لیکن ایک ہے غم کا احساس ہونا، اور ایک ہے غم کو منانا، غم کو منانا کسے کہتے ہیں؟ میں نے بھی دیکھا ہے ہندوؤں کے دور کو تو ہمیں پتا ہے، ہمارے ہمسائے ہندو بھی رہے، ہم نے ان کے گھروں کو بھی دیکھا، ان کی مذہبی رسوم کو بھی دیکھا، ان کے ہاں یہ عقیدہ تھا، کہ جب کوئی مر جائے، تو مرنے والے کی روح گھروں میں بار بار آتی ہے، یعنی فوت شدگان کی روحیں گھروں میں آتی ہیں، تو یہ ہندوؤں کا عقیدہ تھا، اور یہ (ہندو) کہتے تھے کہ وہ نہ آئیں، تو اس کے لیے عورتیں جمع ہوتی تھیں، اور کہتی تھیں کہ جو فوت ہو گیا، اب اس کا سیاپا کرنا ہے، تو سیاپا کیا تھا؟ کہ عورتیں دائرہ باندھ کر گھر میں کھڑی ہو جاتیں، اور وہ آہستہ آہستہ ہاتھ سروں پر مارتیں، اور پھر دو چار منٹ کے بعد اپنے آپ کی چھاتی کو کوٹنا مارنا شروع کر دیتی اور ہندو اسے کہتے ہیں سیاپا کرنا، ان کے ہاں یہ بہت بڑی نیکی ہے، اور اس کے ساتھ وہ جو روحیں آتی ہیں، ان کو کہتی ہیں کہ ہماری یہ کتنی خیر خواہ ہیں، کتنے پیارے ہیں، کتنی خیر خواہ ہیں کہ میرے لیے آنسو بہا رہی ہیں اور کتنا خون بہا رہی ہیں، تو یہ سیاپا کرنا رواج تھا، جنہوں نے وہ دور پایا، اور جو لوگ اب انڈیا گئے ہیں انہوں نے انڈیا آتے جاتے وہاں یہ عمل بار بار دیکھا ہوگا۔
اللہ تبارک وتعالیٰ سیاپا کرنے والیوں سے بھی بچائے، اور سیاپا کرنے والوں سے بھی بچائے، اب ہم یہ نہیں کہتے کہ سیدنا حسینؓ کی اس شہادت کربلا پر یہ جو منظر پیش کیا جاتا ہے، یہ کیسا ہے، کیوں؟ ہم کسی کا نام نہیں لیتے اور کسی کا دل بھی نہیں دکھاتے، اور اس چٹ کا میں جواب نہیں دیتا، کہ سیدنا علیؓ کی اولاد ایسا کرتی تھی کہ نہیں یہ ان سے پوچھو جو کرتے ہیں میں نہیں دیتا جواب، کریں وہ اور جواب ہم دیں، یہ کون سا انصاف ہے، ہم سے تو وہ پوچھو جو ہم کرتے ہیں۔
سوال: کیا سوگ کی اجازت صرف تین دن تک ہے؟
جواب: یہ اجازت صرف سوگ کی ہے، ماتم کی پھر بھی نہیں، کیوں کہ سوگ اکیلے ہوتا ہے، سوگ کے لیے مجلس نہیں کی جاتی، تو سوگ میں صرف اتنا ہے، کہ اگر کوئی شخص فوت ہو گیا، تو گھر والے کھانا نہیں پکاتے، وہ غم میں بھرے ہوئے ہیں، تو ان کے رشتہ دار یا ہمسائے ان کو کھانا کھلائیں اور تین دن تک یہ کریں، تو یہ ہے سوگ، اور تین دن کے بعد اللہ کی رضا پر راضی ہونے کا اعلان کریں، کہ جو ہو گیا وہ تو گیا، اور جو رہ گیا، انہوں نے بھی جانا ہے اِنَّا لِلّٰهِ وَاِنَّـآ اِلَيۡهِ رٰجِعُوۡنَ ۞(سورۃ البقرہ: آیت 156)
