:
بايعنی القوم الذين بایعوا ابا بکر و عمر و عثمان علی ما بایعوهم علیه۔(نہج البلاغہ)
ترجمہ: میری بیعت ان لوگوں نے کی ہے جنہوں نے سیدنا ابوبکر صدیقؓ اور سیدنا عمرؓ اور سیدنا عثمانؓ کی بیعت کی تھی اور انہی شرطوں پر انہوں نے میری بیعت کی ہے جو شرطیں ان کی بیعت کے وقت ان سے لی گئی تھیں۔
جب آپ کی خلافت ان تمام شرطوں سے وجود میں آئی جو سیدنا ابوبکرؓ سیدنا عمرؓ اور سیدنا عثمانؓ کی خلافتوں کے وقت لی گئیں تو پھر آپ سیرت شیخینؓ کی اصولی رہنمائی سے کس طرح اپنے آپ کو نکال سکتے تھے۔
پھر سیدنا حسنؓ نے جب زمام خلافتِ سیدنا امیرِ معاویہؓ کے ہاتھ میں دی تو کیا انہوں نے اس سے یہ اقرار نہ لیا کہ وہ اپنی حکومت کتاب و سنت اور خلفائے راشدینؓ کے طریق پر چلائیں گے۔(دیکھیے حبیب سیر: جلد 2 صفحہ 14کشف الغمہ)
کیا یہ ہو سکتا ہے کہ سیدنا حسنؓ اس شرط کو عقد خلافت میں لا رہے ہوں جس سے ان کے والد مرحوم کے عقد خلافت میں قبول کرنے کے لیے تیار نہ تھے یہ واقعات بتا رہے ہیں کہ اگر سیدنا علیؓ نے کہیں اس سے انکار بھی کیا ہو تو وہ محض انکساری اور تواضع کے طور پر ہو گا کہ ان حضرات کی سیرتیں اور عزیمتیں اور کہاں ہیں۔
سو جن لوگوں نے انکار کو انکساری اور تواضع سے ہٹا کر اس کی بناء ذہنی مخالفت اور قلبی عداوت پر رکھی ہے وہ تحقیق کے میدان کے لوگ نہیں ان کے دلوں میں ایک آگ ہے جو مختلف پیرایوں میں ایسی موضوع روایات کے سہارے بھڑکتی رہتی ہے،
حافظ ابنِ کثیر رحمۃاللہ لکھتے ہیں:يتوهم كثير من الرافضة واغبياء القصاص الذی لا تميز عندهم بين صحيح الاخبار وضعيفها ومستقيمها وسقيمها۔ (البدايہ)
ترجمہ: (اس قسم کی باتیں) ان رافضیوں اور غبی قصہ خوانوں کا وہم ہے جو صحیح و ضعیف خبروں میں تمیز نہیں رکھتے اور ثابت اور کمزور باتوں میں فرق نہیں کر سکتے۔
پھر اس احتمال کو بھی نظر انداز نہیں کیا جا سکتا کہ سیدنا علیؓ کا قدم ولایت میں بہت راسخ تھا اصل تصوف کے تین سلسلے قادری چشتی اور سہر وردی انہی سے جاری بتلائے جاتے ہیں سو یہ بات بھی ذہن میں آتی ہے کہ آپ اہلِ کشف میں سے بھی ہوں گے گو یہ ضروری نہیں کہ وقت کے تمام سیاسی حقائق آپ پر مکشوف ہوئے ہوں سو اگر یہ تکوینی راز آپ پر کھل گیا ہو کہ آپ سیدنا ابوبکرؓ اور سیدنا عمرؓ کی طرح مدینہ منورہ میں نہیں رہیں گے یا ساری قلمرو اسلامی کو آپ متحد نہ رکھ سکیں گے اور اس انکشاف پر آپ نے کہہ دیا ہو کہ سیرت شیخینؓ پر عمل کیسے کر سکوں گا کہ یہ کوئی تعجب کی بات نہیں اور یہ بات عملاً بھی صحیح ہے کہ آپ مدینہ کو اپنا دارالحکومت نہ رکھ سکے جو خلفائے ثلاثہؓ کا دار الحکومت تھا۔
