بائیس رجب کو بعض جگہ کونڈہ کرنے کا رواج ہے، جبکہ کونڈوں کی مروجہ رسم اہلِ سنت والجماعت کے مذہب میں محض بے اصل، خلافِ شرع اور بدعت ممنوع ہے۔ کیونکہ 22 رجب نہ سیدنا جعفر صادقؓ کی تاریخ پیدائش ہے اور نہ تاریخ وفات۔ سیدنا جعفر صادقؓ کی ولادت 8 رمضان 80 ہجری یا 83 ہجری میں ہوئی اور وفات ماہ شوال 148 ہجری میں ہوئی ہے، البتہ 22 رجب سیدنا امیر معاویہؓ کی تاریخ وفات ہے۔

اس سے ثابت ہوتا ہے کہ محض پردہ پوشی کیلئے اس رسم کو سیدنا جعفر صادقؓ کی طرف منسوب کیا جاتا ہے، ورنہ در حقیقت یہ تقریب سیدنا امیر معاویہؓ کی وفات کی خوشی میں منائی جاتی ہے۔

جس وقت یہ رسم ایجاد ہوئی، اُس وقت اہلِ سنت و الجماعت کا غلبہ تھا، اس لئے یہ اہتمام کیا گیا کہ شیرینی علانیہ تقسیم نہ کی جائے تا کہ راز فاش نہ ہو، بلکہ دشمنانِ سیدنا امیر معاویہؓ خاموشی کے ساتھ ایک دوسرے کے یہاں جا کر اسی جگہ یہ شیرینی کھائیں جہاں اس کو رکھا گیا ہے، اور اس طرح اپنی خوشی و مسرت ایک دوسرے پر ظاہر کر دیں، جب اس کا چرچا ہوا تو اس کو سیدنا جعفر صادقؓ کی طرف منسوب کر کے یہ تہمت اُن پر لگائی کہ انہوں نے خود اس تاریخ میں اپنی فاتحہ کا حکم دیا ہے، حالانکہ یہ سب من گھڑت ہے۔

لہٰذا مسلمانوں پر لازم ہے کہ ہرگز ایسی رسم نہ کریں، بلکہ دوسروں کو بھی اس کی حقیقت سے آگاہ کر کے اس سے بچانے کی کوشش کریں۔

(المسائل المهمه فیما ابتلت به العامة: جلد، 6 صفحہ، 27)