جانے والوں کے لیے اِنَّا لِلّٰهِ اور اپنے لیے وَاِنَّـآ اِلَيۡهِ رٰجِعُوۡنَ ۞(سورۃ البقرہ: آیت 156)
کہ ہم نے بھی جانا ہے لہٰذا صبر کرو، تو سوگ کے کتنے دن ہیں؟ (تین دن) لیکن یہ اجتماعی ماتم کرنا کس طرح؟ مثلاً میں اگر آپ کو کہوں کہ مؤمنین کرام! سیدنا حسینؓ کے غم میں ہم صبح اتنے بجے روئیں گے، اس طرح اگر کسی مجلس میں اعلان کیا جائے، کہ ہم اتنے بجے روئیں گے تو یہ اجتماعی سوگ ہو گیا یا انفرادی؟ (اجتماعی)، تو سوگ ہے لیکن انفرادی اس کو اجتماعی شکل نہیں دینی، بلکہ اللہ کی رضا پر راضی ہونا ہے تو یہ وقت مقرر کر کے رونا کہ کتنی دیر روئیں گے وہ کہتا ہے میں اتنے بجے رولوں گا، تیسرا کہتا ہے نہیں میں تو اتنے بجے روؤں گا، تو وقت مقرر کر کے رونا اس کی تو ہمیں سمجھ نہیں آتی، یہ بھی انہی سے پوچھو جو ایسا کرتے ہیں، ہم کیوں جواب دیں۔
(یہاں قارئین کے لیے اس عنوان پر حضرت مولانا عبد الستار تونسوی رحمۃاللہ سے کیے گئے ایک استفسار اور اس کے جواب کو بھی نقل کیا جاتا ہے:
سوال: اسلام میں کسی کی موت یا شہادت کے بعد کتنے عرصہ تک سوگ اور غمی کے باعث زیب و زینت ترک کرنے کی اجازت ہے؟
جواب: عورت کا خاوند فوت ہو تو اس کو چار ماہ دس دن تک حکم ہے کہ حالتِ سوگ میں رہے زیب و زینت نہ کرے خوشبو نہ لگائے اس کے علاوہ کسی کی فوتگی کے بعد تین دن سے زیادہ سوگ میں رہنے کی اجازت نہیں کہ زیب و زینت ترک کیا جائے اور شادی نکاح وغیرہ کو بھی ترک کیا جائے جیسے کہ بعض لوگ کہتے ہیں اور سمجھتے ہیں کہ فلاں فلاں ایام اور فلاں مہینے میں شادی بیاہ نہ کرو کہ اس میں فلاں بزرگ کو تکلیف اور ان کی وفات اور شہادت ہوئی تھی کیونکہ اس طرح تو سارے سال کے کسی مہینے اور دن میں زیب و زینت شادی نکاح کرنے کی اجازت نہ مل سکے گی کیونکہ سال کا کوئی دن ایسا نہیں کہ جس میں کسی نبی، صحابی، امام، ولی، غوث و قطب کی وفات یا شہادت نہ ہوئی ہو۔ تو اس قسم کے اوہام و ظنون اور رسم و رواج کی اسلام میں کوئی حقیقت نہیں۔(مجموعہ رسائل، رسالہ حقیقت ماتم: صفحہ 203، ناشر: شعبہ نشر و اشاعت تنظیم اہل سنت پاکستان)
سوال: قرآن وحدیث کی روشنی میں بتائیں کہ صف اول کے مسلمانوں میں ماتم کی مجلسیں کبھی منعقد ہوتی تھیں یا سوگ انفرادی طور پر ہی ہوتا تھا۔
