محقق العصر حضرت علامہ ڈاکٹر خالد محمود رحمۃاللہ علیہ 

(ڈائریکٹر اسلامک اکیڈمی مانچسٹر)

الۡحَمۡدُ لِلّٰهِ وَسَلٰمٌ عَلٰى عِبَادِهِ الَّذِيۡنَ اصۡطَفٰى اَمَّا بَعْدُ!

حضرت خاتم النبیینﷺ کی رسالت پر جو لوگ ایمان لائے وہ آپﷺ کی امت اجابت ہیں اور جن کی طرف آپ ﷺمبعوث ہوئے وہ اِس دور کے ہوں یا اُس دور کے، وہ آپﷺ پر ایمان لائے ہوں یا نہ، یہ سب آپ کی امت دعوت ہیں اس جہت سے تمام یہود و نصاریٰ، ہندو اور بدھ آپ کی امت دعوت ہیں اور وہ سب اس کے مکلف ہیں کہ آپﷺ پر ایمان لائیں اور آپ ﷺکی تصدیق کریں جنہوں نے آپ ﷺکی نبوت، رسالت اور خاتمیت کی تصدیق کی اور اسے تسلیم کیا وہ آپﷺ کی امت اجابت ہو گئے پہلے وہ صرف امت دعوت تھے جب اس دور کے رسول آپﷺ ہیں تو اس وقت کے تمام بنی نوع انسان آپ ﷺکی امت دعوت ہیں۔

امت کا پہلا طبقہ جنہوں نے آپﷺ کا دور پایا اور وہ آپ کے سامنے ایمان لائے، انہیں صحابہ کہا جاتا ہے اور وہ امت کا پہلا دستہ ہیں، اور اس کا اولین طبقہ ہیں پھر ان کے دو طبقے ہیں ایک مہاجرین اور دوسرے انصار، انہی کو مجموعی طور پر صحابہ کہا جاتا ہے۔

1: منافقین صحابہ کے پیرائے میں جلیس نبوت نہ تھے:

جو لوگ ظاہراً اسلام لائے اور اندر سے مومن نہ تھے انہیں منافق کہتے ہیں ان کا مسلمانوں کے ساتھ عام اٹھنا بیٹھنا تھا اور وہ مسلمانوں کی قومی ضروریات پر خرچ کرنا بھی مشکل جانتے تھے وہ مسلمانوں میں چلتے پھرتے بھی غیر دکھائی دیتے تھے البتہ اس وقت اجازت نہ تھی کہ انہیں زیادہ نمایاں کیا جائے انہیں ابھی پردے میں رکھنے میں بہتری تھی لیکن اس میں کوئی شک نہیں کہ وہ اپنے کردار اور اطوار میں مسلمانوں سے صاف علیحدہ نظر آتے تھے۔

صحابہ کرام رضوان اللہ علیہم اجمعین ماشاء اللہ اپنے ایمان اور اسلام میں بہت پختہ تھے ان سے غلطیاں بھی ہوتیں، کئی قصور سرزد ہوتے لیکن آنحضرتﷺ کے فیض تربیت سے ان کا بتدریج تزکیہ ہوا یہاں تک کہ وہ اس مقام پر پہنچے کہ حضورِ اکرمﷺ کے سامنے ایمان کا معیار قرار پاگئے اللہ تعالیٰ نے قرآنِ کریم میں منافقوں کے دعویٰ ایمان کو مسترد کرتے ہوئے ارشاد فرمایا:

فَاِنۡ اٰمَنُوۡا بِمِثۡلِ مَآ اٰمَنۡتُمۡ بِهٖ فَقَدِ اهۡتَدَوْا وَاِنۡ تَوَلَّوۡا فَاِنَّمَا هُمۡ فِىۡ شِقَاقٍ‌ الخ۔(سورۃ البقرہ: آیت 137)

