سیدنا عمر ایسے اونچے سیاستدان تھے جنہوں نے تاریخ کے ہر موڑ پر مسلمانوں کو ہر ممکن انتشار سے بچایا اور دین کے ہر ضروری کام پر لگایا مثلاً:

1 جمع قرآن کی ضرورت کا احساس پہلے کس کے ذہن میں اترا؟

حضورِ اکرمﷺ کی وفات ہوئی اور حضورِ اکرمﷺ پر نازل ہوا قرآن اب بھی متفرق تحریرات کی صورت میں تھا حضورِ اکرمﷺ کے پڑھنے کے مطابق ایک کتابی صورت میں نہ آیا تھا سیدنا عمرؓ نے قرآن کو یکجا جمع کرنے کی ضرورت اول خلیفہ راشد سیدنا ابوبکر صدیقؓ کے سامنے رکھی یہ ضرورت سب سے پہلے ان کے ذہن میں اٹھی اور سیدنا ابو بکر صدیق رضی اللہ عنہ کا پہلا جواب یہ رہا کہ میں وہ کام کیسے کروں جو حضورِ اکرمﷺ نے نہیں کیا کئی دنوں کے بعد سیدنا ابو بکرؓ نے سیدنا عمرؓ سے کہا اللہ تعالیٰ نے اس کام کے لیے میرا شرح صدر کر دیا ہے جس کی طرف تو نے مجھے توجہ دلائی تھی اور آپ نے حضورِ اکرمﷺ کے عہد کے بڑے کاتب سیدنا زید بن ثابت ؓکو جمع قرآن کا حکم دیا ۔

نامناسب نہ ہو گا کہ ہم یہاں قرآن کی ان چھ منزلوں کا بھی ذکر کر دیں جو ہر مسلمان کو معلوم ہونی چاہئیں:

اول: لوح محفوظ بَلۡ هُوَ قُرۡاٰنٌ مَّجِيۡدٌ ۞(سورۃ البروج: آیت 21)فِىۡ لَوۡحٍ مَّحۡفُوۡظٍ ۞(سورۃ البروج: آیت 22)

دوم: حضرت جبرئیل علیہ السلام نَزَلَ بِهِ الرُّوۡحُ الۡاَمِيۡنُ ۞(سورۃ الشعراء: آیت 193)

سوم: قلب رسولﷺعَلٰى قَلۡبِكَ لِتَكُوۡنَ مِنَ الۡمُنۡذِرِيۡنَ۞(سورۃ الشعراء: آیت 194)

چہارم: کاتبینِ وحی وہ صحابہ کرام رضوان اللہ علیہم اجمعین جو حضورِ اکرمﷺ کے کہنے پر وحی لکھنے پر مامور تھے۔

پنجم: اول خلیفہ راشد سیدنا ابوبکر صدیقؓ۔

ششم: سیدنا عثمانِ غنیؓ جو قرآنِ کریم کو ایک قراءت (لغت قریش) پر لائے۔

جب تک کوئی شخص اس قرآن پر ایمان نہ لائے جو حضورِ اکرمﷺ پر نازل ہوا اور سیدنا عثمانِ غنیؓ نے اسے ایک لغت قریش میں لکھوایا اس وقت تک وہ صف اسلام میں نہیں آ سکتا اس کا لوحِ محفوظ میں رکھے قرآن پر ایمان لانا اس سے اسے قرآن پر ایمان رکھنے والا نہیں جانا اور مانا سمجھا جا سکتا۔

یہ سیدنا عمرؓ کی پہلی فکر تھی جس سے قرآن ایک کتابی صورت میں آیا آفاقی پیرائے میں اسے سیدنا ابو بکر صدیقؓ نے جمع کیا اور ایک لغت قریش میں اسے سیدنا عثمانِ غنیؓ نے جمع قرآن میں یہ سیدنا عمرؓ پھر سیدنا ابو بکر صدیقؓ اور پھر سیدنا عثمانِ غنیؓ کی خدمات ہیں جن کا کوئی مسلمان انکار نہیں کر سکتا لیکن اس خدمت کی ضرورت سب سے پہلے سیدنا عمرؓ کے ذہن میں اتری۔