جواب: وہ میں نے تو بتا دیا، ایک دفعہ ایک مجلس میں کسی ذاکر سے پوچھا گیا کہ یہ ماتھے کو پیٹنا کیسا ہے؟ تو ایک ذاکر کہنے لگے کہ یہ قرآن سے ثابت ہے، کہ ایسا کس نے کیا تھا؟ کہ جی حضرت ابراہیم علیہ السلام کی بیوی نے کیا تھا۔ وہ کہاں؟ حضرت ابراہیم علیہ السلام کی بیوی حضرت ہاجرہ علیہا السلام تھیں ان سے جو بیٹے تھے ان کا نام اسماعیل علیہ السلام تھا۔ حضرت ہاجرہ علیہا السلام کے بیٹے جن کو قربانی کے لیے پیش کیا تھا، ان کا کیا نام تھا؟ (حضرت اسماعیل علیہ السلام) جو ہمارے عربوں کے جدِ اعلیٰ ہیں، ہم ان کی اولاد ہیں تو حضرت اسماعیل علیہ السلام تو حضرت ہاجرہ علیہا السلام کے بیٹے تھے، لیکن حضرت ابراہیم علیہ السلام کی جو پہلی بیوی سارہ تھیں ان کا بچہ نہیں تھا۔ (تو عورتوں کو بچہ ہونے سے بڑی خوشی ہوتی ہے) وہ ساری عمر محسوس کرتی رہیں، خاص طور پر 16 سال تک یا غالباً 14 سال تک کہ میرا بچہ نہیں (واللہ اعلم)۔
اللہ تعالیٰ کو منظور تھا، کہ ان کے ہاں بھی ہو گا تو فرشتے آئے، انہوں نے حضرت ابراہیم علیہ السلام کو خبر دی، کہ آپ کی بیوی کے ہاں بچہ ہوگا: وَبَشَّرۡنٰهُ بِاِسۡحٰقَ نَبِيًّا الخ۔ (سورۃ الصافات: آیت 112)
ترجمہ: ہم نے ابراہیم کو بشارت دی کہ آپ کے ہاں بچہ ہوگا، اور وہ نبی بھی ہوگا تو قرآنِ کریم میں ہے کہ حضرت سارہ علیہا السلام حیران ہوئیں کیونکہ حضرت سارہ علیہا السلام بوڑھی تھیں، اور حضرت ابراہیم علیہ السلام اس وقت کتنی عمر کے تھے؟ (100 سال)۔
اور جب حضرت اسماعیل علیہ السلام پیدا ہوئے تھے تو اس وقت ان (حضرت ابراہیم علیہ السلام) کی عمر غالباً 80 یا 87 سال کی تھی۔ خیر اسے چھوڑو
تو جب حضرت ابراہیم 100 سال کے ہیں تو حضرت سارہ علیہا السلام بھی تو بوڑھی عورت تھیں جب خدا کے فرشتوں نے آ کر پکارا، کہ ان کے ہاں بیٹا ہوگا، تو عورتیں جب حیرانی کی بات سنتی ہیں تو کیا کرتی ہیں؟ (انگلی اپنے ہونٹوں پہ رکھتی ہیں) تو یہ انگلی جب اٹھتی ہے تو تعجب کے لیے ہوتی ہے، یہ ہوگا: ءَاَلِدُ الخ(سورۃ ہود: آیت 72)
ترجمہ کہ کیا میں بچہ جنوں گی!؟ کچھ اپنی عمر کا احساس تمنا، جو خاص طور پر پوری ہونے کی تمنا ہوتی ہے، لیکن جب وہ پوری ہونے کے قریب ہو تو تعجب ہی ہو تا ہے تو قرآن پاک نے کہا فَصَكَّتۡ وَجۡهَهَا الخ۔(سورۃ الذاریات: آیت 29)