ترجمہ: سو اگر یہ ایمان لائیں جیسا کہ تم ایمان لائے ہو تو بے شک وہ ہدایت پا گئے اور اگر وہ (تمہیں معیار ماننے سے) منہ پھیریں تو سمجھ لو کہ یہ یہیں دوسری طرف کے لوگ ہیں۔

اور قرآنِ کریم میں یہ بھی ہے:

وَاِذَا قِيۡلَ لَهُمۡ اٰمِنُوۡا كَمَاۤ اٰمَنَ النَّاسُ قَالُوۡاۤ اَنُؤۡمِنُ كَمَاۤ اٰمَنَ السُّفَهَآءُ‌ اَلَاۤ اِنَّهُمۡ هُمُ السُّفَهَآءُ الخ۔(سورۃ البقرہ: آیت 13)

ترجمہ: اور جب انہیں کہا جاتا ہے کہ اس طرح ایمان لاؤ جیسا کہ یہ پیغمبر کے ساتھ کے لوگ ایمان لائے تو کہتے ہیں کہ کیا ہم ان بے وقوفوں کی طرح ایمان لائیں۔

یہ آیات بتلاتی ہیں کہ منافق کبھی مسلمانوں سے ملتبس (Veiled) نہ ہو پائے تھے کہ پتہ نہ چلے کہ کوئی اندر سے کیسا ہے؟ اگر ان میں کوئی امتیاز نہ ہوتا تو ان کی اس طرح علیحدہ علیحدہ باتیں کیوں ہوتیں جو قرآنِ کریم نقل کر رہا ہے حضورِ اکرمﷺ کوئی ایسا مخلوط معاشرہ نہ ترتیب دے رہے تھے کہ پتہ نہ چلے کہ کوئی اندر سے کیسا ہے ملتبس سوسائٹی قائم کرنا پیغمبرانہ شان نہیں سو صحیح یہ ہے کہ جنہیں آنحضرت ﷺنے اپنا صحابی بنایا انہیں اپنے قریب رہنے کا موقع دیا ان پر ہر گز کسی شبے کا چھینٹا نہیں ہے۔ جو اندر سے مسلمان نہ ہو وہ جلیس نبوت نہ ہوتے تھے۔

2: ان کی پیروی رضائے خداوندی کا نشان ٹھہری:

وَالسّٰبِقُوۡنَ الۡاَوَّلُوۡنَ مِنَ الۡمُهٰجِرِيۡنَ وَالۡاَنۡصَارِ وَالَّذِيۡنَ اتَّبَعُوۡهُمۡ بِاِحۡسَانٍ رَّضِىَ اللّٰهُ عَنۡهُمۡ وَرَضُوۡا عَنۡهُ الخ۔(سورۃ التوبہ: آیت 100)

ترجمہ: اور جو لوگ قدیم ہیں پہلے ہجرت کرنے والے اور پہلے مدد کرنے والے اور وہ لوگ جنہوں نے ان مہاجرین و انصار کی پورے اخلاص سے پیروی کی اللہ ان سے راضی ہوا اور وہ خدا سے راضی ہوئے۔

سو جن لوگوں کی پیروی رضائے خداوندی کا نشان قرار دی گئی وہ لوگ خود کس قدر اللہ تعالیٰ کی آغوش محبت میں ہوں گے۔ یوں سمجھیے وہ ہدایت کے ستارے ہیں جن کی پیروی ہدایت کی ضمانت اور رضائے خداوندی کے حصول کی بشارت ہے حدیث اصحابی کالنجوم میں اسی طرف اشارہ ہے اور اس کا مضمون قرآن کریم سے ماخوذ ہے۔

سوال: کیا یہ صرف سابقین اولین ہیں جن کی پیروی رضائے خداوندی کا نشان ٹھہری یا تمام صحابہ کرام رضوان اللہ علیہم اجمعین آسمانِ ہدایت کے ستارے ہیں کہ ان کی پیروی کی جا سکے۔