(اللہ رب العزت نے قرآنِ کریم کی حفاظت کا ذمہ خود لیا:

اِنَّا نَحۡنُ نَزَّلۡنَا الذِّكۡرَ وَاِنَّا لَهٗ لَحٰـفِظُوۡنَ ۞(سورۃ الحجر: آیت 9)

ترجمہ: حقیقت یہ ہے کہ یہ ذکر (یعنی قرآن) ہم نے ہی اتارا ہے اور ہم ہی اس کی حفاظت کرنے والے ہیں۔

اسی طرح اللہ رب العزت نے رسالتِ مابﷺ سے اس کتاب مبین کو جمع کرنے کا وعدہ بھی فرمایا:

اِنَّ عَلَيۡنَا جَمۡعَهٗ وَقُرۡاٰنَهٗ۞(سورۃ القيامہ:  آیت 17)

ترجمہ: قرآن کا جمع کرنا اور اس کا پڑھنا ہمارا ذمہ ہے۔

اس پر استاذنا المكرم مفکر اسلام حضرت علامہ ڈاکٹر خالد محمود رحمۃاللہ علیہ لکھتے ہیں:

جمع قرآن کا ذمہ اللہ رب العزت نے لے رکھا ہے اور اس نے شروع سے ہی حضورِ اکرمﷺ کو اس کا یقین دلایا تھا 

اِنَّ عَلَيۡنَا جَمۡعَهٗ وَقُرۡاٰنَهٗ۞(سورۃ القيامہ:  آیت17)

اب یہ ناممکن تھا کہ قرآن جمع نہ ہو پائے یا جمع ہو مگر اس میں کچھ غلطیاں رہ جائیں اللہ اپنے رسولوں سے کیے گئے وعدوں کے خلاف نہیں کرتا وہ ہاتھ کتنے مبارک تھے جس سے اللہ تعالیٰ کا یہ ارادہ پورا ہوا۔(آثار التنزیل: جلد 1 صفحہ 229)

بلاشبہ حضرات خلفائے ثلاثہؓ سیدنا ابو بکرؓ، سیدنا عمرؓ اور سیدنا عثمانؓ وہ بزرگ و پاکباز ہستیاں ہیں جن کے مبارک ہاتھوں اللہ رب العزت نے اپنا یہ وعدہ پورا کر دیا چنانچہ یہاں ان لوگوں کے لیے غور کرنے کا مقام ہے جن کا عقیدہ اور مستقل مشغلہ ہی بالخصوص ان تین پاکباز بزرگ ہستیوں کی شخصیت اور کردار کو مجروح کرنا اور بھولی بھالی عوام کو ان سے بدظن کرنا ہوتا ہے کیونکہ اگر ان تین بزرگ ہستیوں پر سے ہی اعتماد اٹھ جائے تو ان کے تدوین و مدون کردہ کلام (موجودہ شکل میں موجود قرآن کریم) پر یقین رکھنا بھی پھر مشکل ہو جائے گا اور اگر کوئی (معاذ اللہ) قرآنِ کریم کے متعلق ہی شک وشبہ میں پڑ جائے تو بھلا اس کے پلے رہ ہی کیا جائے گا؟ فاعتبروا يا اولى الالباب)

2: مسلمانوں کو مختلف گروہ بندیوں میں بٹنے سے روکنا:

سیدنا ابو بکرؓ کے منصب خلافت پر آنے کے بعد سیدنا عمرؓ نے مسلمانوں کو مختلف گروہ بندیوں میں بٹنے سے بڑی سختی سے روکا مبادا اس طرح بیٹھنے سے شیطان رجیم کہیں کسی کے کان میں کوئی اپنی شرارت نہ پھونک دے جس سے مسلمانوں میں انتشار و افتراق پیدا ہو اس کے لیے آپ کو سیدنا ابو بکر صدیقؓ نے بھیجا تھا یہ قومی فکر سیدنا عمرؓ کے اپنے ذہن میں اٹھی تھی اور آپ خود اس قومی اور سیاسی تحفظ کے لیے اس راہِ عمل میں نکل پڑے اور جو لوگ سیدنا علیؓ کے گھر میں حضورِ اکرمﷺ کی تعزیت میں بیٹھے رہتے انہیں سختی سے وہاں سے اٹھایا اور اس میں بھی شک نہیں کہ حضورِ اکرمﷺ کی خلافت کے لیے سقیفہ بنی ساعدہ میں سیدنا ابو بکر صدیقؓ کا نام آپ نے تجویز کیا تھا ورنہ سیدنا ابو بکر صدیقؓ تو پہلے خلیفہ راشد کے لیے سیدنا عمرؓ کا نام ہی تجویز کر رہے تھے۔

3: وصال نبویﷺ کے وقت سیدنا عمر فاروق رضی اللہ عنہ کی حالت:

یہ دین اگرچہ حضورِ اکرمﷺ پر مکمل ہو چکا تھا اور صحابہ کرام کو اللہ تعالیٰ کی طرف سے اَلۡيَوۡمَ اَكۡمَلۡتُ لَـكُمۡ دِيۡنَكُمۡ وَاَ تۡمَمۡتُ عَلَيۡكُمۡ نِعۡمَتِىۡ الخ۔(سورۃ المائدہ: آیت 3) 

کی بشارت بھی مل چکی تھی لیکن سیدنا عمرؓ کے ذہن میں چند ایسے مسائل کھٹک رہے تھے کہ ان کی وضاحت کے بغیر آپﷺ اس دنیا سے نہ جائیں گے۔ آپ کے لیے وفاتِ نبی کی خبر سننا ہی بہت بوجھل ہو گیا آپ نے کھلے طور پر کہا جو ایسا کہے گا میں اسے مار دوں گا یہ صورتِ حال بتلاتی ہے کہ آپ کے ذہن میں اسلام کی جامعیتِ شان اور وسعتِ شریعت اس پیرائے میں روشن تھی کہ آپ اسی احساسِ ضرورت میں حضورِ اکرمﷺ کی وفات کا ہی کھلے بندوں انکار کر رہے تھے یہاں تک کہ جب سیدنا ابو بکر صدیقؓ نے خطبہ دیا تو آپ نے وفاتِ نبوی ﷺکا اس طرح اقرار کیا کہ گویا یہ آیات ابھی اتری ہیں تاہم اس سے انکار نہیں کیا جا سکتا کہ شریعتِ محمدیہ کی جامعیتِ شان کتنے گہرے نقوش سے آپ کے ذہن میں اتری ہوئی تھی۔

(وصالِ نبویﷺ کے موقع پر سیدنا عمر فاروقؓ کا وقوعِ موت کا ادراک نہ کر سکنے پر استاذنا المکرم امام المتکلمین، حضرت علامہ ڈاکٹر خالد محمودؒنے ایک جگہ بہت دقیق اور نفیس کلام فرمایا ہے جسے ہم اہلِ علم قارئین کے افادہ کی خاطر یہاں نقل کرنا مناسب سمجھتے ہیں:

بات دراصل یہ تھی کہ جس طرح نزولِ وحی کی بعض کیفیات میں اس دنیا کے احساسات سے تعطّل ہو جاتا تھا، مگر حیات کی نفی نہ ہوتی تھی اسی طرح آنحضرتﷺ پر ورودِ وفات کچھ ایسے طریق سے ہوا کہ حیات کلیۃً منتفی نہ ہوئی تھی، صرف آثارِ حیات سلب ہو گئے تھے (اور یہ بھی اس لیے تھا کہ عالمِ برزخ میں انتقال ہو سکے اور پردہ قبر میں تشریف لے جا سکیں) سیدنا فاروقِ اعظمؓ کی نگاہیں اس حیاتِ قلب تک پہنچ رہی تھیں، جو زیرِ پردہ مستور تھی (آخر محدثیت کا مقام کچھ کم منیع عرفان نہ تھا) اور اس کے ہوتے ہوئے وہ وقوعِ موت کا ادراک نہ کر سکتے تھے اس وجودِ حیات کو اس ورودِ وفات سے تطبیق دینا ان کے لیے مشکل ہو رہا تھا آنحضرتﷺ کی وفات کے متعلق ان کا اعتقاد یہی تھا کہ آپ پر بھی اسی طرح موت آئے گی جس طرح کہ عام دوسرے انسانوں پر وارد ہوتی ہے اور چونکہ صورتِ پیش افتادہ اور حالت واقعہ ایسی نہ تھی، اس لیے وہ آپﷺ پر ورودِ وفات کا یقین نہ کر سکے اور خیال کیا کہ یہ مرحلہ ابھی باقی ہے پیشتر ازیں وہ آیتِ شريفہ اِنَّكَ مَيِّتٌ وَّاِنَّهُمۡ مَّيِّتُوۡنَ ۞(سورۃ الزمر: آیت 30)

کے پیشِ نظر آپﷺ پر قرائنِ موت کا تتبع نہ کر سکے تھے پھر جب سیدنا ابو بکر صدیقؓ نے اس صورت پیش افتادہ اور کیفیتِ واقعہ ہی کو وفات النبیﷺ کہا اور آیاتِ قرآنیہ، جن میں آپﷺ پر ورودِ وفات کی پیشگوئیوں یا امکان کا بیان تھا ان کا منشاء اسی قسم کی حالت کو قرار دیا تو اب سیدنا عمر فاروقؓ سمجھے کہ آیات مذکورہ اپنے عمومی مفہوم میں نہ تھیں اور انہیں شرحِ صدر ہو گیا کہ ان آیاتِ شریفہ کا منشاء وفات النبیﷺ کے متعلق کیا ہے فرماتے ہیں کہ آیات کا مفہوم مجھ پر یوں منکشف ہوا:

گویا کہ میں نے پہلے وہ آیات پڑھی ہی نہ تھیں مقامِ غور ہے کہ اگر یہ آیاتِ شریفہ اپنے اسی عام مفہوم میں ہوتیں، جیسا کہ ابتدائی سطح میں متبادر ہوتا ہے، تو صحابہ کرام رضوان اللہ علیہم اجمعین بالخصوص سیدنا عمر فاروقؓ ان آیات کے متعلق اتنا اہم اعلان نہ فرماتے حضورِ اکرمﷺ کے متعلق وعدہ موت اگر انہی معنوں میں ہوتا، جن میں کہ موت عام ماحولِ عرب میں متعارف تھی، تو سیدنا عمر فاروقؓ حافظِ قرآن اور نہایت ذکی الطبع ہوتے ہوئے یہ ہرگز ارشاد نہ فرماتے:

كانی لم اقراها اليومئذ۔

ترجمہ: گویا کہ وہ آیات میں نے اس دن کے سوا کبھی پڑھی ہی نہ تھیں۔

بات صاف ہے کہ آنحضرتﷺ پر وفاتِ شریفہ کا ورود کچھ ایسے طریق سے ہوا، جو عام دوسرے انسانوں سے مختلف تھا آپ کے جسمیت سے قرائنِ موت کچھ ایسے جلی نہ تھے کہ کسی کو شک کی گنجائش نہ مل سکے آپ پر کچھ ایسی کیفیات تھیں کہ موت کا یقین نہ ہوتا تھا اسی کیفیت نے جو زیرِ پردہ مستور تھی اشتباہ پیدا کر رکھا تھا جن کے خیال میں اس کیفیت کی قرائنِ موت سے تطبیق محال تھی وہ ان قرائن کو غشی سمجھتے رہے کیونکہ ان کے حاشیہ فکر میں موت کے صرف وہی معنیٰ تھے، جو عام طور پر معروف ہیں اور جس ہستی مقدس کو راز دارِ نبوت ہونے کا شرف حاصل تھا اس نے اس کیفیت باطنہ کو جو زیرِ پردہ مستور تھی، ورودِ وفات سے متصادم نہ جانا تھا۔ اس وجودِ حیات اور وقوعِ وفات میں کوئی تعارض خیال نہ کیا اعلان فرمایا:

فان محمدا قد مات(بخاری شریف: جلد 2 صفحہ 640)

ترجمہ: حضورِ اکرمﷺ موت کا ذائقہ چکھ چکے ہیں۔

جب سیدنا صدیقِ اکبرؓ نے اس صورتِ افتادہ ہی کو وفاتِ پیغمبر قرار دے دیا تو پھر سیدنا فاروقِ اعظمؓ نے آپ پر قرائنِ موت کا تتبع شروع کیا اور بالآخر ورودِ وفات کے قائل ہو گئے الخ۔ (مقام حیات: صفحہ 580)

4: اسلام کے اخلاقی نظام میں حضرت عمر فاروق رضی اللہ عنہ کی روشن امیدیں:

عربوں میں شراب نوشی دورِ جاہلیت سے چلی آ رہی تھی اسلام نے اسے ابتداء ہی میں نہ روکا تھا، صرف اس طرف اشارہ کر دیا تھا کہ یہ رزق حسن نہیں اسی طرح مسلم عورتوں کے لیے پردہ کے احکام بھی کچھ تاخیر میں اترے سیدنا عمر فاروقؓ کے ذہن میں شراب نوشی اور عورتوں کی بے پردگی اسلام کے اخلاقی نظام سے لگانہ کھاتی تھی سیدنا عمرؓکے اور بھی کئی موافقات ہیں جن میں اللہ تعالیٰ نے ان کی امیدوں پر قرآن اتارا صحابہ کرام رضوان اللہ علیہم اجمعین میں یہ شرف اور اعزاز صرف سیدنا عمرؓ کا ہی ہے کہ ان کی تمناؤں پر قرآن اترا یہاں تک کہ آنحضرتﷺ نے فرمایا کہ میرے بعد اگر کوئی نبی ہوتا تو عمر ہوتے۔

اس سے پتہ چلتا ہے کہ سیدنا عمرؓ کے ہر اہم موقف پر انہیں اللہ تعالیٰ کی تائید حاصل تھی آپ کافروں پر سخت اور مسلمان پر بہت نرم تھے آنحضرتﷺ نے صحابہ کرام رضوان اللہ علیہم اجمعین کے تقابلی فضائل میں پہلے سیدنا ابو بکر صدیقؓ کا نام لیا اور پھر سیدنا عمرؓ کا لیکن اللہ تعالیٰ نے قرآنِ کریم میں حضرت محمد ﷺ کی معیت پانے والوں میں اَشِدَّآءُ عَلَى الۡكُفَّارِ پہلے بتائے اور رُحَمَآءُ بَيۡنَهُمۡ کا ان کے بعد ذکر فرمایا حدیث کے الفاظ:

ارحم امتی بامتی ابو بکر واشدهم فی امر الله عمر(ترمذی: جلد 2 صفحہ 220)

اور قرآن کے الفاظ:

مُحَمَّدٌ رَّسُوۡلُ اللّٰهِ‌ وَالَّذِيۡنَ مَعَهٗۤ اَشِدَّآءُ عَلَى الۡكُفَّارِ رُحَمَآءُ بَيۡنَهُمۡ الخ۔ (سورۃ الفتح: آیت 29)