کہ حضرت ابراہیم علیہ السلام کی بیوی نے اپنے چہرے پر ہاتھ مارا تو جو ہاتھ مارا وہ تعجب کے ساتھ تھا یا ماتم کے لیے؟ (تعجب کے ساتھ)، اس طرح کوئی تعجب کرے، اور انگلی اٹھائے یا ماتھے پر ہاتھ مارے، تو وہ ہاتھ مارنا تعجب ہوتا ہے یا ماتم کے لیے؟ بولو! (تعجب کے لیے) یہ تعجب ہے غم تو نہیں۔ تو شیعہ ذاکر کہتے ہیں ہم نے یہاں سے لیا ہے پیٹنا تو میں کہا کرتا ہوں کہ بھائی اختلاف سے بچو۔ تمہارے ہاں بھی جب بچوں کی بشارت ہو تو پیٹا کرو تو ہم اعتراض نہیں کریں گے، لیکن حتی الوسع کام وہی کرو جو پہلے سے ملے، لیکن کسی کی وفات پر پیٹنا، فرمایا نبی پاکﷺ نے من ضرب الخدود جس نے چہرے پر ہاتھ مارے غم میں، وشق الجیوب اور کپڑے پھاڑے غم میں، ودعا بدعوی الجاھلية اور ہائے ہائے کیا، فلیس منا حضورِ اکرمﷺ فرما گئے وہ ہم میں سے نہیں، تو ہم بھی کہتے ہیں کہ جو یہ کریں وہ ہم میں سے؟ (سامعين: نہیں) ہم یہ تو اس وقت کہتے کہ وہ اپنی مردم شماری علیحدہ کرائیں کا کاغذات میں ان کا نام علیحدہ ہو، ان باتوں میں ہم پڑتے نہیں لیکن حضورِ اکرمﷺ نے فرمایا:
عن النبیﷺ قال لیس منا من ضرب الخدود وشق الجیوب ودعا بدعوی الجاھلية۔
(صحيح بخاری: جلد 2 صفحہ 82 باب ليس منا من ضرب الخدود)
اور سیدنا حسینؓ بھی جب میدان کربلا میں شہید ہونے کے لیے نکلے، تو انہوں نے اپنی بہن کو نصیحت کی، جو ان کی کتابوں میں مذکور ہے، اپنی بہن کو کہا اے خواہر گرامی، اے میری عزت والی بہن، میں تمہیں قسم دیتا ہوں کہ جب میں اگلے جہاں چلا جاؤں، تو اپنے منہ کو پیٹنا نہیں، اور کپڑوں کو پھاڑنا نہیں، بلکہ اللہ تعالیٰ کے فیصلوں پر رضامندی کا اظہار کرنا ہے۔(جلاء العیون: صفحہ 327)
اور بہن میں تجھے وہی بات کہتا ہوں، جو میرے نانے نے اپنے آخری سفر میں وفات سے پہلے سیدہ فاطمہؓ کو کہی تھی تو سیدہ فاطمہؓ کو جب یہ وصیت حضورِ اکرمﷺ نے کی جو سیدنا حسینؓ اپنی بہن کو کر رہے ہیں تو تاریخ نے ان سب کو محفوظ کر لیا ہے، تو اہلِ بیتؓ کے اور سیدنا علی المرتضیٰؓ کے جان پہچان میں وہی طریقے تھے جن کو آج کل اہلِ سنت کے طریقے کہتے ہیں، اور ہمارا دعویٰ ہے کہ صحابہ کرام رضوان اللہ علیہم اجمعین اور اہلِ بیتؓ سب ایک ہی عقیدے کے تھے اور سب اہلِ سنت و الجماعت تھے، ان میں سے کوئی بھی اہلِ سنت سے باہر نہیں ہوگا، اور ہم یقین رکھتے ہیں، کہ جب امام مہدی آئیں گے، وہ بھی اہلِ سنت و الجماعت کے عقیدے پر ہوں گے، وہ جوڑنے والے ہوں گے، توڑنے والے نہیں ہوں گے۔ اس وقت جوڑنے والے کون ہیں؟ جو صحابہ کرام رضوان اللہ علیہم اجمعین اور اہلِ بیتؓ دونوں کو اکٹھا مانتے ہیں وہ جوڑنے والے ہیں، اور جو کہیں کہ نہیں ایک کو مانیں گے دوسرے کو نہیں، آپ اتنا تو سمجھتے ہیں کہ توڑنے والے وہ ہوئے یا ہم؟