پھر یہ بات بھی ہے کہ آپ سیدنا عمرؓ کے فضائل بیان کرتے ہوئے یہ بات صراحت سے کہتے تھے کہ آپ سیدنا ابوبکرؓ کی سیرت پر چلے ہیں سو یہ بات اگر خود ان کے ہاں عیب ہوتی تو وہ اسے فضائل عمرؓ میں کیوں ذکر کرتے، ایک دن آپ منبر پر تشریف لائے اور فرمایا:
قبض رسول اللّٰہ ﷺ واستخلف ابوبكر فعمل بعملہ و سار بسيرته حتىٰ قبضه الله على ذلك ثم استخلف عمر فعمل بعملهما وسار بسيرتهما حتى قبضه الله على ذلك۔(مسند احمد: جلد 1، صفحہ 128، مجمع الزوائد: جلد 5، صفحہ 176)
ترجمہ: آنحضرتﷺ کی وفات ہوئی اور سیدنا ابوبکر صدیقؓ خلیفہ بنائے گئے تو آپ حضور کے ہی عمل پر چلے اور آپ کی سیرت پر عمل پیرا ہوئے یہاں تک کہ اللہ تعالیٰ نے آپ کو وفات دی پھر سیدنا عمرؓ خلیفہ ہوئے تو آپ بھی اپنے ان دوستوں پیشرووں کی سیرت پر چلتے رہے یہاں تک کہ آپ کو اللہ تعالیٰ نے اسی عمل پر وفات دی۔
سیدنا علیؓ کس طرح سیرت عمرؓ پر چلے؟
شریک حضرت زبیرؓ سے روایت کرتے ہیں وہ فرماتے ہیں:
كان علی يشبه بعمر يعنى فی السيرة۔
(کتاب الخراج ليعى بن آدم: جلد 203، صفحہ 24)
سب حضرات جانتے ہیں کہ کوفہ چھاؤنی سیدنا عمرؓ ہی کی قائم کی تھی اور یہیں سیدنا علیؓ اپنے عہدِ خلافت میں تشریف لے آئے تھے آپ نے کوفہ آ کر ان تمام باتوں کو بحال رکھا جو سیدنا عمرؓ کی قائم کردہ تھیں کیا یہ صریح طور پر سیدنا عمرؓ کی سیرت کی پابندی نہیں؟ اور پھر اس کی حد بندی کوفہ تک نہ تھی آپ نے اسے ایک اصول کے طور پر قبول فرمایا۔
اس قسم کے بیسیوں واقعات ہیں جن سے پتہ چلتا ہے کہ آپ بڑی شدت سے سیدنا عمرؓ کی پالیسیوں کو اپناتے ہوئے تھے اپنی سیرت و کردار میں آپ کی یہی کوشش ہوتی کہ جہاں تک ہو سکے کتاب و سنت کے ساتھ ساتھ سیرتِ شیخینؓ کی بھی پابندی کرتے رہیں اور اب یہ کوئی نظریاتی بات نہ رہی تھی جس میں اقرار و انکار کے احتمالات موجود ہوں یہ بات اب واقعات میں جلوہ گر تھی کہ آپ عملاً سیدنا عمرؓ کو اپنا پیشرو اور پیشوا سمجھتے تھے
اور یہ بات درست نہیں کہ حضرت عمر رضی اللہ عنہ کی شہادت کے بعد آپ نے حضرت عبد الرحمٰن بن عوفؓ کے سامنے سیرتِ شیخینؓ کی پابندی قبول کرنے سے انکار کیا تھا یہ بات شیعہ راویوں کی روایت ہے جو صحیح نہیں صحیح یہ ہے کہ آپ کی بیعت انہی شرطوں پر کی گئی تھی جو شرطیں آپ کے پیشرووں سے لی گئی تھیں۔
(خلفائے راشدینؓ: جلد 1، صفحہ 359، 363)
اور جب سیدنا علیؓ شہید ہوئے، تو قوم نے ان کا جانشین سیدنا حسنؓ کو چنا یعنی عراق میں کس کو؟ سیدنا حسنؓ کو۔