بظاہر معلوم ہوتا ہے کہ حضورِ اکرمﷺ کی نظر محبت جتنی ابو بکر صدیقؓ پر تھی کہ ہجرت میں انہی کو ساتھ لے گئے، اتنی رحمت اور محبت اللہ تعالیٰ کی سیدنا عمرؓ پر تھی آنحضرتﷺ کا سیدنا عمرؓ کے بارے میں یہ کہنا کہ لو کان بعدی نبی لکان عمر بہت معنیٰ خیز ہے کہ یہ اللہ ہی جانتا ہے کہ رسالت کے لائق کون ہے۔

اَللّٰهُ اَعۡلَمُ حَيۡثُ يَجۡعَلُ رِسٰلَـتَهٗ‌ الخ۔ (سورۃ الانعام: آیت 124)

اللہ ہی جانتا ہے کہ رسالت کے لائق کون ہے۔

سیدنا ابو بکر صدیقؓ حضورِ اکرمﷺ کے دار ارقم کے رفیق تھے لیکن جس دن سیدنا عمرؓ اسلام لائے، سیدنا عمرؓ نے کھل کر کعبہ میں نماز پڑھی دار ارقم حضورِ اکرمﷺ کی امت کا گھر تھا اور بیت اللہ شریف اللہ کا گھر تھا۔

5: صحابہ کرام رضوان اللہ علیہم اجمعین اپنی اپنی پسند کے امام کے پیچھے نماز تراویح نہ پڑھتے رہیں:

آنحضرتﷺ نے رمضان شریف میں صرف تین رات جماعت سے تراویح پڑھیں آنحضرتﷺ کو خیال گزرا کہ کہیں یہ نماز بھی امت پر فرض نہ ہو جائے، آپ نے امت کے اس احساسِ محبت میں مسجد میں نماز تراویح پڑھانا چھوڑ دی لیکن صحابہ کرام رضوان اللہ علیہم اجمعین مسجد میں مختلف اطراف میں نماز تراویح جماعت سے پڑھتے رہے۔ حضورِ اکرمﷺ کو بھی اس کا علم تھا اور آپ نے انہیں اس سے منع نہ فرمایا تھا حضورِ اکرمﷺ کی وفات کے بعد اس کا اندیشہ نہ تھا کہ کہیں یہ نماز بھی فرض نہ ہو جائے، سیدنا عمرؓ نے اپنے دورِ خلافت میں تمام صحابہ کرام رضوان اللہ علیہم اجمعین کو پھر ایک امام پر جمع کرنے کا اہتمام کیا اور مسجد کو اتنا روشن کیا کہ سب مسلمان مسجدِ نبوی میں پھر سے ایک امام کے پیچھے نماز پڑھنے لگے۔

سیدنا عمرؓ کی اس سیاسی سوچ میں صحابہ کرام رضوان اللہ علیہم اجمعین کے تراویح کے لیے اپنے علیحدہ گروپ بنانے کا کوئی موقع نہ رہا تھا آپ نے سیدنا علی المرتضٰیؓ  کے مشورہ سے سب کو پھر ایک امام پر جمع کر دیا اور حضورِ اکرمﷺ کے تین رات تراویح پڑھنے کو آپ نے پورے رمضان میں وسیع اور ممتد کر دیا کیونکہ اب کوئی امکان نہ تھا کہ نماز تراویح فرض ہو جائے شریعت نبی سے قائم ہوتی ہے، کسی امتی کو شریعت کا کوئی مسئلہ وضع کرنے کا حق نہیں ہے۔

سیدنا عمرؓ نے اپنے اس اقدام سے مسلمانوں کو اپنے اندر گروپ بندی کے ہر پہلو اور امکان سے بچا لیا آپ نے اس یکجا تراویح پڑھنے کو نعمت البدعۃ ھذہ نہ کہا تھا، مسجد میں جو شاندار روشنیاں ہو رہی تھیں آپ نے ان کو کہا تھا کہ یہ نئی بات ہے پہلے مسجدِ نبویﷺ میں اس طرح روشنی نہ ہو پاتی تھی۔