جواب: جو سابقین اولین کے بعد اسلام لائے وہ بھی تو ان سابقین اولین کی پیروی میں ہی چلے ہیں۔ وہ اسی راستے پر آئے جس پر سابقین اولین پہلے آ چکے تھے اور وہ انہی کی پیروی کرنے والوں میں سے تھے پھر کیا یہ وہی لوگ تو نہیں جن سے اللہ تعالیٰ نے اپنے راضی ہونے کی خبر دی ہے سابقین اولین کے پیرو دونوں طبقوں میں سے ہیں۔

1: صحابہ کرام رضوان اللہ علیہم اجمعین میں سے بھی۔ 

2: اور تابعین میں سے بھی۔ 

ان سابقین کی پیروی تبھی رضائے الٰہی کا نشان ہو سکتی ہے کہ ان کی زندگی نمایاں ہو، ملتبس نہ ہو، لوگ انہیں اور ان کی پیروی کرنے والوں کو پہچانتے ہوں۔

3: اس امت کی صفِ اول خیر الامت قرار دی گئی ہے:

كُنۡتُمۡ خَيۡرَ اُمَّةٍ اُخۡرِجَتۡ لِلنَّاسِ تَاۡمُرُوۡنَ بِالۡمَعۡرُوۡفِ وَتَنۡهَوۡنَ عَنِ الۡمُنۡكَرِ وَتُؤۡمِنُوۡنَ بِاللّٰهِ‌ الخ۔(سورۃ آل عمران: آیت 110)

ترجمہ: تم خیر امت (بہترین لوگ) ہو جو لوگوں (کی ہدایت) کیلیے سامنے لائے گئے تم حکم کرتے ہو اچھے کاموں کا اور تم منکرات سے روکنے والے ہو اور تم ایمان لائے ہوئے ہو۔

یہاں تَاۡمُرُوۡنَ بِالۡمَعۡرُوۡفِ وَتَنۡهَوۡنَ عَنِ الۡمُنۡكَرِ میں نصیحت نہیں کی جا رہی ان کے حالات اور ان کے ایمان کی خبر دی جا رہی ہے سو صف اول کے لوگ اگر علی العموم مسلمان نہ ہوں تو اس پوری آیت کی تکذیب لازم آتی ہے مسلمان سارے سمجھے جائیں گے اور منافق کوئی کوئی صالحین سارے گنہگار کوئی کوئی۔

صحابہ کرام رضوان اللہ علیہم اجمعین مقتدا تبھی بن سکیں گے کہ ان کی زندگیاں نمایاں ہوں، چھپی نہ ہوں وہ ملتبس رہیں تو یہ اسوہ کیسے بنیں گے جن کے ظاہر و باطن میں فرق ہو وہ کبھی کسی قوم کے پیشوا نہیں ہو سکتے۔

4: امت محمدیہ کی صف اول خیر البریۃ قرار دی گئی ہے:

صحابہ کرام رضوان اللہ علیہم اجمعین اپنے وقت میں کل بنی آدم کا بہترین طبقہ ہیں بریہ کی جمع برایا ہے، جیسے رعیّت کی جمع رعایا وكنت قلت فیھم

 وفی التنزیل هم خير البرايا

وخير الملك من رحم الرعايا

قد انتشروا اذا بر او بحرا

وكانوا خير من ركب المطايا۔

اِنَّ الَّذِيۡنَ اٰمَنُوۡا وَعَمِلُوا الصّٰلِحٰتِ اُولٰٓئِكَ هُمۡ خَيۡرُ الۡبَرِيَّةِ ۞(سورۃ البینہ: آیت 7)