(اہلِ سنت کے نزدیک صحابہ کرام رضوان اللہ علیہم اجمعین اور اہلِ بیت رضوان اللہ علیہم اجمعین دونوں کی تعظیم ضروریات مذہب حقہ میں سے ہے اور یہ دونوں اہلِ سنت کے لیے ایمان کی دو آنکھیں سمجھی جاتی ہیں حجۃ الاسلام مولانا محمد قاسم نانوتوی رحمۃ اللہ فرماتے ہیں: حبِ اہلِ بیتؓ و حبِ صحابہ کرام رضوان اللہ علیہم اجمعین ایمان کے دو پر ہیں اہلِ بیتِ رسول تو ہمارے حق میں چشم و چراغ ہیں، ہمارے نزدیک اعتقاد اصحاب اور حبِ اہلِ بیتؓ دونوں کے دونوں ایمان کے لیے بمنزلہ دو پر کے ہیں، دونوں ہی سے کام چلے ہیں جیسے ایک پر سے طائر بلند پرواز نصف پرواز تو کیا ایک بالشت بھی نہیں اڑ سکتا، ایسے ہی ایمان بھی بے ان دو پروں کے سہارے کے موجب فوز مقصود (جس کی طرف وَاُولٰٓئِكَ هُمُ الۡفَآئِزُوۡنَ ۞(سورۃ التوبہ: آیت 20)
یا فَازَ فَوۡزًا عَظِيۡمًا ۞(سورۃ الاحزاب: آیت 71)
وغیرہ میں اشارہ ہے) نہیں ہو سکتا بلکہ ایسا ایمان ایسا ہی ایمان ہے جس کا آیت: لَا يَنۡفَعُ نَفۡسًا اِيۡمَانُهَا الخ۔
(سورۃ الانعام: آیت 158) میں بیان ہے ہاں اگر ہم قدم بہ قدم حضراتِ شیعہ ہوتے تو جیسے انہوں نے موافق مثل مشہور غیروں کی بت شکنی کے لیے اپنی ناک کاٹ لی، سنیوں کی ضد میں اصحابِ کرام رضوان اللہ علیہم اجمعین کو برا کہہ کر اپنے ایمان کا زیان کیا، ہم بھی شیعوں کی ضد میں نعوذ باللہ اہلِ بیتِ رسول کو برا کہہ کر مثلِ خوارج و نواصب اپنے ایمان کو خراب کرتے لیکن ہم تو پابندی عقل و نقل سے نہ چاری ہے نہ شیعہ تو نہیں کہ مثل شتر بے مہار پراگندہ رفتار جائیں۔
حبِ اہلِ بیتؓ و حبِ صحابہ کرام رضوان اللہ علیہم اجمعین ایمان کی دو آنکھیں ہیں:
راہ کی بات تو یہ ہے کہ ہم کو دونوں فریق بمنزلہ دو آنکھوں کے ہیں کس کو پھوڑیں جس کو پھوڑیں اپنا ہی نقصان ہے بلکہ جیسے کوئی حسین متناسب الاعضاء ہو کہ اس کی آنکھ ناک سب کی سب مناسب اور متناسب ہوں اور پھر اس کی ایک آنکھ بیٹھ جائے تو دوسری آنکھ کی زیب بھی جاتی رہے گی اور اس پر اگر بیٹھی ہوئی آنکھ کے حصہ کی فراخی بھی دوسری ہی آنکھ میں آ جائے اور اس میں بجائے سپیدی بھی سیاهی چھا جائے ش بجائے حسن ایسا قبیح المنظر ہو جائے کہ دلدادگان قدیمی اور عاشقان صمیمی بھی اس کی صورت پڑھنے لگیں خاص کر دوسری آنکھ جو باقی رہی ہے بسبب اس کے اپنے اندازہ سے زیادہ فراخ اور کشادہ اور سپیدی کی جا بھی سیاہی ہی ہو گئی ہے، ایسی بری اور بد شکل ہو جائے گی کہ پوچھ نہ پوچھ بلکہ اگر چشم باقی ماندہ کو شعور اور اختیار ہو تو اپنی حالت اصلی پر آ جائے اور دوسری آنکھ کو بھی بدستور قائم کر دکھلائے کیونکہ اپنا حسن بھی اصلی کیفیت اور دوسری آنکھ کی معیت میں ہے۔