(علامہ الرویانی (502 ہجری) لکھتے ہیں:

انما جمعهم على امام واحد لئلا يودى الى الشتات والاختلاف وامر السراج القناديل راحة للناس و تنويراً للمسجد و روى ان عثمان قال انها بدعة و نعمت البدعة يعنى القناديل و جمعهم على امام واحد وقال على لما راى القناديل رحم الله عمر و نور قبره كما نور مساجدنا بالقرآن و اجتمعت الصحابة على ذلك وانقرض عصرهم عليه فهو اجماع۔

(بحر المذہب فی فروع المذہب الشافعی: جلد 2 صفحہ 230)

ترجمہ: آپ نے مسلمانوں کو باہمی تفرقہ اور اختلاف سے بچانے کے لیے اس وقت کے تقاضے میں ایک امام پر جمع کیا تو لوگوں کے آرام کے لیے اور مسجد کو روشن کرنے کے لیے مسجد میں قندیلیں روشن کرنے کا حکم دیا سیدنا عثمانؓ نے اس قندیلیں روشن کرنے اور انہیں امام پر جمع کرنے کو ایک نئی بات کہا جو پہلے نہ تھی سیدنا علیؓ نے (اپنے دور میں) قندیلوں کو روشن دیکھا تو یہ دعا فرمائی: رحم اللّٰه عمر و نور قبره كما نور مساجدنا بالقرآن۔

اس پر علامہ الرویانی لکھتے ہیں:

واجتمعت الصحابة على ذلك انقرض عصرهم عليه فهو اجماع

ترجمہ: اور تمام صحابہ کرام رضوان اللہ علیہم اجمعین سیدنا عمر فاروقؓ کے اس عمل پر جمع ہو گئے اور ان کا دور اسی پر ختم ہو اس واسطے اجماع کا درجہ حاصل ہے۔

(بحوالہ، مقدمہ، بدعت اور اہلِ بدعت کی نظر میں: صفحہ 40)

یہاں بدعت کا لفظ اپنے لغوی معنیٰ میں ہے شرعی معنیٰ میں نہیں شرعی مسئلہ یہی ہے: کل بدعۃ ضلالۃ و کل ضلالۃ فی النار

اور اگر کوئی اس سے نمازِ تراویح مراد لے تو پھر اس سے پہلے ان كانت هذه بدعة فنعمت البدعة هذه کے شرطیہ الفاظ بھی وارد ملیں گے۔

اس وقت ہمیں تراویح کے مسئلہ سے بحث نہیں اس وقت ہم سیدنا عمرؓ کی اس سیاسی سوچ کو خراجِ تحسین ادا کر رہے ہیں کہ آپ نے کس طرح حضورِ اکرمﷺ کی امت کو گروہ بندی اور فرقہ بندی سے بچائے رکھا۔

آپ اپنے عہدِ خلافت میں اکابر صحابہ کرام رضوان اللہ علیہم اجمعین کو مدینہ سے نکل کر اطراف سلطنت میں جا کر آباد ہونے سے روکتے تھے آپ سمجھتے تھے کہ جب قوم میں غیر صحابہ کی کثرت ہو جائے گی تو مختلف اطراف سلطنت میں جو کوئی صحابی بھی آباد ہو گا وہ وہاں مسلمانوں کی آنکھوں کا تارا اور ان کا پیشوا بن جائے گا، اس میں امکان ہے کہ مسلمانوں میں مختلف نظریات اور مختلف دینی مسائل کہیں فرقہ بندی کی صورت اختیار نہ کر لیں۔

آپ کی اس سیاسی سوچ سے ہم اس نتیجہ پر پہنچے ہیں کہ آپ نے اپنی طرف سے ہر ممکن کوشش کی کہ حضورِ اکرمﷺ کی امت کو جہاں تک ہو سکے باہمی تقسیم اور ٹوٹنے سے بچایا جائے، جس طرح حضورِ اکرمﷺ آخری نبی ہیں حضورِ اکرمﷺ کی امت بھی قیامت تک ایک امت ہو کر رہے قیامت سے اس طرح متصل رہے جس طرح ہاتھ کی یہ دو انگلیاں آپس میں متصل ہیں آپﷺ نے فرمایا:

انا آخر الانبياء وانتم آخر الامم او كما قال النبیﷺ رواه ابو امامة الباهلی۔ (سنن ابنِ ماجہ: صفحہ 307)

آپ کی امت ایک ہی رہے جو آئندہ والے مسلمانوں کی دینی پیشوائی کرے اور ان لفظوں سے ایمانی پیشوا ہو:

وَتُؤۡمِنُوۡنَ بِاللّٰهِ‌ الخ۔(سورۃ آلِ عمران: آیت 110)

ترجمہ: اور تم اللہ پر ایمان رکھتے ہو۔

اس سے بڑھ کر قرآنِ کریم سے صحابہ کرام رضوان اللہ علیہم اجمعین کے ایمان پر اور کیا دلیل ہو سکتی ہے ان کے ایک ہونے کا ثبوت اور ان کا اقوامِ عالم کے پیشوا ہونے کا عنوان اس سے بڑا اور کیا ہو سکتا ہے؟ یہ وہ لوگ ہیں کہ اللہ ان کے دلوں کی بات جان چکا اور ان کے ایمان کی کھلے عام تصدیق کی:

لَـقَدۡ رَضِىَ اللّٰهُ عَنِ الۡمُؤۡمِنِيۡنَ اِذۡ يُبَايِعُوۡنَكَ تَحۡتَ الشَّجَرَةِ فَعَلِمَ مَا فِىۡ قُلُوۡبِهِمۡ فَاَنۡزَلَ السَّكِيۡنَةَ عَلَيۡهِمۡ وَاَثَابَهُمۡ فَتۡحًا قَرِيۡبًا ۞(سورۃ الفتح: آیت 18)

جب ہم سیدنا عمرؓ کی اس بلند پایہ سیاسی سوچ کی تحمید کرتے ہیں تو بعض ناقدینِ صحابہ ہم سے سوال کرتے ہیں کہ سیدنا علیؓ میں کون سی کمی تھی کہ ان کو خلافت کرنے کا موقع نہ دیا گیا تو ہم کہتے ہیں کہ ان میں کوئی کمزوری نہ تھی سوائے ایک کے کہ وہ حضورِ اکرمﷺ کے قریبی رشتہ دار تھے اور حضورِ اکرمﷺ نہ چاہتے تھے کہ ان پر کوئی کنبہ پروری کا الزام آئے اس خاندان کی تو یہ شان استغناء تھی کہ انہیں حکومت دینی آتی تھی لینی نہیں سیدنا حسنؓ کی تو یہ شان تھی کہ عراق میں سیدنا علی المرتضیٰؓ کے بعد سیدنا حسنؓ کو خلیفہ چن لیا گیا اور وہاں چھ ماہ خلافت کرتے بھی رہے لیکن قوم کو پھر سے ایک کرنے کے شوق میں آپ نے ایک بنی بنائی حکومت سیدنا امیرِ معاویہؓ کے سپرد کر دی تاریخِ اسلام میں سیدہ فاطمہؓ کے لال کی یہ عظیم قربانی آبِ زر سے لکھنے کے لائق ہے حضورِ اکرمﷺ جب پہلے سیدنا ابو بکرؓ کے حق میں خلافت لکھوانا چاہتے تھے تو جب آپ پر یہ تکوینی حکمت روشن ہوئی تو آپ نے اپنے اس خیال سے رجوع فرمایا اور کہا کہ مؤمنین اپنی رائے میں بھی سیدنا ابوبکر صدیقؓ کے سوا کسی کو اپنے انتخاب میں نہ لائیں گے تو اب اس پر کسی نامزدگی کی ضرورت ہی کیا ہے؟