ترجمہ: بیشک جو لوگ ایمان لائے اور انہوں نے نیک عمل کیے وہ بہترین لوگ ہیں۔

یہ ان لوگوں کے بارے میں ہے جو آنحضرتﷺ کے ہاتھ پر ایمان لائے اور انہوں نے نیک عمل کیے ظاہر ہے کہ یہ خیر البریہ ہونے کی خبر انہی حضرات کے بارے میں دی گئی ہے جس طرح وہ امت کا خیر تھے وہ کل بریہ کا بھی خیر ہیں اور خیر الخلائق بھی ہیں ۔

5: صحابہ کرام رضوان اللہ علیہم اجمعین اقوام عالم کا قبلہ بنائے گئے:

دنیا میں کچھ قومیں دوسری قوموں کے لیے پیشوا کا درجہ رکھتی ہیں۔ اللہ تعالیٰ نے حضورِ اکرمﷺ پر سلسلہ نبوت ختم کرنے کے بعد آئندہ کے لیے جو لوگ اقوامِ عالم کا قبلہ بنائے وہ حضراتِ صحابہ کرام رضوان اللہ علیہم اجمعین ہیں قرآنِ کریم میں انہیں امت وسطاً کہا گیا ہے یہ امت (صحابہ کرام رضوان اللہ علیہم اجمعین) حضرت خاتم النبیینﷺ اور دیگر اقوامِ عالم کے مابین ایک درمیانے درجے کی حیثیت رکھتی ہے کہ وہ اپنا پیشوا حضور ختمی مرتبتﷺ کو جانیں اور دوسروں کے لیے خود پیشوا بنیں اللہ تعالیٰ نے جب مسلمانوں کو بیت المقدس سے ہٹا کر مسجد حرام کے قبلہ پر ڈالا تو فرمایا:

وَكَذٰلِكَ جَعَلۡنٰكُمۡ اُمَّةً وَّسَطًا لِّتَکُوۡنُوۡا شُهَدَآءَ عَلَى النَّاسِ وَيَكُوۡنَ الرَّسُوۡلُ عَلَيۡكُمۡ شَهِيۡدًا الخ۔(سورۃ البقرہ: آیت 143)

ترجمہ: اور اسی طرح ہم نے تمہیں امت وسط بنایا تاکہ تم لوگوں پر (دینِ خداوندی) کے گواہ رہو اور اللہ کا رسول تم پر (دینِ خداوندی کا) گواہ ہو۔

اس سے پتہ چلا کہ خاتم النبیینﷺ کے بعد صحابہ کرام رضوان اللہ علیہم اجمعین ہیں جو دوسرے لوگوں کے لیے نمونے کے لوگ ہیں اور یہ سب عادل ہیں، ان کی مرسل روایت بھی متصل کا درجہ رکھتی ہے جس طرح ستاروں سے روشنی ہی ملتی ہے (وہ کم ہو یا زیادہ) صحابہ کرام رضوان اللہ علیہم اجمعین سے روشنی ہی ملے گی ان سے اندھیرا کبھی نہیں پھیلا قرآنِ کریم نے اس آیت میں صحابہ کرام رضوان اللہ علیہم اجمعین کو قبلہ اقوامِ عالم بتایا ہے جس طرح خانہ خدا نماز کا قبلہ ہے، صحابہ کرام رضوان اللہ علیہم اجمعین اقوامِ عالم کا قبلہ ہیں سیدنا عمرؓ نے صحابہ کرام رضوان اللہ علیہم اجمعین کو ان کے اس پیشوا حیثیت کا پتہ ان الفاظ میں دیا تھا:

انكم ايها الرهط ائمة يقتدى بكم الناس۔ (رواه مالك)

ترجمہ: اے قافلے والو! تم بے شک ائمہ ہو، بعد کے آنے والے تمہاری پیروی میں چلیں گے۔

اب آپ ہی بتائیں یہ آسمانِ ہدایت کے ستارے نہیں تو اور کیا ہیں۔

6: صحابہ کرام رضوان اللہ علیہم اجمعین کی جبلت میں مومنوں سے خیر خواہی اور کافروں سے نفرت:

مُحَمَّدٌ رَّسُوۡلُ اللّٰهِ‌ وَالَّذِيۡنَ مَعَهٗۤ اَشِدَّآءُ عَلَى الۡكُفَّارِ رُحَمَآءُ بَيۡنَهُمۡ ‌تَرٰٮهُمۡ رُكَّعًا سُجَّدًا يَّبۡتَغُوۡنَ فَضۡلًا مِّنَ اللّٰهِ وَرِضۡوَانًا‌ سِيۡمَاهُمۡ فِىۡ وُجُوۡهِهِمۡ مِّنۡ اَثَرِ السُّجُوۡدِ‌ الخ۔(سورۃ الفتح: آیت 29)

ترجمہ: محمد(ﷺ) رسول اللہ کا اور جو لوگ اس کے ساتھ ہیں زور آور ہیں کافروں پر نرم دل ہیں آپس میں تو دیکھے ان کو رکوع میں اور سجدہ میں ڈھونڈتے ہیں اللہ کا فضل اور اس کی خوشی نشانی ان کی ان کے منہ پر ہے سجدہ کے اثر سے۔

یہاں صرف وَالَّذِيۡنَ مَعَهٗۤ فرمایا، وَالَّذِينَ آمَنُوا مَعَهُ نہیں کہا جس سے پتہ چلتا ہے کہ آپ کے ساتھ تھے ہی ایمان والے جو منافق بغیر ایمان کے مسلمانوں میں گھس آئے وہ حضورِ اکرمﷺ کے پاس حاضری تو دیتے لیکن مجلس کی دولت نہ پاسکتے تھے یہ صرف صحابہ کرام رضوان اللہ علیہم اجمعین ہیں جو آنحضرتﷺ کے ساتھی سمجھے گئے اور یہ ان کی صفات میں ہے کہ اپنوں میں دل کے انتہائی نرم اور کافروں پر انتہائی سخت تھے۔

7: پہلے ایمان لانے والے اور بعد میں ایمان لانے والے دونوں طبقے جنتی ہیں:

فتح مکہ سے پہلے ایمان لانے والے اور سختیاں جھیلنے والے یقیناً ان حضرات سے افضل و اعلیٰ اور بلند و بالا ہیں جو بعد میں ایمان لائے لیکن جنت کا وعدہ دونوں سے ہے بلکہ جو ان کی پیروی میں چلا وہ بھی جنت کو پا گیا دوزخ کے قریب پھٹکنا تو درکنار آگ کے شعلوں کی سرسراہٹ تک ان کے کانوں میں نہ جاسکے گی:

لَا يَسۡتَوِىۡ مِنۡكُمۡ مَّنۡ اَنۡفَقَ مِنۡ قَبۡلِ الۡفَتۡحِ وَقَاتَلَ‌ اُولٰٓئِكَ اَعۡظَمُ دَرَجَةً مِّنَ الَّذِيۡنَ اَنۡفَقُوۡا مِنۡۢ بَعۡدُ وَقَاتَلُوۡا‌ وَكُلًّا وَّعَدَ اللّٰهُ الۡحُسۡنٰى‌ الخ۔(سورۃ الحدید: آیت 10)

ترجمہ: برابر نہیں تم میں سے جس نے خرچ کیا فتح مکہ سے پہلے اور لڑائی کی ان لوگوں کا درجہ بڑا ہے ان سے جو خرچ کریں اس کے بعد اور لڑائی کریں اور سب سے وعدہ کیا ہے اللہ نے جنت کا۔

اور پھر یہ بھی فرمایا:

اِنَّ الَّذِيۡنَ سَبَقَتۡ لَهُمۡ مِّنَّا الۡحُسۡنٰٓى اُولٰٓئِكَ عَنۡهَا مُبۡعَدُوۡنَ ۞(سورۃ الانبیاء: آیت 101)