شیعوں نے اپنے ایمان کی ایک آنکھ پھوڑ ڈالی:
سو بعینہ یہی قصہ حضرات شیعہ کے ایمان کے ملاحظہ کرنے سے معلوم ہوتا ہے، اعتقادِ صحابہ کرام رضوان اللہ علیہم اجمعین اور اہلِ بیتؓ جو بمقتضائے شہادات کلام اللہ اور عترتِ رسول اللہﷺ ایمان کے لیے بمنزلہ دو آنکھوں کے ہیں چنانچہ رسالہ ہذا کے ملاحظہ کرنے والوں پر پوشیدہ نہ رہے گا ان دونوں آنکھوں میں سے شیعوں نے ایک آنکھ کو پھوڑ دیا اور اس کے حصے کی فراخی اور کشادگی بھی بلکہ اس سے بھی زیادہ دوسری آنکھ کو دے کر اس کو خراب کر دیا یعنی اعتقادِ صحابہ کرام رضوان اللہ علیہم اجمعین کو جو بمنزلہ چشم ایمان ہے اپنے ہاتھوں کھو کر دوسری آنکھ یعنی اہلِ بیتؓ کو اس قدر بڑھایا کہ صحابہ کرام رضوان اللہ علیہم اجمعین کے حصے کی محبت بھی انہی کے لیے صرف کر دی پھر جیسے کہ آنکھ میں سفیدی کی جا بھی سیاہی آ جائے ان حضرات بزرگوار فرقہ مسمی شیعہ نے بھی ایسا ہی کیا۔(ہدیۃ الشیعہ: صفحہ 236، ناشر: ادارہ تالیفات اشرفیہ ملتان)
سوال: فقہ جعفریہ پر جو کتابیں لکھی گئیں ان میں سے کسی میں یہ ہے کہ ہر سال کے بعد عزاداری کے جلوس نکالے جائیں سیدنا حسینؓ کی یاد میں؟
جواب: بھائی ہمیں یہ مسئلہ کہیں نہیں ملا کہ ہر سال اس کے لیے جلوس نکالے جائیں۔
(ان مذکورہ سوالات کی طرح ایک سوال تعزیہ نکالنے کے متعلق بھی سامنے آتا ہے اس سوال اوراس کے جواب کو ہم مولانا عبد الستار نوشوی رحمۃ اللہ کے رسالہ حقیقت ماتم سے یہاں نقل کرتے ہیں:
سوال: کیا تعلیماتِ قرآنیہ اور ارشاداتِ نبویہﷺ اور اقوال و افعال ائمہ کرام علیہم السلام میں تعزیہ سازی کا کوئی ثبوت ملتا ہے اور یہ کچھ نیکی اور ثواب کا کام بھی ہے؟
جواب: قرآنِ مجید اور احادیثِ نبویﷺ اور اقوال و افعال ائمہ اہلِ بیتؓ میں اس کا ذرہ بھر کوئی ثبوت نہیں ملتا اور یہ بالکل بے اصل اور بے بنیاد رسم ہے کیونکہ دین تو جناب رسول اللہﷺ کی حیات طیبہ میں کامل و مکمل ہو چکا تھا جیسا کہ اللہ تعالی نے فرمایا: اَلۡيَوۡمَ اَكۡمَلۡتُ لَـكُمۡ دِيۡنَكُمۡ وَاَ تۡمَمۡتُ عَلَيۡكُمۡ نِعۡمَتِىۡ وَرَضِيۡتُ لَـكُمُ الۡاِسۡلَامَ دِيۡنًا الخ۔(سورۃ المائدہ: آیت 3)
نبی کریمﷺ اور سیدنا علیؓ اور ائمہ اہلِ بیتِ عظام کے صدیوں بعد یہ رسم امیر تیمور کے زمانہ میں ایجاد کی گئی حضورِ اقدسﷺ سے پہلے کئی سو معصوم انبیاء علیہم السلام اللہ تعالیٰ کے دین کے لیے شہید ہو چکے تھے مگر رسول اللہﷺ نے ان مظلوم و معصوم شہید انبیاء علیہم السلام کے لیے کوئی تعزیہ اور ماتم و نوحہ کا طریقہ جاری نہ فرمایا پھر آپﷺ کی مقدس زندگی میں بڑے بڑے جلیل القدر مہاجر و انصار صحابہ کرام رضوان اللہ علیہم اجمعین کفار کے مقابلہ میں بدر، احد، احزاب، خیبر وغیرہ میں دین اسلام کی خاطر بھوک کے پیاسے مظلومانہ شہید ہوئے حتیٰ کہ حضورِ اکرمﷺ کے چچا اسد اللہ سید الشہداء حضرت حمزہ رضی اللہ عنہ اور سیدنا علی المرتضیٰؓ کے بھائی حضرت جعفر طیار رضی اللہ عنہ کی راہ میں ٹکڑے ٹکڑے ہوئے مگر ان حضرات کی عالیشان شہادت کے بعد آنحضرتﷺ، حضرت علی رضی اللہ عنہ انہوں نے کبھی کوئی تعزیہ اور ماتم وغیرہ کا طریقہ جاری نہ کیا اسی طرح سیدنا علیؓ نے سب سے بڑی مصیبت و صدمہ کی بات یعنی حضور پرنورﷺ کی وفات حسرت آیات کے بعد تعزیہ، نوحے، ماتم کا کوئی طریقہ جاری نہ کیا اسی طرح حضراتِ حسنین کریمینؓ نے سیدنا علی المرتضیٰؓ کی شہادت کے بعد تعزیہ اور ماتم و نوحے کی رسم کو جاری نہ کیا اور سیدنا زین العابدینؒ اور سیدنا محمد باقرؒ اور سیدنا جعفر صادقؒ اور سیدنا موسیٰ کاظؒم اور سیدنا علی رضاؒ اور سیدنا محمد تقیؒ اور سیدنا علی نقیؒ اور سیدنا حسن عسکریؒ نے نہ کبھی تعزیہ بنایا اور نہ کبھی کسی کو بنانے کا حکم فرمایا قرآنِ شریف اور حدیثِ پاک اور ائمہ اہلِ بیتؓ پر ایمان و عقیدت رکھنے والوں کے لیے فرض ہے کہ وہ ان کے ارشادات کی پیروی کر کے دنیا اور آخرت میں سرخرو ہوں اسی میں حقیقی کامیابی اور نجات ہے اور یہی جنت کا راستہ ہے اور اس کے علاوہ ایک جدید راستہ اور رسم و رواج دین میں جاری کرنا اور رسول اور ائمہ علیہم السلام سے اپنے آپ کو زیادہ علیم حکیم اور زیادہ معاملہ فہم سمجھنا ہے گویا کہ رسول پاکﷺ اور ائمہ دین ہمارے لیے اس نیکی کو نہ سمجھ سکے اور ہم نے خود سوچ لیا ہے۔
سُبۡحٰنَ رَبِّكَ رَبِّ الۡعِزَّةِ عَمَّا يَصِفُوۡنَ ۞(سورۃ الصافات: آیت 180)(حقیقت ماتم: صفحہ 201)