لَا يَسۡمَعُوۡنَ حَسِيۡسَهَا‌ وَهُمۡ فِىۡ مَا اشۡتَهَتۡ اَنۡفُسُهُمۡ خٰلِدُوۡنَ‌ ۞(سورۃ الانبیاء: آیت 102)

لَا يَحۡزُنُهُمُ الۡـفَزَعُ الۡاَكۡبَرُ الخ۔(سورۃ الانبیاء: آیت 103)

ترجمہ: جن کے لیے پہلے سے ٹھہر چکی ہماری طرف سے جنت وہ اس آگ سے دور رہیں گے نہیں سنیں گے اس کی آہٹ اور وہ اپنے جی کے مزوں میں سدا رہیں گے نہ غم ہو گا ان کو اس بڑی گھبراہٹ میں۔

8: امت کو حضور اکرمﷺ کے زمانے کے مومنین کی راہ پر چلنے کی دعوت:

وَمَنۡ يُّشَاقِقِ الرَّسُوۡلَ مِنۡۢ بَعۡدِ مَا تَبَيَّنَ لَـهُ الۡهُدٰى وَ يَـتَّبِعۡ غَيۡرَ سَبِيۡلِ الۡمُؤۡمِنِيۡنَ نُوَلِّهٖ مَا تَوَلّٰى وَنُصۡلِهٖ جَهَـنَّمَ‌ وَسَآءَتۡ مَصِيۡرًا ۞(سورۃ النساء: آیت 115)

ترجمہ: اور جو کوئی مخالفت کرے رسول کی جب کہ کھل چکی اس پر سیدھی راہ اور چلے سب مسلمانوں کے رستہ کے خلاف تو ہم حوالہ کریں گے اس کو اسی طرف جو اس نے اختیار کی اور ڈالیں گے ہم اس کو دوزخ میں اور وہ بہت بری جگہ پہنچنے کی۔

حضورِ اکرمﷺ کے زمانے کے یہ مومنین کون ہیں؟ یہ وہی حضرات ہیں جنہیں ہم صحابہ کرام رضوان اللہ علیہم اجمعین کہتے ہیں ان کی راہ کو اللہ تعالیٰ نے اپنے پیغمبر کی راہ سے جوڑا ہے۔ اور اس راہ کو چھوڑنے والوں کو جہنمی فرمایا ہے یہ بدوں اس کے نہیں ہو سکتا کہ صحابہ کرام رضوان اللہ علیہم اجمعین کا عام عمل لوگوں کے لیے کھلے بندوں شریعت کے آئینہ میں اترتا نظر آئے اور ان کا ہر عمل حضورِ اکرمﷺ کی اتباع میں ہو جو زندگی ملتبس ہو وہ کبھی آئینہ نہیں بنتی۔

9: محسنین امت یہی ہیں جن کا ساری امت پر احسان ہے:

آئندہ آنے والے لوگوں کو دین انہی صحابہ کرام رضوان اللہ علیہم اجمعین سے ملا ہے اور یہ حضرات یقیناً پوری امت کے محسنین ہیں آنحضرتﷺ سے دین انہی حضرات نے لیا اور سیکھا اور پھر اسے آگے پہنچایا اور سکھایا قرآن کریم نے انہیں متقین کہا ہے کہ یہی اللہ سے ڈرنے والے ہیں اور ان کے لیے خوشخبری سنائی گئی:

اِنَّ الۡمُتَّقِيۡنَ فِىۡ جَنّٰتٍ وَّعُيُوۡنٍ ۞اٰخِذِيۡنَ مَاۤ اٰتٰٮهُمۡ رَبُّهُمۡ‌ اِنَّهُمۡ كَانُوۡا قَبۡلَ ذٰلِكَ مُحۡسِنِيۡنَ ۞كَانُوۡا قَلِيۡلًا مِّنَ الَّيۡلِ مَا يَهۡجَعُوۡنَ ۞وَبِالۡاَسۡحَارِ هُمۡ يَسۡتَغۡفِرُوۡنَ ۞وَفِىۡۤ اَمۡوَالِهِمۡ حَقٌّ لِّلسَّآئِلِ وَالۡمَحۡرُوۡمِ ۞(سورۃ الذاریات: آیت 15تا 19)

ترجمہ: البتہ ڈرنے والے باغوں میں ہیں اور چشموں میں لیتے ہیں جو دیا ان کو ان کے رب نے، وہ تھے اس سے پہلے نیکی والے وہ تھے رات کو تھوڑا سوتے اور صبح کے وقتوں میں معافی مانگتے اور ان کے مال میں حصہ تھا مانگنے والوں کا اور ہارے ہوئے لوگوں کا۔

سیدنا علی المرتضیٰؓ نے بھی صحابہ کرام رضوان اللہ علیہم اجمعین کی سیرت کا یہی نقشہ کھینچا ہے:

لقد رأيت أصحاب محمدﷺ فما أرى أحدا يشبههم لقد كانوا يصبحون شعثا غبرا وقد باتوا سجدا وقياما يراوحون بين جباههم وخدودهم ويقفون على مثل الجمر من ذكر معادهم كأن بين أعينهم ركب المعزى من طول سجودهم إذا ذكر الله هملت أعينهم حتى تبل جيوبهم ومادوا كما يميد الشجر يوم الريح العاصف خوفا من العقاب ورجاء الثواب۔(نہج البلاغہ: جلد 1 خطبہ 97 صفحہ 189)

ترجمہ: میں نے حضرت محمدﷺ کے صحابہ کرام کو دیکھا ہے میں تم میں سے کسی کو بھی ان جیسا نہیں پاتا وہ صبح کو دھول میں اٹے ہوتے تھے اور رات کو سجدوں اور قیام کی حالت میں گزار دیتے تھے وہ کبھی اپنی پیشانیاں زمین پر رکھتے تھے اور کبھی رخسار وہ اپنی آخرت یاد کرتے تو معلوم ہوتا کہ انگاروں پر کھڑے ہیں ان کی آنکھوں کے درمیان لمبے سجدے کرنے کے باعث مینڈھے کے گھٹوں جیسا گھٹا ہوتا تھا جب اللہ کا ذکر ہوتا تو ان کی آنکھیں آنسو برساتیں یہاں تک کہ گریبان تر ہو جاتے اور عذاب کے خوف اور ثواب کی امید سے اچھے لرزتے اور کپکپاتے جیسے تیز آندھی میں درخت کی حالت ہوتی ہے۔(اردو ترجمہ: جلد 1صفحہ 71)

سیدنا علی المرتضیٰؓ یہ بھی فرماتے ہیں:

إخوانی الذين تلوا القرآن فأحكموه وتدبروا الفرض فأقاموه أحيوا السنة وأماتوا البدعة دعوا للجهاد فأجابوا ووثقوا بالقائد فاتبعوه۔ (نہج البلاغہ: جلد 2خطبہ 182 صفحہ 109)

ترجمہ: میرے وہ بھائی (آج ہوتے) جنہوں نے قرآن پڑھا تو اس پر خوب عمل کیا اور فرائض میں تدبر کیا تو انہیں قائم کر دکھایا آنحضرتﷺ کی سنتوں کو زندہ کیا اور بدعات کا خاتمہ کیا جب جہاد کی طرف بلائے گئے تو انہوں نے اپنی جانوں کو پیش کر دیا اور زندہ ہونے کی حالت میں اپنے قائد (یعنی خاتم الانبیاءﷺ) پر پورا پورا اعتماد کرتے ہوئے اس کی پوری اتباع کی۔

10: صحابہ کرام رضوان اللہ علیہم اجمعین کے دلوں میں ایمان لکھا جا چکا تھا:

اللہ تعالیٰ نے صحابہ کے بارے میں فرمایا:

اُولٰٓئِكَ كَتَبَ فِىۡ قُلُوۡبِهِمُ الۡاِيۡمَانَ وَاَيَّدَهُمۡ بِرُوۡحٍ مِّنۡهُ‌ الخ۔(سورۃ المجادلہ: آیت 22)

ترجمہ: یہی وہ لوگ ہیں کہ اللہ تعالیٰ نے ان کے دلوں میں ایمان لکھا اور روح القدس سے ان کی مدد کی۔

اسلام میں صحابہ کرام رضوان اللہ علیہم اجمعین کا مقام کیا ہے اس پر یہ دس آیتیں یاد رکھیں اللہ تعالیٰ نے جب ان کے دلوں کی خبر دے دی دلوں میں لکھا ایمان کوئی منقبت نہیں جب تک کہ ظاہر سراپا اسلام نہ ہو سو اب اس سے چارہ نہیں کہ ہم تمام صحابہ کرام رضوان اللہ علیہم اجمعین کو خاص طور پر ان افراد کو جن پر خدا کا وعدہ خلافت پورا ہوا مومن کامل سمجھیں، وہ وعدہ یہ تھا:

وَعَدَ اللّٰهُ الَّذِيۡنَ اٰمَنُوۡا مِنۡكُمۡ وَ عَمِلُوا الصّٰلِحٰتِ لَـيَسۡتَخۡلِفَـنَّهُمۡ فِى الۡاَرۡضِ كَمَا اسۡتَخۡلَفَ الَّذِيۡنَ مِنۡ قَبۡلِهِمۡ وَلَيُمَكِّنَنَّ لَهُمۡ دِيۡنَهُمُ الَّذِى ارۡتَضٰى لَهُمۡ وَلَـيُبَدِّلَــنَّهُمۡ مِّنۡۢ بَعۡدِ خَوۡفِهِمۡ اَمۡنًا‌ الخ۔(سورۃ النور: آیت 55)

ترجمہ: وعدہ کر لیا اللہ تعالیٰ نے تم میں سے ان لوگوں سے جو ایمان لائے اور انہوں نے نیک اعمال کئے کہ انہیں ضرور خلافت دے گا زمین میں جیسا کہ اس نے حاکم کیا تھا ان سے پہلے لوگوں کو اور جما دے گا ان کے لیے دین ان کا جسے اس نے پسند کیا ان کے واسطے اور اللہ تعالیٰ انہیں خوف کے بدلے امن عطا فرمائیں گے حضورِ اکرمﷺ سے پہلے کبھی نہیں ہوا کہ کسی کو خلافت براہِ راست نہیں ہو کر ملی ہو سوا اس امت میں بھی صحابہ کرام رضوان اللہ علیہم اجمعین کو خلافت بلا غصب ملی پھر یہ بھی کبھی نہیں ہوا تھا کہ خلفاء خلافت میں بھی خوف میں دبے رہیں سو اس امت میں بھی خلافت قوت اور طاقت پر قائم ہو گی ڈر اور تقیہ میں نہ گھری رہے گی پھر یہ وعدہ انہی لوگوں پر پورا ہوا جن سے یہ عہد باندھا گیا تھا یہ عقیدہ کہ یہ وعدہ قیامت کے موقع پر سیدنا مہدی کے ہاتھوں پورا ہو گا یہ اس وعدہ خلافت سے کھلا مذاق ہے جس سے تسلی تو صحابہ کرام رضوان اللہ علیہم اجمعین کو دی گئی اور اس کے پورا ہونے کا وقت ہزاروں سال بعد ٹھہرایا گیا۔

قرآن کریم کی رو سے صحابہ کرام رضوان اللہ علیہم اجمعین کے بارے میں یہ ماننا ضروری ہے کہ ان پر اللہ تعالیٰ کا وعدہ پورا ہو اور وہ اس خلافت کو پا گئے۔