پاکستان یا انڈیا کی بات ہے کہ ایک صاحب تھے، وہ اہلِ سنت بھائیوں کو کہتے ہیں کہ ہم جب پیٹتے ہیں تو ہاتھ ہمارے ہوتے ہیں چھاتیاں بھی ہماری ہوتی ہیں، اور سر بھی ہمارے ہوتے ہیں تو جو ہم غلط یا صحیح کرتے ہیں تو تم لوگ کیوں ناراض ہوتے ہو؟ عقیدہ ہمارا، زبانیں ہماری، چہرے ہمارے، اور چھاتیاں ہماری، تو ہم غلط کرتے ہیں یا صحیح، تم ناراض کیوں ہوتے ہو؟ تو ہمارے ایک بزرگ حضرت مولانا سید نورالحسن شاہ بخاری ملتانی کے تھے اور پیچھے ڈیرہ غازی خان کے رہنے والے تھے، تو انہوں نے ایک بہت اچھا جواب دیا، انہوں نے کہا کہ حضور! پھر فرمائیں، آپ نے کیا کہا؟ پھر انہوں نے دہرایا کہ آپ نے یہی کہا کہ ہاتھ ہمارے، چہرے ہمارے، چھاتیاں ہماری تو اس پر ناراض کیوں ہوتے ہو؟ تو شاہ صاحبؒ نے اس صاحب کو عجیب جواب دیا، آپ نے کہا پھر یہ بھی کہو کہ
ہاتھ ہمارے،
چہرے ہمارے،
چھاتیاں ہماری
اور محلے بھی ہمارے جب محلے بھی تمہارے اپنے ہوں جہاں یہ جلوس نکلا کریں پھر تو ہو جائے گا امن، اور اگر یہ کہو کہ چہرے ہمارے، چھاتیاں ہماری، ہاتھ ہمارے، اور محلے تمہارے، تو پھر یہاں سے اختلاف پیدا ہوتا ہے، تو اگر محلے دار کہتے ہیں، کہ نہیں آپ یہ اظہار ہمارے سامنے نہ کریں، تو جب آپ پیٹتے ہیں، تو ہمیں گمان ہوتا ہے، کہ شاید یہ ہمیں ہی کوٹ رہے ہیں، سمجھ اپنی اپنی ہے خیال اپنا اپنا ہے، تو شاہ صاحبؒ نے عجیب جواب دیا کہ جب کہتے ہیں ہمارے ہمارے تو پھر یہ بھی کہو کہ پھر علاقے بھی ہمارے، اور محلے بھی ہمارے، دوسروں کے محلوں میں جا کر کہنا، کہ نہیں عقیدہ تو ہمارا ہے، عمل بھی ہمارا ہے رسم بھی ہماری ہے پر ٹھٹھ تمہارا ہے، تمہارے دروازوں پر آ کر ہم یہ کریں گے، تو پھر تو زیادتی ہے یہاں سوچنے کی ضرورت ہے کہ جب کتابوں میں کوئی طریقہ ہو جیسا کہ اب نماز ہے، اس کا طریقہ تو کتابوں میں ہے اگر یہ جلوس نکالنا بھی کوئی دینی کام ہوتا، تو اس کا طریقہ بھی کتابوں میں لکھا ہوتا۔
تو میں آپ سے یہ کہتا ہوں کہ میں نے بات کو شروع سے اٹھا کر یہاں تک پہنچایا، آپ کو یہ تو معلوم ہو گیا کہ حضورِ اکرمﷺ کے بعد آپ کی سیاسی جانشینی کیسے چلی؟ اس کے بعد پھر کیسے چلی، پھر اس کے بعد کیسے چلی اب ہم اس پر آئے کہ سیدنا امیرِ معاویہؓ کا دور حکومت تقریباً بیس سال رہا، جس میں وہ پوری سلطنت اسلامی کے امیر تھے، امیر المؤمنینؓ تھے ان کی جب وفات قریب ہوئی اس کے بعد پھر یہ زمانہ شروع ہوتا ہے جو میں عرض کر رہا ہوں۔
اللہ تعالیٰ نے توفیق عطا فرمائی تو پھر ان شاء اللہ اگلی مجلس میں بات کو آگے چلائیں گے۔
وَمَا عَلَيۡنَاۤ اِلَّا الۡبَلٰغُ الخ۔